Ezai 50 - Labib An Kreol Seselwa

¹ La sa ki SENYER i deklare: Oli let divors ki prouve ki mon'n divors ou manman? Oubyen avek ki mon'n vann ou? Non, ou'n ganny vann akoz zot bann pese e ou manman ti ganny divorse akoz zot bann fot.

² Akoz ti napa personn ler mon ti vini? Akoz personn pa ti reponn ler mon ti apele? Eski mon lanmen i tro kourt pour li nepli kapab sove? Eski mon nepli annan lafors pour delivre ou? Mon parol i ase pour fer lanmer sek e bann larivyer vin en dezer; alor, zot pwason i pouri akoz napa delo e zot mor laswaf.

³ Mon abiy lesyel avek fernwanr e mon kouver li avek en lenz dey.

Lobeisans Serviter Senyer

⁴ Senyer BONDYE in ansenny mwan pour ankouraz sa ki feb, avek en bon parol. Tou le bomaten, i fer mon zorey drese; mon zorey i drese pour ekoute parey en disip.

⁵ Senyer BONDYE in ouver mon zorey e mon pa'n revolte. Mon pa ti rekile.

⁶ Mon ti vir mon ledo avek sa bann ki ti pe fwet mwan e mon lazou avek sa bann ki ti pe aras mon labarb. Mon pa ti kasyet mon figir avek bann ki ti pe ensilte mwan e kras lo mwan.

⁷ Senyer BONDYE in ed mwan. Pour sa rezon ki mon pa sibir dezoner. Alor, mon fer mon figir vin dir parey ros e mon konnen ki mon pa pou kanmi.

⁸ Sa enn ki pou fer mwan zistis i pros. Lekel ki pou afront mwan? Annou debout ansanm! Lekel mon lennmi? Les li vin konfront mwan.

⁹ Senyer BONDYE ki mon sekour. Lekel ki pou deklar mwan koupab? Zot tou, zot pou ize parey en lenz. Mit pou manz zot tou.

¹⁰ Lekel parmi zot ki annan respe pour SENYER e ekout lavwa son serviter? Lekel ki mars dan fernwanr san okenn lalimyer, me ki kanmenm fer konfyans dan non SENYER e apiy lo son Bondye?

¹¹ Zot tou ki alim dife e ki posed bann dart pour met dife! Al mars dan laflanm zot prop dife e lo labrez ki reste. Tousala in arive par mwan; zot pou mor dan tourman.