Eklezyas 3 - Labib An Kreol Seselwa

En Letan pour tou Keksoz

¹ I annan en letan pour tou keksoz; en letan pour sak keksoz anba soley:

² En letan pour ne e en letan pour mor; en letan pour plante e en letan pour rekolte.

³ I annan en letan pour touye e en letan pour gerir; en letan pour demolir e letan pour konstrir.

⁴ I annan en letan pour plere e en letan pour riye; en letan pour plennyen e en letan pour danse.

⁵ I annan en letan pour saboule e en letan pour anmas ros; en letan pour sere e en letan pour reste lwen.

⁶ I annan en letan pour rode e en letan pour perdi; en letan pour garde en letan pour zete.

⁷ I annan en letan pour desire e en letan pour koud; en letan pour reste trankil e en letan pour koze.

⁸ I annan en letan pour kontan e en letan pour deteste; en letan pour lager e en letan pour lape.

⁹ Ki profi en travayer i tire dan son travay?

¹⁰ Mon get lokipasyon ki Bondye in donn bann imen.

¹¹ Bondye i fer keksoz ariv dan son bon moman. Bondye in osi met dan lespri en et imen, dezir pour konn lepase ek lavenir; me imen pa kapab fini konpran tou travay Bondye.

¹² Alor, mon realize: I pli bon pour zonm rezouir e profit lavi dan kontantman.

¹³ I en kado Bondye pour en zonm manze, bwar e pran plezir dan rezilta son travay.

¹⁴ Mon konnen ki tou sa ki Bondye i fer, i reste pour touzour. Napa nanryen pour azoute, ni pour tire. Bondye i azir dan sa fason pour ki dimoun i annan respe pour li.

¹⁵ Sa ki arive ozordi, e sa ki pou arive plitar, in deza arive avan. Bondye i fer bann levennman lepase repete.

Lenzistis dan Lemonn

¹⁶ La sa ki mon'n war ankor anba soley: Dan plas lalwa, i annan mesanste; la kot i devre annan lazistis, la ankor, i annan mesanste.

¹⁷ Mon dir dan mwan menm: Bondye pou ziz bann ki azir byen e bann ki azir mal. I annan en letan pour tou keksoz e i pou ziz tou nou bann aksyon.

¹⁸ Lo size bann et imen, mon krwar ki Bondye i oule teste zot pour fer zot menm war ki zot parey bann zannimo.

¹⁹ Apre tou, sor bann et imen ek sor bann zannimo pa diferan: Enn i mor parey lot, akoz zot annan menm souf lavi, e en et imen pa siperyer ki en zannimo. Tousala i zis vanite

²⁰ Tou lavi i fini dan menm fason: Tou et vivan i sorti dan later e tou i retourn dan later.

²¹ Lekel ki konnen si souf lavi en et imen i monte e si souf en zannimo i desann dan later?

²² Alor, mon krwar ki napa en keksoz pli bon pour en et imen fer, ki zouir fri son bann aktivite; sa i son par. Annefe, personn pa pou fer li retournen pour li war ki pou arive apre li.