Ezai 7 - Labib An Kreol Seselwa

En Mesaz pour Lerwa Akaz

¹ Lepok ki Akaz, garson Yotanm, garson Ozyas, ti lerwa Zida, Rezin, lerwa Siri e Peka, garson Remalia, lerwa Izrael, ti ale pour atak Zerizalenm. Me zot pa ti kapab mont en latak kont li.

² Ler Akaz, en desandan lerwa David, ti aprann ki Aranm ti'n alye li avek Efraim, i ti ganny en sok par sa nouvel. Zot ti tranble parey fey dibwa dan divan.

³ SENYER ti dir Ezai: Sorti, al rankontre Akaz. Pran ou garson Sear-Yasoub avek ou. Ou ava war li dan bout kanalizasyon ki lo rezervwar siperyer, lo semen ki al kot laplenn, kot dimoun i tal lenz.

⁴ Ou ava dir li: Fer atansyon! Reste kalm! Pa bezwen per. Pa les lakoler sa de zans dekouraz ou. Zot zis de tizon kot lafimen i ankor pe sorti.

⁵ Aranm, avek Efraim ek garson Remalia in fer konplo kont ou. Zot in dir:

⁶ Annou al atak Zida, annou fer per Zerizalenm! Nou ava fors li zwenn avek nou. Nou ava enstal garson Tabael koman zot lerwa.

⁷ La sa ki Senyer BONDYE i deklare: Sa pa pou tenir, e i pa pou zanmen arive.

⁸ Annefe, Damas i kapital Lasiri, Resin i sef Damas. Dan 65 an, Efraim pou ganny kraze, i pou nepli egziste koman en pep.

⁹ Samari i kapital Efraim e garson Remalia i sef Samari. Si ou napa lafwa ou pa pou kapab tenir.

Siny Emanouel

¹⁰ SENYER ti koz ankor avek Akaz. I ti dir li:

¹¹ Demann SENYER ou Bondye en siny ki sorti dan fon lemonn lanmor, oubyen enn ki sorti lao dan lesyel.

¹² Me Akaz ti reponn: Mon pa pou demann okenn siny; mon pa pou tant SENYER.

¹³ Alor Ezai ti dir: Ekoute, zot bann desandan lerwa David! I pa ase ki zot fatig zonm? Fodre ki zot osi fatig mon Bondye?

¹⁴ Alor, SENYER li menm pou donn zot en siny: En zenn fiy i ansent e i pou met omonn en garson. I pou apel li Emanouel. Savedir: Bondye avek nou.

¹⁵ I pou nouri li avek dile kaye ek dimyel, ziska ki i ava konn rezet sa ki mal e swazir sa ki byen.

¹⁶ Avan menm ki sa zanfan i konn rezet sa ki mal e swazir sa ki byen, pei sa de lerwa ki fer ou per, ava'n vin en dezer.

¹⁷ SENYER pou anvoy lo ou, lo ou pep e lo ou bann desandan, bann zour ki pa'n zanmen deza arive depi lepok ki rwayonm Izrael ti separ li avek rwayonm Zida, lerwa Asiri.

¹⁸ Sa zour, SENYER pou soufle lo ou pour fer vini bann mous sorti Lezip dan lanbousir larivyer Nil, ek mous dimyel sorti Asiri.

¹⁹ Zot pou vin apoz dan bann presipis, dan lafant ros, lo bann zarbis e dan laplenn zerb.

²⁰ Sa zour, SENYER pou pran en razwar; depi lo lot kote larivyer Efrat, i pou raz zot latet ek tou pwal lo zot lekor; i pou raz menm zot labarb.

²¹ Sa zour, dimoun pou swanny en bef ek de mouton.

²² Dile pou telman annabondans ki zot ava nouri zot zis avek dile kaye. Tou bann ki pou reste dan pei, zot pou viv lo dile kaye ek dimyel.

²³ Sa zour, la kot ti annan en plantasyon rezen, en valer 1,000 pyes larzan, pou annan zis bann zarbis pikan.

²⁴ Pei antye pour kouver avek zis bann zarbis pikan e dimoun pou fer lasas avek zot fles.

²⁵ Ou pa pou oze al dan bann kolin pour kiltive, akoz bann zarbis pikan. Zot pou vin en laplenn zerb kot bef ek mouton pou viv larg e lib.