Ezai 9 - Labib An Kreol Seselwa

Renny Lerwa ki Pe Vini

¹ Me fernwanr pa pou reste touzour lo later kot konmela, i annan langwas. Si dan lepase, pei Zabilon ek Neftali in ganny kraze, lavenir pou fer konn loner lo larout ver lanmer, lot kote Zourden ek teritwar bann nasyon.

² Lepep ki ti pe marse dan fernwanr in war en gran lalimyer. Bann ki ti pe viv dan en pei fernwanr, en lalimyer ti briye lo zot.

³ Ou'n fer popilasyon sa nasyon ogmante, ou'n rann li pli ere ankor. I kontan ki ou la, i rezoui devan ou parey letan rekolt; i montre son lazwa, parey ler dimoun i partaz bann byen ki i sezi dan lager.

⁴ Akoz ou'n tir sa fardo ki ti peze lo ledo ou pep, baton bann diktater ki ti pe bles zot zepol, sa mayos ki zot ti pe ganny bise avek, ozordi, ou'n kas tousala, parey zour ou ti bat bann Madyanit.

⁵ Akoz tou bann bogi lennmi ki ti fer tranble later, tou bann liniform ki'n tase avek disan, in ganny servi pour fer en gran dife avek.

⁶ En zanfan in ne pour nou; nou'n ganny en garson. Lotorite i repoz lo son zepol. Zot apel li: Konseye merveye, Bondye pwisan, Papa eternel, Prens Lape.

⁷ Son lotorite pou kontinyen grandi e lape pou rennyen pour touzour pour tronn David ek son rwayonm. I pou etabli son renny e rann li solid lo lalwa ek lazistis, apartir ozordi e pour touzour. SENYER liniver pou fer tousala akoz son gran lanmour.

Senyer Pou Pini Izrael

⁸ SENYER in anvoy en parol kont Zakob; in tonm lo Izrael.

⁹ Lepep antye pou konnen, Efraim ek zabitan Samari. Avek lorgey ek larogans dan leker zot dir:

¹⁰ Bann brik in tonbe, me nou pou rekonstri avek bann ros taye; bann poto dibwa ordiner in ganny koupe, me nou pou ranplas zot avek poto sed.

¹¹ Alor, SENYER in dres kont Izrael, bann lennmi sorti Resin.

¹² Bann Arameen lo kote Les, bann Filisten lo kote Was, zot in devor Izrael avek lapeti. Malgre sa, lakoler SENYER pa'n kalme; son lanmen in reste touzour menasan.

¹³ Lepep pa retourn ver sa enn ki'n pini li, i pa tourn ver SENYER liniver.

¹⁴ Alor dan en sel zour, SENYER in koup latet ek lake Izrael, brans palm ek banbou.

¹⁵ Bann ansyen ek bann zonm enportan, se sa latet; bann profet ki ansenny mansonz, se sa lake.

¹⁶ Bann dirizan sa pep in anmenn zot lo move semen; dimoun in ekout zot in tonm dan konfizyon.

¹⁷ Pour sa rezon, SENYER pa pou toler zot bann zennzan, ni pran konpasyon pour zot bann orfelen ek zot bann vev. Annefe, zot in dezobeisan anver Bondye, e zot in fer sa ki mal; dan zot labous, zis move keksoz ki sorti. Malgre tousala, lakoler SENYER pa kalme; son lanmen i reste touzour menasan.

¹⁸ Mesanste i alimen parey en dife ki bril bann zarbis pikan. I ravaz bann brousay dan lafore e fer en gro lafimen monte.

¹⁹ Akoz lakoler SENYER liniver, pei in ganny brile; son prop pep in pran dife; personn pa pe pran pitye pour son prosen.

²⁰ Zot devor kanmarad lo kote drwat, me zot ankor lafen; zot devor lo kote gos, me zot pa ankor rasazye. Zot devor laser zot prop zanfan.

²¹ Manase in devor Efraim; Efraim in devor Manase. Zot ti fer konplo kont Zida. Malgre tousala, lakoler SENYER pa'n tonbe; son lanmen i ankor menasan.