Ezekyel 3 - Labib An Kreol Seselwa

¹ I ti dir mwan, “Ou ki en imen, manz sa. Manz sa roulo e al koz avek pep Izrael.”

² Alor, mon ti ouver mon labous e i ti fer mwan manz sa roulo.

³ I ti dir mwan, “Ou ki en imen, manz sa roulo ki mon donn ou e ranpli ou vant.” Mon ti manze. I ti dou dan labous parey dimyel.

⁴ I ti dir mwan, “Ou ki en imen, al kot pep Izrael e repet parol ki mon pou dir ou.

⁵ Mon pa'n anvoy ou kot en pep ki koz en langaz etranz, ki difisil pour konpran, me kot pep Izrael.

⁶ Si mon ti anvoy ou kot en pep avek en gran popilasyon, ki koz en langaz etranze ki difisil pour konpran, zot ti ava ekout ou.

⁷ Me, bann Izraelit pa pou oule ekout ou, akoz zot pa oule ekout mwan. Zot latet i dir e zot leker i fermen.

⁸ Me mwan, mon pou fer ou latet vin pli dir ki pour zot e rann ou leker fermen parey pour zot.

⁹ Mon pou fer ou latet vin dir koman dyanman, pli dir ki ros. Pa per zot, pa les zot fer ou per. Zot en pep rebel.”

¹⁰ I ti dir mwan ankor, “Ou ki en imen, ouver gran ou zorey e ekout tou bann parol ki mon pou dir ou.

¹¹ Al kot sa bann egzile, ou pep. Menm si zot ekoute oubyen zot refize ekoute, dir zot: La sa ki Senyer BONDYE i deklare.”

¹² Apre, lespri Bondye ti soulev mwan; mon ti antann en gro tapaz deryer mwan en lavwa ti dir: Rann glwar SENYER kot son prezans i reste.

¹³ Mon ti antann batman lezel bann et vivan ki ti pe tap avek kanmarad, tapaz bann larou ki ti dan bor zot, konmsi ti en tranblemandter.

¹⁴ Lespri ti soulev mwan e anmenn mwan. Mon ti irite e ofanse, me lanmen SENYER ti pez for lo mwan.

¹⁵ Alor, mon ti ariv Tel-Aviv, kot bann egzile ki ti reste lo bor larivyer Kebar. Mon ti reste la parmi zot pandan set zour, avek en lespri trouble.

Senyer I Fer Ezekyel En Santinel

¹⁶ Apre sa set zour, SENYER ti dir mwan:

¹⁷ Ou ki en imen, mon'n etabli ou koman en gardyen lo pep Izrael. Sak fwa ou antann en parol sorti dan mon labous, ou ava transmet pep Izrael mon lavertisman.

¹⁸ Kan mon dir avek en malfeter: Ou pou mor, ou devre anons li e averti li pour ki i sanz son kondwit e viv. Si ou pa fer li, i pou mor, byensir akoz son fot; me ou, mon pou demann ou rann kont son lanmor.

¹⁹ Me si ou averti en malfeter son fot, e i pa abandonn son move lavi, i pou mor dan son pese. Me ou, ou ava sov ou lavi.

²⁰ Si en dimoun zis i abandonn sa ki byen e konmans pratik sa ki mal, mon pou plas en pyez dan son semen. I pou mor. Si ou pa averti li son danze, i pou mor dan son pese. Son bann bon aksyon pase pa pou servi li; me ou, mon pou fer ou rann kont son lanmor.

²¹ Me si ou averti sa zonm pour li pa fer pese e i arete, i pou sirman viv, akoz i'n ekout ou lavertisman; me ou, ou ava sov ou lavi.

²² Lanmen SENYER ti sezi mwan. I ti dir mwan: Leve! Al dan laplenn, kot mon pou koz avek ou.

²³ Alor, mon ti sorti e mon ti al dan laplenn. Laglwar SENYER ti aparet, parey ki mon ti'n war kot larivyer Kebar; mon ti tonm lafas ater.

²⁴ Lespri Bondye ti antre dan mwan e met mwan debout lo mon lipye. I ti dir mwan: Al anferm ou dan ou lakaz.

²⁵ Ou ki en imen, ou pou ganny anmare avek lakord pour ou pa kapab sorti pour al dan piblik.

²⁶ Mon pou fer ou lalang kol dan ou pale; ou pa pou kapab koze pour remontrans zot, akoz zot en pep rebel.

²⁷ Me kan mon koz avek ou, mon pou ouver ou labous e ou ava dir zot: La sa ki Senyer BONDYE i deklare: Sa enn ki oule tande! Tande! Sa enn ki oule refize tande, pa ekoute, akoz zot en pep rebel.