Egzod 1 - Labib An Kreol Seselwa

Bann Izraelit I Ganny Maltrete Lezip

¹ La non bann garson Zakob ki ti al Lezip avek li, ansanm avek zot fanmir:

² Riben, Simeon, Levi ek Zida,

³ Isakar, Zabilon, ek Benzamen,

⁴ Dann en Neftali, Gad ek Aser.

⁵ Sa ti desandan Zakob: 70 an tou. Zozef ti deza Lezip.

⁶ An mezir ki bann lannen ti pase, Zozef ek son bann frer ti mor. Bann desandan sa premye zenerasyon osi ti mor.

⁷ Bann Izraelit ti annan bokou zanfan. Zot ti ranpli Lezip e vin deplizanpli tre for.

⁸ En nouvo lerwa ki pa ti'n konn Zozef ti mont lo tronn Lezip.

⁹ I ti dir son pep, “Pep Izrael i pli nonbre e pli for ki nou.

¹⁰ Nou bezwen azir avek lasazes anver zot, pour ki zot pa ogmante. Si en lager i deklare, zot ava kapab zwenn avek nou bann lennmi pour lager kont nou, apre sove dan pei.”

¹¹ Alor, bann Ezipsyen ti apwent bann sirveyan sever pour kraz zot avek travoforse. Konmsa ki bann Izraelit ti konstri lavil Pitonm ek Ranmses pour gard rezerv manze pour Faraon.

¹² Me pli zot ti ganny kraze, plis popilasyon Izraelit ti ogmante e fannen dan Lezip antye. Bann Ezipsyen ti per bann Izraelit.

¹³ Alor, zot ti soumet bann Izraelit dan en travay lesklav.

¹⁴ Zot ti rann zot lavi anmer dan lesklavaz par travay mortye ek brik, e tou kalite lezot travay dan plantasyon. Zot ti ganny forse fer bann travay dir, san pitye.

¹⁵ Lerwa Lezip ti koz osi avek Sifra ek Poua, sa de sazfanm bann Ebre. I ti dir zot,

¹⁶ “Kan zot ava pe asiste en fanm Ebre dan lakousman, si i ganny en pti garson, touy li; me si i ganny en pti fiy les li viv.”

¹⁷ Me bann sazfanm ti annan respe pour Bondye e zot pa ti fer sa ki lerwa Lezip ti'n dir zot; zot ti les bann garson viv.

¹⁸ Alor, lerwa Lezip ti fer apel bann sazfanm. I ti dir zot, “Akoz zot in azir konmsa? Akoz zot in les bann garson viv?”

¹⁹ Bann sazfanm ti reponn Faraon, “Bann fanm Ebre pa parey bann fanm Ezipsyen; zot bokou pli for. Alor, zot zanfan in fini ne avan ki nou arive.”

²⁰ Bondye ti beni bann sazfanm e lepep ti vin pli nonbre e tre for.

²¹ Akoz bann sazfanm ti annan respe pour Bondye, i ti beni zot prop fanmir.

²² Alor, Faraon ti donn sa lord lepep antye, “Zot devre zet dan larivyer Nil, tou pti garson Izraelit ki ne; zot ava les viv tou bann pti fiy.”