Ezai 1 - Labib An Kreol Seselwa

¹ Vizyon ki Ezai, garson Amoz ti war konsernan rwayonm Zida ek lavil Zerizalenm dan bann lepok ki Ozyas, Zotanm, Akaz ek Ezekyas ti lerwa Zida.

Bondye i Reprimann Son Pep

² Lesyel ekoute! Later tande! SENYER ki koze: Mon'n elve zanfan, mon'n fer zot grandi, me zot in revolte kont mwan.

³ En bef i konn son met, en bourik i konn manzwar kot son met i donn li manze; me Izrael pa konn mwan; mon pep pa konpran.

⁴ Maler! Nasyon koupab: Pep sarze avek krim, ras ki fer sa ki mal, zanfan koronpi. Zot in abandonn SENYER. Zot in mepriz Bondye Sen Izrael. Zot in tourn zot ledo avek li e zot kontinyen revolte!

⁵ Akoz ou rod ganny bate ankor? Akoz ou kontinyen revolte? Ou latet i malad e ou leker i soufer.

⁶ Depi lipye ziska latet, napa nanryen ki dan en bon leta. Partou i annan boubou ek blesir ki pe sennyen, e ki personn pa'n netwaye, ni panse, oubyen kalme avek delwil.

⁷ Ou pei in ganny devaste, ou bann lavil in brile. Bann etranze pe devor ou later lanmenm devan ou lizye. Ou bann plantasyon in ganny detri; lennmi in vir li anba lao.

⁸ Zis Zerizalenm ki reste. I parey en kabann dan plantasyon rezen, en labri dan plantasyon kokonm, en lavil anserkle par lennmi.

⁹ Si SENYER liniver pa ti'n les detrwa sirvivan, nou ti ava'n pas parey lavil Sodonm, nou ti ava'n pas parey lavil Gomor.

¹⁰ Dirizan Sodonm! Ekout parol SENYER! Pep Gomor! Ekout lansennyman nou Bondye!

¹¹ SENYER i'n deklare: Ki mon annan pour fer avek tou zot kantite sakrifis? Mon'n ganny ase avek sakrifis konplet bann mouton mal e avek lagres bann zannimo ki'n ganny angrese; ni disan toro, ni disan zenn mouton, ni disan bouk pa fer mwan plezir.

¹² Lekel ki'n demann ou vin dan mon prezans, dan lakour mon tanp.

¹³ Aret anmenn bann lofrann i initil. Loder lansan i degoutan. Mon nepli kapab siport zot bann lafet nouvellin; bann saba e bann konvokasyon solannel ki melanze avek mesanste.

¹⁴ Mon deteste zot bann lafet nouvellin ek zot bann rasanbleman. Tousala in vin en fardo pour mwan; mon nepli kapab siporte.

¹⁵ Ler zot lev zot lanmen ver mwan, mon pou ferm mon lizye. Menm si zot fer bokou lapriyer, mon pa pou ekoute; zot lanmen i ranpli avek disan.

¹⁶ Lav zot! Pirifye zot! Tir sa bann move keksoz devan mwan. Aret fer sa ki mal.

¹⁷ Aprann fer sa ki byen, rod lazistis, sov sa enn ki ganny kraze; defann bann orfelen, pran ka avek bann vev.

¹⁸ SENYER in deklare: Aprezan vini, annou diskite: Si zot bann pese i rouz, zot pou vin blan parey lannez. Menm si zot rouz fonse, zot pou vin blan parey lalenn.

¹⁹ Si zot aksepte obeir mwan, zot ava manz bann pli bon prodwi dan sa pei.

²⁰ Me si zot refize, si zot persiste dan zot revolt kont mwan, zot pou ganny devore. Labous SENYER in deklare.

Lavil Pese

²¹ Koman eski sa lavil ki ti fidel in vin en prostitye? La kot ti annan respe pour lazistis ek ladrwatir, aprezan sa lavil i ranpli avek kriminel.

²² Ou larzan in perdi tou son valer; ou diven in ganny koupe avek delo.

²³ Ou bann sef in vin rebel; zot konplis avek voler. Zot tou zot kontan pran gous. Zot tou zot kontan kado. Zot pa defann bann orfelen. Zot pa ekout ka bann vev.

²⁴ La sa ki SENYER Bondye liniver, BONDYE Toupwisan Izrael i deklare: Maler! Mon pou revanz lo mon bann lennmi. Mon pou tourn kont mon bann ladverser.

²⁵ Mon pou vir kont ou. Mon pou pirifye ou dan dife, mon pou tir tou ou bann lenpirte.

²⁶ Mon pou retabli ou bann ziz parey lontan ou bann konseye parey avan. Alor, ou pou ganny apele: Lavil lazistis. Lavil fidel.

²⁷ Zerizalenm pou ganny sove par lazistis. Son bann zabitan ki repanti, pou ganny sove par lazistis.

²⁸ Me bann rebel ek bann peser pou ganny detri ansanm; bann ki abandonn SENYER pou ganny pini.

²⁹ Alor, bann pye dibwa sakre ki zot ti adore pou fer zot onte; zot pou kanmi avek zot bann zarden sakre ki zot ti fer.

³⁰ Annefe, zot pou vin parey sa bann pye dibwa ki'n perdi zot fey; parey en zarden kot nepli annan delo.

³¹ Bann zonm for pou vin parey lapay; zot bann aksyon parey zekli dife, san ki personn ava kapab tennyen. Tou le de, zot pou bril ansanm. Personn pa pou kapab tenny zot.