Ezai 5 - Labib An Kreol Seselwa

Kantik lo Plantasyon Rezen

¹ Mon anvi sant pour mon lanmoure en sanson lo son plantasyon rezen: Mon lanmoure ti annan en plantasyon rezen lo en kolin fertil.

² I ti travay later e tir tou ros; i ti plant en zoli plan rezen. I ti konstri en tour dan milye. I ti fouy en gran basen kot rezen pou ganny kraze. I ti pe espere ganny bon rezen, me i ti ganny rezen eg.

³ Alor, mon lanmoure ti dir: Aprezan zot ki reste Zerizalenm! Zot ki reste Zida! Zot menm zize ant mwan ek mon plantasyon rezen.

⁴ Tou sa ki mon ti kapab fer pour mon plantasyon rezen, pa mon'n fer? Mon ti pe espere rekolte bon rezen. Me akoz in donn mwan rezen eg?

⁵ Aprezan, les mwan dir zot ki mon pou fer avek mon plantasyon rezen: Mon pou tir bann klotir e les li ganny devore. Mon pou kas son bann miray e les li ganny kraze anba lipye.

⁶ Mon pou les li vin en landrwa abandonnen. Personn pa pou tay son bann brans; personn pa pou aras bann move zerb. Bann plant anvaisan ek zarbis pikan pou pouse. Mon pou anpes bann nyaz fer lapli tonm lo li.

⁷ Plantasyon rezen SENYER liniver se pep Izrael; Sa plan rezen ki i ti telman kontan, se pep Zida. SENYER ti pe esper ladrwatir sorti ladan, me ti annan zis versman disan. I ti pe esper lazistis, me i ti antann zis bann malere kriye.

Lenzistis Sosyal I Ganny Denonse

⁸ Maler bann ki azout lakaz! Ki pran en morso later apre lot, ziska ki pei antye i zis pour zot.

⁹ La serman ki SENYER liniver ti fer rezonnen dan mon zorey: En kantite sa bann lakaz pour ganny abandonnen. Personn pa pou vin reste dan sa bann gran e zoli lakaz.

¹⁰ Dis arpan plantasyon rezen pou donn apenn 50 lit diven. Avek 100 kilo semans dible, zot pou rekolte zis 10 kilo.

¹¹ Maler lo zot ki lev granmaten pour al rod labwason for e ki trennen sou avek diven, ziska tar dan lannwit.

¹² Lanmizik laarp ek lir, tanbouren, laflit ek diven i lakonpannyman dan zot bann lafet. Me zot pa remark sa ki SENYER in fer; ni travay ki son lanmen i'n akonpli.

¹³ Pour sa rezon, mon pep pou ganny deporte akoz i pa konpran. Son bann gran zans pou mor lafen e popilasyon antye pou mor laswaf.

¹⁴ Alor, lapeti lemonn lanmor in ogmante e in ouver son labous byen gran; bann gran zans dan Zerizalenm e popilasyon antye lavil pou desann; ansanm, zot pou al dan zot tapaz lafet.

¹⁵ Zonm i mars latet anba, e zot pou ganny imilye; regar bann orgeye i ganny abese.

¹⁶ Me, SENYER liniver pou ganny glorifye akoz i zis; Bondye sen ava montre ki i sen par lazistis.

¹⁷ Bann mouton pou rod zerb dan bann debri lavil konmsi zot ti dan zot laplenn; bann pti kabri pou manz parmi larin lavil.

¹⁸ Maler! Zot ki'n ganny anpaye dan zot krim; ki trenn zot pese deryer zot parey zot trenn en saret.

¹⁹ Zot dir: Depese SENYER, akoz nou anvi war sa. Proze Bondye sen Izrael pa pou tarde pour ganny akonpli! Nou oule war sa arive.

²⁰ Maler lo zot ki apel sa ki byen, mal e sa ki mal, byen; ki sanz fernwanr pour lalimyer e lalimyer pour fernwanr; ki fer krwar anmer sa ki dou e dou sa ki anmer.

²¹ Maler lo sa bann ki krwar zot saz, ki krwar zot entelizan!

²² Maler sa bann gran bwarer diven ki eksper dan melanz tou kalite labwason!

²³ Zot ki larg en koupab pour gous e refiz bann inosan zot drwa.

²⁴ Pour sa rezon, parey dife i devor lapay e zerb sek i disparet dan laflanm, zot pou pouri par zot rasin, e zot bann fler pour vin lapousyer, akoz zot in rezet lansennyman SENYER liniver e zot in mepriz Parol Bondye Sen Izrael.

²⁵ Pour sa rezon, SENYER i ankoler kont son pep. In lev son lanmen e i'n pini li. Montanny ti tranble, kadav ti fannen dan lari parey salte. Malgre sa, son lakoler pa ti tonbe, i pa bes son lebra.

²⁶ SENYER pou donn en sinyal bann nasyon ki reste tre lwen; i pou soufle avek en pep ki reste dan profonder later. La i pe vini avek lavites!

²⁷ Personn pa fatige; personn pa fer fo pa; personn pa asoupi ni dormi; personn pa larg son sang; napa en lase sandal ki'n kase.

²⁸ Zot bann dart i byen pwent, zot in byen ris zot fles. Sabo zot bann seval i dir koman ros e larou zot bann kales i vire parey tourbiyon.

²⁹ Zot kriy parey en lyon, zot gronnyen parey en pti lyon; zot anmenn zot viktim dan bann landrwa sir, kot personn pa kapab vin pran.

³⁰ Sa zour, pou annan en gronnyman kont li, parey gronnyman lanmer. Si ou get lo kote later, ou pou war zis fernwanr ek detres. Bann gro nyaz pou maske lalimyer.