Ezai 6 - Labib An Kreol Seselwa

Bondye I Apel Ezai koman Profet

¹ Dan lannen ki lerwa Ozyas ti mor, mon ti war SENYER asiz lo en tronn tre o; son rob ti ranpli tanp.

² Bann serafen ti pare pour servi li. Zot ti annan sis lezel: De ti servi pour kouver zot figir, de ti servi pour kouver zot lipye e de pour zot anvole.

³ Zot ti pe apel kanmarad. Zot ti dir: Sen, sen, sen SENYER liniver! Later antye i ranpli avek son prezans!

⁴ Zot lavwa ti fer tranble bann laport lo zot gon e tanp ti ranpli avek lafimen.

⁵ Alor, mon ti dir: Maler lo mwan! Fini pour mwan! Mon en zonm avek lalev enpir, e mon pe viv parmi en pep ki lalev i enpir; mon lizye in war Lerwa, SENYER liniver!

⁶ Me, enn bann serafen ti anvol ver mwan. Dan son lanmen, i ti annan en labrez ki i ti'n pran lo lotel avek en pens.

⁷ I ti tous mon labous avek sa labrez. I ti dir: Aprezan ki sa labrez in tous ou labous, ou fot in ale, ou pese in ganny efase.

⁸ Alor, mon ti antann lavwa SENYER ki ti demande, Lekel mon pou anvoye? Lekel ki pou al dan nou plas? Mon ti dir: La mon la! Anvoy mwan!

⁹ I ti dir mwan: Ale! Al dir sa pep: Zot ava kontinyen ekoute, me zot pa pou konpran nanryen! Zot ava kontinyen gete, me zot pa pou aprann nanryen!

¹⁰ Angourdi leker sa pep. Rann zot sourd! Rann zot aveg, pour ki zot pa war avek zot lizye, pa antann avek zot zorey e konpran avek zot leker! Zot pa ava retourn kot mwan e ganny geri!

¹¹ Mon ti demande: Ziska kan, SENYER? I ti dir: Ziska ki bann lavil i ganny detri e personn pa reste dan sa bann lakaz, e pei i ganny devaste;

¹² ziska ki SENYER i al lwen avek bann zabitan e ki sa gran later i ganny abandonnen.

¹³ Si i reste ankor en dizyenm zabitan, li osi, i pou ganny brile. Me, parey en pye dibwa ki son siko i reste ler in ganny koupe, en desandans sen pou bourzonnen, sorti dan sa siko.