Ezai 32 - Labib An Kreol Seselwa

Lazistis Pou Rennyen

¹ Alor, en lerwa pou rennyen dapre lazistis e bann sef pou gouvern dapre lalwa.

² Sakenn pou parey en labri kont divan, en refiz kont tanpet, parey bann sours delo dan landrwa sek, parey lonbraz en ros dan dezer.

³ Lizye dimoun ki war kler pou nepli fermen; zorey dimoun ki tande pou reste ouver.

⁴ Dimoun ki pa reflesi pou fer bon zizman; langaz bann ki begeye pou fasil e kler.

⁵ Pou nepli apel en dimoun fou, nob, ni dir en fourb, onorab.

⁶ Akoz bann fou i koz parol ki pa fer okenn sans e zot lespri i mazin fer sa ki mal. Zot fer bann aksyon degoutan, zot parol i ensilte SENYER; zot pa donn manze sa ki pe mor lafen e refiz delo sa enn ki swaf.

⁷ Bann fourb i mazin zis fer dimal; zot prepar bann konplo pour tronp bann pov avek mansonz, menm si en malere i dan son drwa.

⁸ Me dimoun onnet i annan lentansyon nob; son aksyon i drwat.

Zizman ek Restorasyon

⁹ Fanm ki viv en lavi alez! Leve! Ekout mwan! Zot bann zenn fiy ardyese! Ekout mon parol!

¹⁰ Dan ankor en pe plis ki enn an, zot ki annan konfyans dan zot menm, zot pou tranble akoz pou nepli annan rekolt e pou nepli annan rezen.

¹¹ Fanm ki viv en lavi alez! Tranble. Zot ki ardyese! Tranble Tir zot lenz e met lenz dey otour zot leren!

¹² Tap zot pwatrin avek regre lo sa bann zoli plantasyon, lo bann grap ranpli avek rezen.

¹³ Plere lo later mon pep, kot zis zarbis pikan ki pouse. Plere dan bann lakaz kot dimoun i ere e dan bann lavil ki ti anfet.

¹⁴ Ou pale pou ganny abandonnen; ou lavil anfet pour ganny dezerte; ou kolin ek son bann tour pour vin en kavern pour touzour. La, bourik sovaz pou kontan vini e bann troupo pou vin manz zerb,

¹⁵ ziska zour Lespri sorti lao dan lesyel ava desann lo nou. Alor, dezer pou vin en plantasyon fri, en verze ki vin parey en lafore.

¹⁶ Alor, ladrwatir pou reste dan dezer e lazistis pou enstal li dan plantasyon fri.

¹⁷ Lazistis pou anmenn lape. Lazistis pou anmenn trankilite ek sekirite pour touzour.

¹⁸ Mon pep ava reste dan sekirite, kot i annan lape; dan bann landrwa sir, kot i ava kapab repoze.

¹⁹ Lafore pou disparet anba lagrel e lavil pou ganny aplati konpletman.

²⁰ Dimoun ki'n senmen tou dilon bann larivyer pou ere. Zot bef ek zot bourik pou reste lib.