Ezai 23 - Labib An Kreol Seselwa

Mesaz lo Tir

¹ En mesaz konsernan Tir. Bann navir Tarsis, irle! Zot por in ganny detri. Zot ti ganny sa nouvel ler zot ti retournen sorti Sip.

² Bann zabitan lakot! Reste trankil. Zot, bann marsan Sidon ki anvoy bann negosyan travers lanmer!

³ Zot al lot kote lanmer ki for pour fer komers avek tou sa ki ganny rekolte obor Nil. Zot in vin ris lo komers avek bann nasyon.

⁴ Sidon! Ou ki fortifikasyon lanmer! Ou fer onte. Fon lanmer pe koze: Zanmen mon'n ganny douler lakousman; Zanmen mon ganny zanfan. Mon pa'n swanny garson ni elve bann zenn fiy.

⁵ Kan Lezip pou aprann nouvel ki'n arive avek Tir, i pou tranble.

⁶ Travers lanmer ziska Tarsis! Bann zabitan lakot! Kriye.

⁷ Sanmenm sa zot lavil ki ti vivan, ki egziste depi byen lontan; ki ti anvoy son bann zabitan etabli zot dan bann pei etranze?

⁸ Lekel ki'n prepar sa plan kont Tir e ki ti donn bann lerwa zot kouronn? Son bann marsan ti bann sef. Son bann negosyan ti ganny respekte lo later?

⁹ SENYER liniver ki ti mont sa plan pour detri lorgey bann ki gran, pour fer kanmi tou bann sef ki lo sa later.

¹⁰ Zabitan Tir! Al kiltiv later; ou por in disparet.

¹¹ SENYER in lev son lanmen lo lanmer; in sekwe bann rwayonm. SENYER in donn lord detri bann fortifikasyon bann Kananeen.

¹² In dir: Zabitan Sidon pou nepli fer lafet. Ou parey en zenn fiy ki'n ganny vyole. Leve! Al Sip. Menm laba, ou pa pou ganny okenn repo.

¹³ Get pei bann Kaldeen: Sa pep nepli egziste! Bann Asiriyen ti'n fer li vin en pei zannimo sovaz. Zot ti konstri bann tour pour sirveyans. Zot ti detri son bann pale. Zot in fer li vin en ta debri.

¹⁴ Navir Tarsis! Irle. Ou bann refiz in ganny detri.

¹⁵ Apartir sa zour, lavil Tir pou ganny oubliye pandan 70 an, longer lavi en lerwa. Apre 70 an, Tir pou vin parey sa prostitye dan sanson:

¹⁶ Ou prostitye ki'n ganny rezete! Pran en laarp, fer letour lavil. Zwe bann zoli melodi. Sant en kantite sanson pour ki dimoun i rapel ou.

¹⁷ Apre 70 an, SENYER pou entervenir. Tir pou retourn dan son trafik. I pou vann son lekor avek tou bann rwayonm lo later.

¹⁸ Son bann marsandiz ek son lapey ava ganny konsakre pour SENYER. Son bann benefis pa pou ganny anmase, ni ganny met an rezerv. Me son bann marsandiz pou servi pour byen nouri e byen abiy bann ki viv dan prezans SENYER.