Efezyen 5 - Labib An Kreol Seselwa

Viv dan Lalimyer

¹ Imit Bondye! Zot ki son bann zanfan ki i kontan.

² Viv dan lanmour, parey Kris in kontan nou e donn son lavi pour nou, koman en lofrann e en sakrifis ki fer plezir Bondye.

³ Zot fer parti pep Bondye. Par konsekan, veye ki tou form imoralite seksyel, lavi dezordonnen ek lanvi, pa menm ganny mansyonnen parmi zot.

⁴ I pa byen osi ki zot servi langaz obsenn, parol grosye e vilger. Zot devre plito montre Bondye zot rekonesans dan lapriyer.

⁵ Zot devre konnen ki napa personn ki pe anmenn en lavi imoral, sal, e avar (lavaris se idolatri) ki pou ganny en plas dan Rwayonm Kris ek Bondye.

⁶ Pa les personn tronp zot par bann fo rezonnman. Bann fot parey ki fer lakoler Bondye monte kont bann ki refize obei li.

⁷ Alor, pa bezwen frekant bann dimoun parey.

⁸ Lontan zot ti viv dan fernwanr; me aprezan, zot in vin lalimyer ini avek Senyer. Alor, mars koman zanfan lalimyer,

⁹ akoz lalimyer i prodwi bokou kalite: Labonte, ladrwatir, ek laverite.

¹⁰ Konn disern sa ki fer plezir Senyer.

¹¹ Pa asosye zot avek bann aksyon initil, ki ganny fer zis dan fernwanr. Plito, ekspoz zot dan lalimyer.

¹² I vreman fer onte, menm pour koz lo sa bann keksoz, ki serten i fer an sekre.

¹³ Me kan tou sa bann aksyon ava ganny ekspoze dan lalimyer, zot vre natir pou ganny revele klerman.

¹⁴ Annefe, tou sa ki'n ganny klerman revele i vin lalimyer. Pour sa rezon nou dir: Ou ki pe dormi! Reveye! Leve parmi bann mor! Kris ava ekler ou.

¹⁵ Alor, fer byen atansyon ki mannyer zot viv. Pa viv koman bann dimoun inyoran, me koman bann ki saz.

¹⁶ Servi byen tou bann lokazyon ki prezant devan zot, akoz sa letan ki nou pe viv ladan i move.

¹⁷ Pour sa rezon, pa bezwen viv koman bann fou, me fer tou zot posib pour zot konpran koman Senyer i oule zot azir.

¹⁸ Pa bezwen soul zot avek diven, akoz sa pou zis antrenn zot dan en lavi dezordonnen. O kontrer, zot devre ranpli avek Lespri Sen.

¹⁹ Ankouraz kanmarad par bann psonm, par bann kantik enspire. Sante e remersye Senyer avek tou zot leker.

²⁰ Lo non nou Senyer Zezi-Kri, remersye Bondye, nou Papa toultan pour tou.

Koman Mari ek Fanm I Devre Viv

²¹ Par respe ki zot annan pour Kris, obei kanmarad.

²² Bann fanm! Zot devre obei zot mari, parey zot obei Senyer.

²³ Annefe, en mari i sef son fanm parey Kris i sef Legliz. Kris i sover Legliz ki son lekor.

²⁴ Annefe, parey Legliz i obei Kris, bann fanm i devre touzour obei zot mari.

²⁵ Zot, bann mari! Kontan zot fanm parey Kris in kontan Legliz, e in donn son lavi pour li.

²⁶ I'n fer sa pour konsakre Legliz pour Bondye, apre ki i'n pirifye li par delo ek laparol.

²⁷ I'n oule prezant Legliz devan li sen, san defo, san okenn tas, ni rid, dan laperfeksyon total.

²⁸ Bann Mari! Zot devre alor, kontan zot fanm parey zot kontan zot prop lekor. Sa enn ki kontan son fanm, i kontan son prop lekor.

²⁹ Napa personn ki'n deza ay son prop lekor. O kontrer, i nouri li e pran byen swen avek li, parey Kris i fer pour Legliz.

³⁰ Annefe, nou tou, nou manm son lekor.

³¹ Parey Lekritir i deklare: Pour sa rezon, en zonm i kit son papa ek son manman pour viv avek son fanm e tou le de zot vin en sel.

³² I annan en gran laverite ki'n kasyet dan sa pasaz Lekritir. Mon dir ki i aplik avek Kris ek Legliz.

³³ Me i osi aplik pour zot: Fodre ki sak mari i kontan son fanm parey son prop lekor e ki sak fanm i annan respe pour son mari.