Ezai 64 - Labib An Kreol Seselwa

¹ Si zis ou ti desir lesyel! Si ou ti desann! Bann montanny ti ava degrengole devan ou.

² Parey dife ki bril brousay, parey dife ki bwi delo, fer ou bann lennmi konnen ki ou ete; e bann nasyon ava tranble devan ou!

³ Ler ou ti fer bann keksoz terib ki nou pa ti pe ekspekte, ou ti desann e bann montanny ti tranble devan ou.

⁴ Personn pa'n zanmen konnen; zorey pa'n zanmen tande; lizye pa'n zanmen war okenn Bondye parey ou, ki azir konmsa, anver dimoun ki met son lespwar dan ou.

⁵ Ou ed sa bann ki fer sa ki byen san ezite, sa bann ki mars dapre ou lalwa. Me ou ti ankoler akoz nou ti fer pese; ou ti kasyet ou akoz nou ti'n transgres ou lalwa.

⁶ Nou tou, nou'n fer pese e tou nou bann bon aksyon, i parey en lenz sal. Nou tou, nou'n fletri parey en fey e nou bann pese i fer nou anvole dan divan.

⁷ Personn pa apel ou ni esey atas li avek ou, akoz ou'n kasyet nou ou figir e les nou pese dormi lo nou.

⁸ Malgre sa SENYER, ou menm nou Papa; nou, nou larzil e ou, ou potye ki fasonn nou; nou tou, nou rezilta travay ki'n sorti dan ou lanmen.

⁹ SENYER, pa pran tro lakoler! Pa toultan mazin nou pese. Plito, konsider nou tou koman ou pep.

¹⁰ Ou bann lavil sen in vin en dezer; Siyon in vin en dezer; Zerizalenm in ganny devaste.

¹¹ Nou manifik tanp sakre, kot nou bann zanset ti loue ou, in ganny detri par dife e tou nou bann landrwa lapriyer in osi ganny detri.

¹² SENYER! Devan tousala, eski ou pou reste san azir? Eski ou pou gard silans e pini nou osi severman?