Ezekyel 6 - Labib An Kreol Seselwa

Senyer I Kondann Ladorasyon Zidol

¹ SENYER ti koz avek mwan:

² Ou ki en imen, tourn ou regar ver bann montanny Izrael e anons mon menas kont zot.

³ Ou ava dir: Bann montanny Izrael, ekout parol Senyer BONDYE! La sa ki Senyer BONDYE i dir avek bann montanny ek kolin, bann ranpar ek vale: Mwan, mon pou anvoy lager kont zot e detri zot bann landrwa sakre.

⁴ Ou bann lotel pou ganny detri, bann brazye lansan ranverse e mon pou zet ou bann viktim ater devan bann zidol.

⁵ Mon pou tal kadav bann Izraelit devan zot bann zidol e mon pou fann zot bann lezo partou otour zot bann lotel.

⁶ Partou kot zot ete, zot bann lavil pou ganny devaste, landrwa sakre detri, lotel, zidol ek bann brazye lansan kas an morso e tou sa ki zot in fer pou disparet.

⁷ Bokou parmi zot pou mor. Alor, zot ava rekonnet ki mwan menm SENYER.

⁸ “Mon pou sepandan les serten parmi zot sirviv sa masak e dispers zot partou dan bann pei.

⁹ Bann sirvivan ava mazin mwan parmi bann nasyon kot zot pou viv koman bann egzile. Zot ava rapel ki mannyer mon'n detri zot, avek zot leker enfidel ki'n abandonn mwan e zot lizye ki'n reste fikse lo sa bann zidol. Zot pou ganny repinyans pour zot prop lekor, akoz bann aksyon degoutan ki zot in komet.

¹⁰ Zot ava rekonnet ki mwan menm SENYER. Sa ki mon'n dir pa ti bann parol initil, kan mon ti anons maler lo zot.”

¹¹ La sa ki Senyer BONDYE i deklare: Bat lanmen, pile, kriye: Ayoyo! Akoz sa bann aksyon degoutan pep Izrael, zot pou ganny touye par lager, lafanmin ek lepidemi.

¹² Sa enn ki lwen pou mor avek lepidemi e sa enn ki pre pou ganny masakre. Sa enn ki reste e ki'n sirviv, pou mor par lafanmin. Konmsa, mon ava egzekit mon lakoler ziska dan bout.

¹³ Ou ava konnen ki mwan menm SENYER, ler zot kadav ava fannen parmi zot bann zidol toultour zot bann lotel, lo sak kolin, lo sak montanny, anba sak zarbis ver e anba sak pye dibwa ki annan feyaz, partou kot zot ofer sakrifis devan zot zidol.

¹⁴ Mon pou montre zot mon pwisans. Mon pou detri zot pei e fer tou zabitan disparet depi dezer dan Sid ziska Ribla dan Nor. Alor, zot ava konnen ki mwan menm SENYER.