Ezai 10 - Labib An Kreol Seselwa

¹ Maler lo sa bann ki fer bann regleman enzis, ki fer bann lalwa ki pez lo bann sitwayen.

² Zot anpes dimoun ganny lazistis. Zot priv bann pov zot drwa. Zot vol bann vev e depouy bann orfelen!

³ Ki ou pou fer zour pinisyon, kan maler i arive sorti lwen? Kot ou pou taye pou rod led e kote ou pou kit ou larises?

⁴ Ou pou kapab zis akroupi parmi bann prizonnyen, oubyen tonm parmi bann viktim lager. Malgre sa, lakoler SENYER pa kalme; son lebra i kontinyen reste leve.

Senyer I Servi Lerwa Asiri

⁵ Maler lo Asiri! I en roten mon lakoler. Sa baton dan zot lanmen ki montre mon lakoler.

⁶ Mon pe anvoy li kont en nasyon enfidel. Mon pe anvoy li kont en pep ki eksit mon lakoler, pour depouy zot e sezi tou zot byen; ki pou mars lo zot konmsi labou dan semen.

⁷ Me li, pa sa son lentansyon. I pa ni annan sa lide. I pe zis mazin detri e fer disparet otan nasyon posib.

⁸ Annefe, i dir: Eski tou mon bann sef pa vo bann lerwa?

⁹ Eski Kalno pa in pas parey Karkemis? Hamat parey Arpad e Samari parey Damas?

¹⁰ Mon'n kapab met mon lanmen lo bann rwayonm avek bann zidol ki ti annan plis stati ki dan Zerizalenm ek Samari.

¹¹ Gete ki mon'n fer avek Samari ek son bann zidol. Mon pou fer osi avek Zerizalenm ek son bann zidol?

¹² Ler SENYER ava fini tou son travay lo Montanny Siyon e lo Zerizalenm, i pou pini lerwa Asiri pour son larogans ek son lorgey.

¹³ Annefe, sa lerwa in dir: Tou sa ki mon'n fer, se par mon lafors ek mon lasazes, akoz mon entelizan. Mon'n tir frontyer ki separ bann nasyon e mon'n sezi bann trezor. Mon'n tir bann lerwa lo zot tronn parey en toro.

¹⁴ Parey ler ou met ou lanmen dan en nik, mon'n pran larises sa bann pep. Parey ou ranmas dizef ki'n ganny abandonnen, mon'n ranmas tou sa ki lo later e personn pa ti ni bronse ni ouver son labous, ni kriye.

¹⁵ Eski en lars i kapab vant son lekor dan plas sa enn ki servi li? Eski en lasi i kapab fer vantar dan plas sa enn ki servi li? Sa i konmsi roten i fer bouze lebra ki lev li oubyen en baton ki diriz sa lanmen ki mannye li.

¹⁶ Pour sa rezon, Senyer BONDYE liniver pou fer deperi bann gro gerye. En pti labrez pou bril zot laglwar parey en gro dife.

¹⁷ Lalimyer Izrael pou vin en dife; Bondye sen pou vin en laflanm ki pou brile e devor bann zarbis pikan ek bann brousay dan en sel zour.

¹⁸ SENYER pou detri bann lafore konpletman ek bann plantasyon fri. Zot pou parey en malad ki deperi.

¹⁹ I pou reste zis detrwa pye dibwa dan lafore; menm en zanfan ava kapab konte.

En Restan Lepep Pou Retournen

²⁰ Sa zour, en restan Izrael ek bann sirvivan desandan Zakob pou depann lo sa enn ki pe bat zot; me zot ava kont lo SENYER, Bondye sen Izrael.

²¹ En restan pou retournen. Leres lepep pou retourn ver Bondye Pwisan Izrael.

²² Annefe, menm si pep Izrael ti ava osi nonbre ki disab dan bor lanmer, zis en pti restan parmi zot ki pou retournen. Destriksyon in ganny deside; lazistis pou deborde parey en gran larivyer.

²³ Senyer BONDYE liniver pou egzekit destriksyon lo pei antye.

Senyer Pou Pini Asiri

²⁴ Alor, la sa ki Senyer BONDYE liniver i deklare: Mon pep ki viv dan Siyon! Pa bezwen per bann Asiriyen ki bat ou avek roten e lev zot baton kont ou parey bann Ezipsyen ti fer.

²⁵ Akoz dan en pti pe letan, mon pou aret ankoler kont ou e mon pou detri zot.

²⁶ SENYER liniver pou lev son roten kont Asiri, parey i ti fwet Madyann lo Ros Horeb; i pou lev son baton lo lanmer; i pou lev li parey i ti fer Lezip.

²⁷ Sa zour, son fardo ki lo ou zepol pour ganny tire, e sa pwa ki lo ou likou pour ganny detri.

Lennmi I Atake

²⁸ Zot pas pre avek Ayat. Zot pas dan Migronn e kit zot bagaz Mikmas.

²⁹ Zot in pas dan semen etrwat; zot in pas lannwit Geba. Zabitan Rama pe tranble. Zabitan Gibea, lavil Sail, pe sove.

³⁰ Zabitan Galim! Plere! Laisa! Port atansyon! Anatot! Reponn li!

³¹ Zabitan Madmena pe sove. Zabitan Gebim pe rod maske zot.

³² Sa menm zour, lennmi pou aret dan lavil Nob i lev koudpwen anler kont montanny Siyon, kont kolin Zerizalenm.

³³ Senyer BONDYE liniver pou kas bann brans avek vyolans. I pou koup bann gran pye dibwa. Bann pli gran pye pou ganny zet ater.

³⁴ Avek en lars, i pou koupay bann zarbis dan lafore e bann zoli pye sed Liban pou ganny zet ater.