Esdras 1 - Labib An Kreol Seselwa

Siris I Donn Permisyon Rekonstri Tanp

¹ Pandan premye lannen renny Siris, lerwa Lapers, SENYER ti realiz parol ki i ti'n prononse par profet Zeremi. I ti met dan lespri Siris, lerwa Lapers, lide pour fer en proklanmasyon e pibliy sa teks swivan partou dan son rwayonm antye:

² La sa ki Siris, lerwa Lapers i proklanmen: SENYER, Bondye lesyel, in donn mwan lotorite lo tou bann rwayonm lo later. In ordonn mwan konstri en tanp pour li Zerizalenm, dan pei Zida.

³ Zot tou ki form parti son pep, Bondye ava avek zot. Mont Zerizalenm, dan Zida e konstri tanp SENYER, Bondye Izrael. Li menm sa Bondye ki dan Zerizalenm.

⁴ Tou bann ki reste, dan nenport landrwa parmi bann pep, mon demande ki bann zabitan i fourni zot avek larzan ek lor, materyo, zannimo ek bann lofrann volonter pour tanp Bondye ki Zerizalenm.

⁵ Alor, bann sef fanmir dan tribi Zida ek Benzamen, bann pret ek bann levit, tou bann ki Bondye ti'n enspir zot avek sa dezir, ti prepar zot pour mont Zerizalenm e rekonstri tanp SENYER.

⁶ Tou bann vwazen ti fourni zot bann lobze annarzan, annor, materyo ek zannimo ek toudsort lobze valer, san kont bann lofrann volonter pour tanp.

⁷ Lerwa Siris ti rann tou bann lobze ki Naboukodonozor ti'n pran dan tanp SENYER, dan Zerizalenm, e ki i ti'n plas dan tanp son bann bondye.

⁸ Siris, lerwa Lapers, ti fer Mitredat ki ti trezorye lerwa, tir tousala, konte e livre zot avek Sesbasar, en sef dan Zida.

⁹ La lenvanter: Pla annor: 30; basen annarzan: 1,000; kouto: 29;

¹⁰ bol annor: 30; bol annarzan: 410; lezot lobze: 1,000.

¹¹ Ti annan an tou, 5,400 lobze annor e annarzan. Sesbasar ti anmenn tousala avek li kan bann egzile ti kit Babilonn pour retourn Zerizalenm.