Egzod 24 - Labib An Kreol Seselwa

Lalyans Bondye avek Izrael

¹ SENYER ti dir Moiz, “Mont kot SENYER lo montanny avek Aaron, Nadab, Abihou ek 70 ansyen parmi pep Izrael. Zot ava prosternen depi en bon distans.

² Moiz tousel ava apros kot SENYER; me lezot ava reste lwen; lepep pa pou mont avek li.”

³ Moiz ti vin raport avek lepep tou bann parol SENYER ek tou son bann regleman. Lepep antye ti reponn avek en sel lavwa: Nou pou fer tou sa ki SENYER in dir.

⁴ Moiz ti ekri tou bann parol SENYER. I ti leve granmaten, mont en lotel devan montanny avek 12 ros pilye, enn pour sak tribi Izrael.

⁵ I ti anvoy bann zenn Izraelit ofer sakrifis konplet ek sakrifis lape. Zot ti ofer bann toro pour SENYER.

⁶ Moiz ti pran lanmwatye sa disan e met dan bann bol; i ti asperz lotel avek lot lanmwatye disan.

⁷ Apre, i ti pran liv Lalyans e lir devan lepep. Zot ti dir: Nou pou fer tou sa ki SENYER in dir e nou pou obei li.

⁸ Alor, Moiz ti pran sa disan ki ti dan sa bol. I ti asperz lepep, an dizan: Sa i disan lalyans ki SENYER in fer avek zot dapre tou sa bann parol.

⁹ Apre, Moiz ti mont lo montanny avek Aaron, Nadab, Abihou ek sa 70 ansyen parmi pep Izrael.

¹⁰ Zot ti war Bondye Izrael. Anba son lipye ti annan keksoz ki ti resanble en pave an safir, kouler ble e kler parey lesyel.

¹¹ Bondye pa ti fer ditor okenn parmi bann dirizan pep Izrael. Zot ti kontanple Bondye; apre, zot ti manze e bwar.

Moiz lo Montanny Sinai

¹² SENYER ti dir Moiz, “Mont kot mwan lo montanny e reste la. Mon pou donn ou bann plak ros kot mon'n ekri lalwa ek komannman pour enstri zot.”

¹³ Alor, Moiz ek Zozye son asistan, ti mont lo montanny Bondye.

¹⁴ I ti'n dir avek bann ansyen: Esper nou isi ziska ki nou retournen. Aaron ek Hour ava reste avek zot. Si okenn parmi zot i annan en problenm pour regle, al war zot.

¹⁵ Apre, Moiz ti mont lo montanny; en nyaz ti kouver sa montanny.

¹⁶ Lalimyer prezans SENYER ti reste lo montanny Sinai. En nyaz ti kouver montanny pandan sis zour. Setyenm zour, Bondye ti apel Moiz dan milye nyaz.

¹⁷ Devan lizye pep Izrael, laglwar prezans SENYER lo latet montanny ti parey en dife ki devor sa ki devan li.

¹⁸ Moiz ti penetre dan sa nyaz e i ti mont lo montanny. I ti reste lo montanny pandan 40 zour, 40 nwit.