Egzod 17 - Labib An Kreol Seselwa

Delo I Sorti dan Ros

¹ Pep Izrael ti kit dezer Sin par letap, parey SENYER ti'n ordonn zot. Zot ti al kanp Refidim. Me laba ti napa delo bwar pour lepep.

² Alor zot ti lager avek Moiz. Zot ti dir li, “Donn nou delo pour bwar.” Moiz ti dir zot, “Akoz zot pe lager avek mwan? Akoz zot oule provok SENYER?”

³ Annefe, lepep ti swaf e zot ti mirmire kont Moiz, “Akoz ou'n fer nou sorti Lezip? Eski ou anvi touy nou, nou bann zanfan ek nou zannimo par laswaf?”

⁴ Alor, Moiz ti kriy ver SENYER, “Ki mon pou fer avek sa pep? Zot pre pour saboul mwan avek ros.”

⁵ SENYER ti dir Moiz, “Al devan lepep e pran avek ou bann ansyen dan Izrael; anmenn osi ou baton ki ou ti tap larivyer Nil avek.

⁶ Mon pou debout devan ou lo ros montanny Horeb. Ou ava tap lo sa ros e delo ava sorti ladan e lepep ava bwar.” Moiz ti fer sa devan bann ansyen dan Izrael.

⁷ I ti apel sa landrwa Masa, savedir Provokasyon, ek Meriba, savedir Lager, akoz pep Izrael ti mirmire e provok SENYER an dizan: Eski SENYER i avek nou, oubyen non?

Lager Kont bann Amalesit

⁸ Alor, Amalek ti vin atak pep Izrael Refidim.

⁹ Moiz ti dir Zozye, “Swazir bann zonm kapab, e al lager kont Amalek. Demen, nou ava debout lo latet montanny avek baton SENYER dan lanmen.”

¹⁰ Zozye ti fer parey Moiz ti'n dir li pour al lager kont Amalek. Moiz, Aaron ek Hour ti al lo latet montanny.

¹¹ Kan Moiz ti lev son lanmen, Izrael ti pli for, e kan i ti bes son lanmen, bann Amalesit ti pli for.

¹² Me lebra Moiz ti fatige; zot ti pran en ros e met li asiz lo la. Aaron ek Hour ti tenir son lebra, enn lo sak kote. Alor, son de lebra ti reste anler ziska soley kouse.

¹³ Zozye ti ganny laviktwar lo bann Amalesit ki i ti masakre par lepe.

¹⁴ SENYER ti dir Moiz, “Ekri sa koman en souvenir e fer Zozye konnen ki mon pou fer disparet bann Amalesit konpletman anba lesyel.”

¹⁵ Moiz ti konstri en lotel ki i ti apel SENYER i mon bannyer.

¹⁶ I ti dir, “Akoz en lanmen in leve kont tronn SENYER, SENYER pou touzour fer lager kont bann Amalesit.”