Ezekyel 23 - Labib An Kreol Seselwa

De Ser Prostitye

¹ SENYER ti koz avek mwan:

² Ou ki en imen, ekoute! Ti annan de ser, fiy menm manman.

³ Kan zot ti ankor zenn e pe viv Lezip, zot ti tonm dan prostitisyon. Zot ti les zonm tripot avek zot tete e kares zot lekor zenn fiy.

⁴ Enn ti apel Ohola; lot ser ti apel Oholiba. Sa enn premye i reprezant Samari; lot i reprezant Zerizalenm. Sa de fiy ti pour mwan e zot ti ganny plizyer garson ek fiy.

⁵ Ohola ti vin en prostitye dan menm letan ki i ti pour mwan. I ti tonm anmoure avek son bann vwazen bann solda Asiriyen e zot ti vin galan.

⁶ Ti annan bann solda dan liniform rouz, bann sef ek komandan ki ti bann zennzan galan, bann bon kavalye.

⁷ Ohola ti livre son lekor avek tou sa bann zonm Asiriyen enportan. Dan son pasyon i ti al avek zot, ador bann zidol Asiriyen e rann li enpir.

⁸ I ti kontinyen dan prostitisyon depi Lezip, kan i ti ankor zenn. Bann zonm ti dormi avek li, kares son lekor zenn fiy e antrenn li dan prostitisyon.

⁹ Alor, mon ti abandonn li avek son bann galan Asiriyen, avek ki i ti'n tonm anmoure.

¹⁰ Zot ti tir li touni; zot ti pran son bann garson ek son bann fiy; zot ti touy li avek lepe; zot zizman kont li ti vin en legzanp pour bann fanm partou kot zot ti koze.

¹¹ Son ser Oholiba ti war tousala. Me i ti vin pli deregle dan son pasyon; i ti fer pir ki son ser Ohola. I ti depas son ser dan prostitisyon.

¹² I ti abandonn son lekor avek bann Asiriyen, bann sef ek bann komandan, bann gerye dan liniform ek bann kavalye. Zot tou, zot ti bann zennzan byen galan.

¹³ Mon ti war ki zot ti'n tonm dan limoralite. Tou le de ti'n swiv menm semen.

¹⁴ Oholiba ti al pli lwen dan son prostitisyon. I ti'n war portre bann zonm Kaldeen, penn an rouz lo miray.

¹⁵ Zot ti annan sang otour zot leren, tirban otour zot latet; zot tou, zot ti parey bann zofisye. Sa ti portre bann Babilonyen.

¹⁶ Kan i ti war zot, i ti anvi zot e i ti anvoy bann mesaze kot zot, dan pei Kalde.

¹⁷ Bann Babilonyen ti vin fer lanmour e dormi avek li. Zot ti rann li enpir par prostitisyon e apre, kit zot avek degou.

¹⁸ I ti'n tonm dan prostitisyon, tir li touni an piblik; mon ti kit li avek degou, parey mon ti kit son ser.

¹⁹ Me i ti'n tonm pli ba ankor dan son prostitisyon, parey i ti fer Lezip, pandan son lazenes.

²⁰ Pour satisfer son pasyon, i ti livre li avek bann pervers ki ti annan seks parey bourik e ki ti zouir parey seval.

²¹ Ou'n retourn dan limoralite ou lazenes, lepok ki bann Ezipsyen ti tripot ou e kares ou tete zenn fiy.

Zizman Bondye lo Pli Zenn Ser

²² Alor, Oholiba! La sa ki Senyer BONDYE i deklare: Mon pou tourn ou bann galan kont ki ou ti annan degout. Mon pou rasanble zot kont ou, sorti dan tou kote.

²³ Mon pou fer vin kont ou bann Babilonyen, tou bann Kaldeen, bann zabitan Pekod, Soa ek Koa, ansanm avek tou bann Asiriyen; zot tou, bann zenn zonm galan, bann gouverner ek ziz, bann gerye lo seval.

²⁴ Zot pou atak ou sorti dan Nor, en gran lafoul dimoun avek kales lager ek lezot veikil lager. Zot pou atak ou lo tou kote; zot pou ganny proteze par zot bann boukliye ek kas. Mon pou prezant ou ka devan zot; zot ava ziz ou dapre zot prop lalwa.

²⁵ Akoz mon lakoler kont ou, mon pou les zot tret ou avek vyolans. Zot pou koup ou nennen ek ou zorey; bann ki reisi sirviv pou ganny masakre. Zot pou atrap ou bann garson ek fiy e bann ki sirviv pou ganny brile.

