Ezekyel 4 - Labib An Kreol Seselwa

Zerizalenm Pou Ganny Anserkle

¹ Ou ki en imen, pran en brik e plas li devan ou. Desin en lavil lo la, lavil Zerizalenm.

² Montre ki i'n ganny anserkle par lennmi. Plas fose ek miray latak kont li. Enstal bann kan ek masin lager kont li toultour lavil.

³ Apre, pran en plak feray e plas li koman en miray ant ou ek lavil. Get li byen; lavil in ganny anserkle. Ou ki pe atak li. Sa i en lavertisman pour pep Izrael.

⁴ Alonz ou lo ou kote gos; ou ava plas pese pep Izrael lo ou. Ou ava responsab zot pese pour otan zour ki ou reste alonze lo sa kote.

⁵ Mon pou propoz ou en serten kantite zour egal avek menm kantite lannen ki Izrael i devre ganny pini pour zot fot: Ou pou port pwa bann fot Izrael pandan 390 zour.

⁶ Kan sa letan i fini, ou ava alonz lo kote drwat e ou ava port pese pep Zida pandan 40 zour. Mon pou propoz ou en zour pour sak lannen.

⁷ Ou ava fikse ou regar e lev ou lebra lo Zerizalenm ki'n ganny anserkle. Ou ava profetiz kont sa lavil.

⁸ Mon pou anmar ou avek lakord pour ou pa tourn ni adrwat, ni agos, ziska ki ou'n konplet bann zour ki Zerizalenm in ganny anserkle.

⁹ Pran dible, lorz, zariko, lantir, timil ek dible. Melanz tou dan en resipyan pour fer dipen. Sa i ava ou manze pandan 390 zour, tou letan ki ou pe alonze lo ou kote.

¹⁰ Ou ava manz en rasyon anviron 200 granm par zour.

¹¹ Ou ava osi bwar en rasyon delo: En lit par zour.

¹² Ou ava manz galet ki ou ava kwi devan tou dimoun lo en ta leskreman imen.

¹³ SENYER ti azoute: Konmsa ki pep Izrael pou manz en nouritir enpir dan sa bann pei etranze kot mon pou sas li.

¹⁴ Alor, mon ti reponn, “Senyer BONDYE! Depi mon lazenes ziska ozordi, mon pa'n zanmen manz lavyann zannimo mor natirelman, oubyen desire par zannimo sovaz. Okenn lavyann enpir pa'n zanmen antre dan mon labous.”

¹⁵ I ti reponn, “Bon! Mon permet ou ranplas leskreman imen par leskreman bef, pour ou fer kwi ou dipen.”

¹⁶ I ti azoute, “Ekoute, ou ki en imen! Mon pe al detri bann rezerv dipen dan Zerizalenm. Zot pou ganny dipen par rasyon e delo osi pou ganny rasyonnen. Zot pou manze e bwar avek lafreyer ek langwas.

¹⁷ Zot pou mank manze ek delo. Zot pou get kanmarad avek dezespwar. Zot pou deperi dan dezespwar, akoz zot pese.”