Egzod 9 - Labib An Kreol Seselwa

Senkyenm Fleo: Lepidemi dan Troupo

¹ SENYER ti dir Moiz: Al kot Faraon e dir li: La sa ki SENYER, Bondye bann Ebre i deklare: Les mon pep ale pour zot servi mwan.

² Si ou refize les zot ale, si ou gard zot ankor,

³ SENYER pou poz son lanmen lo ou troupo ki dan lakanpanny, lo ou bef, ou seval, ou bourik, ou samo.

⁴ Me SENYER pou fer en distenksyon ant troupo bann Izraelit ek troupo bann Ezipsyen. Napa en sel zannimo bann Izraelit ki pou mor.

⁵ SENYER in fikse en letan: Demen, mon pou azir lo pei antye.

⁶ Lannmen, SENYER ti fer arive sa ki i ti'n dir: Tou troupo bann Ezipsyen ti mor, me dan troupo bann Izraelit, ti napa en sel zannimo ki ti mor.

⁷ Faraon ti fer verifye: Dan troupo bann Izraelit pa ti annan en sel zannimo mor. Malgre sa, leker Faraon ti reste andirsi e i pa ti les pep Izrael ale.

Sizyenm Fleo: Boubou Enkirab

⁸ SENYER ti dir Moiz ek Aaron: Pran detrwa ponnyen lasann dan four; Moiz ava anvoy dan ler devan lizye Faraon.

⁹ Lasann pou vin lapousyer ki pou kouver Lezip; i pou anmenn boubou enfekte lo dimoun e lo zannimo dan Lezip antye.

¹⁰ Alor, zot ti pran lasann dan four e prezant zot devan Faraon; Moiz ti anvoy sa lasann dan lezer e bann boubou enfekte ti leve lo dimoun e lo bann zannimo.

¹¹ Bann mazisyen ti nepli kapab debout devan Moiz, akoz bann boubou. Annefe, sa bann boubou pa ti zis lo bann mazisyen, me osi partou lo lezot Ezipsyen.

¹² SENYER ti andirsi leker Faraon ki pa ti ekout zot, parey SENYER ti'n dir Moiz.

Setyenm Fleo: Gro Lagrel

¹³ SENYER ti dir Moiz: Leve granmaten, e prezant ou devan Faraon. Dir li: La sa ki SENYER, Bondye bann Ebre i deklare: Les mon pep ale pour zot al servi mwan.

¹⁴ Safwasi, mon pou anvoy tou kalite fleo lo ou, lo ou bann serviter e lo ou pep, pour ki ou ava konnen ki lo later antye, napa enn parey mwan.

¹⁵ Aprezan, si mon ti'n lev mon lanmen kont ou, e si mon ti'n anvoy lepidemi, ou ti ava'n fini disparet lo later.

¹⁶ Me si mon'n les ou viv, se pour montre ou mon pouvwar e fer mon non ganny konnen partou lo later.

¹⁷ Ou ankor pe met lobstak kont mon pep e refize les zot ale.

¹⁸ Demen sa menm ler, mon pou anvoy en lapli lagrel terib: En lagrel ki zanmen in deza tonbe lo Lezip depi son fondasyon ziska ozordi.

¹⁹ Aprezan, fer met an sekirite tou ou troupo e tou sa ki ou annan dan lakanpanny; lagrel pou tonm lo tou dimoun ek tou zannimo ki deor dan lakanpanny e ki pa'n ganny anmennen dan bann landrwa kouver e zot pou mor.

²⁰ Bann dimoun dan lantouraz Faraon ki ti annan respe pour parol SENYER ti fer met zot bann serviter ek zot troupo an sekirite dan lakaz.

²¹ Me bann ki pa ti port atansyon parol SENYER, ti les zot lesklav ek zot troupo deor dan lakanpanny.

²² SENYER ti dir Moiz, “Lev ou lanmen ver lesyel pour ki lagrel i tonm partou dan Lezip, lo tou dimoun, zannimo ek plant.”

²³ Moiz ti lev son baton ver lesyel e SENYER ti anvoy loraz, lagrel ek dife lo later. SENYER ti fer en lapli lagrel tonbe lo Lezip.

²⁴ Lagrel, melanze avek dife ti tonbe; sa ti pli terib ki'n deza tonbe dan Lezip antye, depi ki sa nasyon i egziste.

²⁵ Lagrel ti afekte tou keksoz ki ti dan lakanpanny, dimoun koman zannimo, partou dan Lezip. Lagrel ti afekte osi zerb e kas tou pye dibwa dan lakanpanny.

²⁶ Zis dan teritwar Gosenn kot pep Izrael ti reste, ki lagrel pa ti tonbe.

²⁷ Faraon ti fer apel Moiz ek Aaron. I ti dir zot, “Mon'n fer pese safwasi; SENYER ki zis; mwan avek mon pep, nou an tor.

²⁸ Sipliy SENYER pour ki i fer arete loraz ek lagrel. Mon pou les zot ale; nou pa pou gard zot pli lontan.”

²⁹ Moiz ti dir li, “Ler mon pou kit lavil, mon pou lev mon lanmen ver SENYER. Tapaz loraz pou arete e pou nepli annan lagrel. Konmsa, ou ava konnen ki later i pour SENYER.

³⁰ Me mon konnen ki ou ek ou bann serviter, zot pa pou annan ankor respe pour SENYER Bondye.”

³¹ Bann plantasyon len avek lorz ti ganny detri. Lorz ti ankor dan zepi e len ti ankor an fler.

³² Me bann sereal koman dible pa ti gate akoz zot pare plitar.

³³ Alor, Moiz ti sorti kot Faraon dan lavil. I ti lev son lanmen ver SENYER e loraz ek lagrel ti arete. Lapli osi ti arete.

³⁴ Me kan Faraon ti war ki lapli, lagrel, ek loraz ti'n arete, i ti fer menm fot ankor. Son leker ek leker son bann serviter ti andirsi ankor.

³⁵ Alor, leker Faraon ti reste andirsi e parey SENYER ti'n dir par lentermedyer Moiz, i pa ti les pep Izrael ale.