Esdras 10 - Labib An Kreol Seselwa

Bann Zwif I Fer Ale bann Fanm Etranze

¹ Letan Esdras ti pe priye e konfes son pese an pleran devan tanp Bondye, en gran lafoul dimoun: Zonm, fanm, ek zanfan sorti parmi pep Izrael antye, ti rasanble otour li, e zot ti plere asodlarm.

² Alor, Sekanya, garson Yeyel en desandan Elanm, ti dir Esdras, “Nou'n komet en fot grav anver nou Bondye e nou'n marye avek bann fanm etranze ki sorti parmi popilasyon sa pei. Malgre sa, i annan ankor lespwar pour Izrael lo sa size.

³ Annou fer en lalyans avek nou Bondye e fer ale tou sa bann fanm etranze ek zot bann zanfan. Konmsa, nou ava swiv ou konsey ki ou, ek tou bann ki annan respe pour komannman nou Bondye in donnen. Annou fer tou dapre lalwa.

⁴ Leve, akoz sa zafer i konsern ou. Nou avek ou. Pran kouraz e fer li!”

⁵ Esdras ti leve. I ti fer bann gran-pret, bann levit ek Izrael antye, fer en serman konmkwa zot ava azir parey zot in dir. Zot tou, zot ti fer sa serman.

⁶ Apre, Esdras ti sorti kot i ti ete devan tanp Bondye e al pas lannwit dan en lasanm kot Yohanann, garson Eliasib. I pa ti ni manze, ni bwar, akoz i ti an dey pour bann move aksyon ki bann ansyen deporte ti'n komet.

⁷ Zot ti fer sirkil en proklanmasyon atraver Zerizalenm e dan pei Zida, pour demann tou bann ansyen deporte rasanble Zerizalenm.

⁸ Dapre lord bann sef ek bann ansyen, sa enn ki pa vini dan trwa zour, son propriyete pou ganny konfiske, e li, i pou ganny pouse dan kominote bann deporte.

⁹ Tou bann zonm Zida ek Benzamen ti rasanble Zerizalenm pandan trwa zour. Sa ti ariv le 20, dan nevyenm mwan. Lepep antye ti rasanble devan tanp Bondye; zot ti tranble akoz sa zafer e akoz ti annan gro lapli.

¹⁰ Pret Esdras, ti debout. I ti dir zot, “Zot in komet en fot grav kan zot ti marye avek bann fanm etranze e zot in agrav tor Izrael.

¹¹ Aprezan, rekonnet zot fot devan SENYER, Bondye zot zanset, e fer son volonte. Separ zot avek pep sa pei e avek bann fanm etranze”.

¹² Lasanble antye ti reponn byen for, “Dakor! Nou ava fer parey ou'n dir.

¹³ Me, pep Izrael i nonbre, e nou dan sezon lapli. I pa posib reste isi deor. Apre tou, sa i pa en travay enn oubyen de zour, akoz i annan en kantite nou ki dan sa menm sityasyon.

¹⁴ Nou propoze ki nou bann sef i reprezant nou dan sa lasanble: Tou bann Izraelit ki'n marye avek en fanm etranze, ava vin prezant zot devan sa bann sef. Dan letan ki ava ganny fikse, zot ava rankontre bann ansyen ek bann ziz zot lavil, ziska ki lakoler Bondye kont nou konsernan sa zafer, i pase.”

¹⁵ Zonatan, garson Asael, ek Yazya, garson Tikva pa ti dakor. Zot ti ganny siporte par Mesoulanm, ek levit Sabetai. Zis zot ki ti opoz sa desizyon.

¹⁶ Bann deporte ti fer parey zot ti'n deside. Zot ti swazir pret Esdras ek bann sef fanmir, dapre klan; tou ti ganny swazir par zot non. Zot ti rasanble premye zour, dan dizyenm mwan, pour egzamin sa problenm.

¹⁷ E premye zour, dan premye mwan, zot ti'n fini avek zafer bann zonm ki'n marye avek bann fanm etranze.

Bann Zonm ki Annan Fanm Etranze

¹⁸ Parmi bann pret, ti annan ki ti'n marye avek fanm etranze: Bann garson Zozye, garson Yosadak, ek son bann frer, Maseya, Eliezer, Yarib, ek Gedalya.

¹⁹ Zot ti promet pour fer ale zot fanm e ofer en mouton mal koman sakrifis pour pardon zot fot.

²⁰ Parmi bann garson Imer, ti annan Hanani ek Zebadya.

²¹ Parmi bann garson Arim: Maseya, Eli, Semaya, Yeyel, ek Ozyas.

²² Parmi bann garson Pasour: Eliohenai, Maseya, Ismael, Netaneel, Yozabad, ek Eleasa.

²³ Parmi bann Levit: Yozabad, Simei, Kelaya, ki ti osi apel Kelita, Petahya, Zida, ek Eliezer.

²⁴ Parmi bann santer: Eliasib; parmi bann gardyen laport: Saloum, Telenm, ek Ouri.

²⁵ Parmi bann Izraelit, ti annan bann garson Paros: Ramya, Yisiya, Malkiya, ek Benaya.

²⁶ Parmi bann garson Elanm: Matanya, Zakari, Yeyel, Abdi, Yeremot, ek Eli.

²⁷ Parmi bann garson Zatou: Eliohenai, Eliasib, Matanya, Yeremot, Zabad, ek Aziza.

²⁸ Parmi bann garson Bebai: Yohanann, Hananya, Zabai, ek Atlai.

²⁹ Parmi bann garson Bani: Mesoulanm, Malouk, Adaya, Yasoub, Seal, ek Yeremot.

³⁰ Parmi bann garson Pahat-Moab: Adna, Kelal, Benaya, Maseya, Matanya, Besalel, Binoui, ek Manase.

³¹ Parmi bann garson Harim: Eliezer, Yisiya, Malkiya, Semaya, Simeon,

³² Benzamen, Malouk, ek Semaya.

³³ Parmi bann garson Hasoum: Matnai, Matata, Zabad, Elifelet, Yeremai, Manase, ek Simei.

³⁴ Parmi bann garson Bani: Maadai, Anmranm, Ouel,

³⁵ Benaya, Bedya, Kelouhi,

³⁶ Vanya, Meremot, Eliasib,

³⁷ Matanya, Matnai, ek Yaasai.

³⁸ Parmi bann garson Binoui: Simei,

³⁹ Selemia, Natan, Adaya,

⁴⁰ Maknadebai, Sasai, Sarai,

⁴¹ Azarel, Selemia, Semaya,

⁴² Saloum, Amaria, ek Zozef.

⁴³ Parmi bann garson Nebo, ti annan Yeyel, Matitia, Zabad, Zebina, Yadai, Zoel, ek Benaya.

⁴⁴ Tousala ti'n marye avek bann fanm etranze; bokou parmi ti annan zanfan.