²⁶ Zot pou depouy ou lenz e pran tou ou bizou.

²⁷ Mon pou met en lafen avek ou bann aksyon imoral ek ou lavi prostitisyon ki ou ti'n konmanse depi ki ou'n sorti Lezip. Ou pou nepli get zonm, ni mazin Lezip.

²⁸ La sa ki Senyer BONDYE i deklare: Mon pou livre ou dan lanmen bann ki ou deteste, dan lanmen bann pour ki ou ti annan degou.

²⁹ Zot pou tret ou avek laenn e sezi tou bann prodwi ou travay. Zot pou kit ou konpletman touni e met deor an piblik tou ou bann move lavi ek ou prostitisyon.

³⁰ Ou pou sibir en tel tretman, akoz ou'n tonm dan prostitisyon avek bann nasyon etranze; ou'n livre ou dan lenpirte avek zot bann zidol.

³¹ Akoz ou'n pran menm semen ki ou ser, mon pou plas son lakoup dan ou lanmen.

³² La sa ki Senyer BONDYE i deklare: Ou pou bwar menm lakoup avek ou ser, en lakoup byen larz e byen fon. Ou pou ganny riye e gognarde, akoz ou lakoup i byen plen.

³³ Ou pou ranpli avek douler ek soufrans, en lakoup lafreyer ek devastasyon. Sanmenm sa lakoup ki ou ser Samari in bwar.

³⁴ Ou ava bwar li ziska i vid; ou ava kraz li anba ou ledan e sizle ou tete avek son morso. Mwan Senyer BONDYE ki deklare.

Zizman Bondye lo De Ser

³⁵ Alor, la sa ki Senyer BONDYE i deklare: Akoz ou'n oubliy mwan e ou'n abandonn mwan, ou ava siport konsekans ou move lavi, ou prostitisyon.

³⁶ SENYER ti dir mwan: Ou ki en imen, eski ou pare pour ziz Ohola ek Oholiba? Met devan zot, zot bann pratik degoutan.

³⁷ Zot in livre zot dan en lavi adilter; zot annan disan lo zot lanmen. Zot in komet adilter avek zot bann zidol. Zot in menm ofer an sakrifis zot prop zanfan ki zot in donn nesans.

³⁸ La sa ki zot in fer mwan ankor: Anplis, zot in profann mon sanktyer e menm zour, zot in osi kas mon saba, ki'n ganny konsakre pour mwan.

³⁹ Sa menm zour ki zot in ofer sakrifis zot zanfan devan zot zidol, zot in al dan mon sanktyer pour profann li.

⁴⁰ Anplis, zot in anvoy mesaze envit zonm sorti dan pei elwannyen. Zot in vini. Pour sa bann zonm, zot in bennyen, penn zot lizye, kouver zot avek bizou.

⁴¹ Apre, zot in enstal zot lo en gro sofa e dres en latab devan. Zot in pran tou mon lansan ek mon delwil lesans e plas ansanm lo la.

⁴² Ti annan tapaz selebrasyon en lafoul ensousyan, bann zonm soular tou kalite. Zot ti'n vini sorti dan dezer; zot ti met brasle lo lebra sa de fanm ek zoli kouronn lo latet.

⁴³ Mon ti dir: En fanm ki'n ize dan lavi adilter, i kontinyen ganny servi dan prostitisyon.

⁴⁴ Akoz bann zonm ti'n al kot li parey zot, al kot en prostitye. Zot ti al kot Ohola ek Oholiba, bann fanm ki anmenn en lavi imoral.

⁴⁵ Bann zonm zis pou pas zizman lo zot koman bann adilter, parey bann kriminel i ganny zize. Annefe, zot in komet adilter e zot ti annan disan lo zot lanmen.

⁴⁶ La sa ki Senyer BONDYE i deklare: Rasanble lepep kont zot; fer zot tranble; depouy zot avek tou sa ki zot posede.

⁴⁷ Sa lafoul pou saboul zot avek ros e pou masakre zot; zot pou masakre tou zot bann garson ek zot bann fiy e bril zot bann lakaz.

⁴⁸ Konmsa, ki mon pou met en lafen avek lavi imoral dan pei. Sa i ava servi legzanp pour tou bann fanm e zot ava arete avek zot lavi imoral.

⁴⁹ Zot ava port konsekans zot lavi imoral ek zot bann pese idolatri. Alor, zot ava rekonnet ki mwan menm Senyer BONDYE.