Ezai 2 - Labib An Kreol Seselwa

Lape pour Touzour

¹ La sa ki Ezai, garson Amoz ti war, konsernan Zida ek lavil Zerizalenm:

² Dan lavenir, montanny kot tanp SENYER ti ete, pou vin pli o parmi tou bann montanny; i pou pli o ki bann kolin. Tou bann nasyon pou al ver li.

³ Bokou pep pou vin dir: Vini! Annou mont lo montanny SENYER. Annou al kot tanp Bondye Zakob. La, i ava fer nou konn son semen; nou ava swiv li. Annefe, lansennyman Bondye i sorti dan Siyon, e parol SENYER i sorti dan Zerizalenm.

⁴ I pou rann zizman ant bann nasyon e donn konsey en kantite pep. Zot ava fer avek zot lepe zouti ki kiltiv later, servi zot lans koman en sekater pour tay brans. Nasyon pa pou pran zarm kont en lot; zot pou nepli aprann fer lager.

⁵ Desandan Zakob! Vini! Annou mars dan lalimyer SENYER! Larogans pou ganny detri.

⁶ Desandan Zakob! Ou'n abandonn ou pep. Pei i ranpli avek mazik ek siperstisyon ki sorti dan Les, en kantite, parey kot bann Filisten; zot fer konpromi avek bann etranze.

⁷ Zot pei i ranpli avek larzan ek lor; pa posib kont zot larises. Zot pei i ranpli avek en kantite seval, pa posib kont zot bann kales lager.

⁸ Zot pei i ranpli avek fo bondye. Zonm i prosternen devan zidol ki zot in fabrike avek zot lanmen, sa ki zot in fer avek zot prop ledwa.

⁹ Pour sa rezon, dimoun i ganny imilye; zot tou, zot ganny abese. Pa pardonn zot.

¹⁰ Al dan bann kap ros e kasyet zot anba later, lwen avek lafreyer SENYER, lwen avek laglwar son pwisans.

¹¹ Lizye dimoun arogan pou ganny abese; bann orgeye pou ganny imilye. Sa zour, zis SENYER ki pou ganny egzalte.

¹² Annefe, SENYER liniver in gard son zour pour li azir kont bann ki fyer e vantar, ler i pou abes sa bann ki krwar zot siperyer.

¹³ I pou azir kont bann gran pye sed Liban e bann pye dibwa Basann;

¹⁴ kont tou bann gran montanny e kont bann gran kolin;

¹⁵ kont tou bann tour e kont tou bann for;

¹⁶ kont bann gro navir sorti Tarsis e kont bann zoli bato.

¹⁷ Dimoun orgeye pou ganny imilye; bann ki vantar pou ganny abese. Sa zour, zis SENYER ki pou ganny rekonnet pour son grander.

¹⁸ Tou bann zidol pou disparet.

¹⁹ Al dan bann kavern ros e dan bann trou anba later, lwen avek lakoler SENYER, e laglwar son mazeste, ler i pou leve pour sekwe later.

²⁰ Sa zour, dimoun pou zet avek bann tang ek bann sovsouri, bann zidol annarzan e annor fer par zot menm pour adore.

²¹ Zot pou antre dan bann kavern ros e dan bann trou dan later pour zot sove devan lakoler SENYER e laglwar son mazeste, ler i pou leve pour sekwe later.

²² Pa pran ka pour imen; i annan zis en souf dan son nennen. I pa vo nanryen.