Ezai 51 - Labib An Kreol Seselwa

Parol Rekonfor pour Zerizalenm

¹ Zot, ki rod lazistis! Zot, ki rod SENYER, ekout mwan! Lev zot lizye ver sa ros dan lekel zot ti ganny taye, ver sa karyer kot zot sorti.

² Lev zot lizye ver Abrahanm, zot zanset e ver Sara ki'n donn zot nesans. Abrahanm ti napa zanfan ler mon ti apel li; apre, mon ti beni li e donn li bokou desandans.

³ SENYER pou konsol Siyon. I pou pran pitye pour bann landrwa devaste. I pou fer bann dezer vin parey zarden Edenn, parey zarden SENYER. I pou reganny lazwa ek kontantman; avek bann kantik louanz ek psonm.

⁴ Mon pep! Ekout mwan! Mon nasyon! Port atansyon akoz mon pe al donn en lansennyman e mon lazistis pou en lalimyer lepep.

⁵ Mon pa pour tarde vin sov zot; zot pre pour ganny libere e mon lebra ava ziz bann pep; zabitan bann zil pe esper mwan, zot pe kont lo mon pouvwar.

⁶ Lev lizye, get lesyel, get later anba: Lesyel pou disparet parey lafimen; later pou tonm an lanbo parey en lenz e son bann zabitan pou mor parey mous. Me mon delivrans i asire e delivrans ki mon pe anmennen i pour touzour.

⁷ Ekout mwan! Ou ki konn lazistis! Ou sa pep ki gard mon lansennyman dan ou leker! Pa bezwen per repros ki sorti kot zonm. Pa bezwen tranble ler zot ensilte ou,

⁸ akoz mit pou manz zot parey i manz lenz e lever pou manz zot parey i manz lalenn. Me mon delivrans i pour touzour e zot pou ganny sove zenerasyon apre zenerasyon.

⁹ Leve! Leve! Lebra SENYER! Pran lafors! Leve parey dan letan pase! Dan letan bann zenerasyon pase! Pa ou ki ti touy Rahab e transpers dragon?

¹⁰ Pa ou ki ti fer lanmer ek delo dan losean sek? Ou menm ki ti tras en semen dan profonder lanmer pour fer traverse bann ki ti'n ganny sove.

¹¹ Konmsa, bann ki SENYER in sove ava retournen e sant bann kantik letan zot mont Siyon; pou touzour annan lazwa lo zot figir; zot ava touzour dan lakontantman ek lazwa; zot pou nepli ni sagren ni plere.

¹² La sa ki SENYER i deklare: Mwan menm ou konsolater. Alor, akoz ou per zonm ki parey ou en et imen ki mor parey zerb?

¹³ Ou'n oubliy SENYER, ou Kreater, ki'n tal lesyel e met fondasyon later. Ou kontinyen per tou lazournen devan lakoler bann diktater ki mazin zis detri ou. Me kote lakoler sa diktater in ale?

¹⁴ Prizonnyen pa pou tarde ganny libere; zot pa pou mor e desann dan lafos, ni mank dipen.

¹⁵ Mwan SENYER, ou Bondye mon fer lanmer vin move e bann laroul ronfle. SENYER liniver i son non.

¹⁶ Mon'n met mon bann parol dan ou labous e kasyet ou anba lonbraz mon lanmen; mon'n tal lesyel e met bann fondasyon later; mon'n dir avek Siyon: Ou menm mon pep.

¹⁷ Leve! Leve! Debout, Zerizalenm! Ou ki'n bwar dan lanmen SENYER, lakoup son lakoler; ou ki'n bwar ziska lanmar, lakoup ki fer ou drive.

¹⁸ Parmi tou bann zanfan ki i'n fer, napa personn pour gid li. Parmi tou bann zanfan ki i'n elve, napa enn ki pou atrap son lanmen.

¹⁹ Sa de maler ki'n ariv ou lekel ki pou senpatiz avek ou? Devastasyon ek destriksyon lafanmin ek lager, lekel ki pou konsol ou?

²⁰ Ou bann zanfan in tonm feb; zot in tale dan tou kwen semen parey en antilop ki'n ganny pri dan en latrap; lakoler SENYER in menas zot. Bondye in rezet zot.

²¹ Ekoute! Ou ki'n ganny imilye! Ou'n soule, non pa par diven:

²² La sa ki SENYER, ou Bondye ki defann lakoz son pep i deklare: Mon pe tir dan ou lanmen lakoup mon lakoler ki fer ou drive. Ou pa pou bwar ankor dan lakoup mon lakoler.

²³ Mon pou met li dan lanmen sa bann ki tourmant ou e ki ti'n dir ou: Dormi ater pour nou kapab mars lo ou! Alor, ou'n fer ou ledo vin parey marspye, parey later lo semen pour zot mars lo la.