Efezyen 3 - Labib An Kreol Seselwa

Travay Pol pour bann Non-Zwif

¹ Pour sa rezon, mwan Pol, mon prizonnyen Zezi-Kri pour zot, bann non-Zwif.

² Zot in sirman antann koz lo sa misyon ki Bondye dan son bonte, in sarz mwan pour fer dan zot faver.

³ Dan en revelasyon, Bondye in fer mwan konn son plan sekre. Mon'n deza ekri detrwa mo lo sa size.

⁴ Kan zot ava lir li, zot ava realize zot menm konnesans ki mon'n gannyen lo sa plan sekre konsernan Kris.

⁵ Dan letan pase, en tel sekre pa ti ganny kominike avek bann imen. Me par son Lespri, Bondye in aprezan revel li avek son bann zapot ek son bann profet ki'n ganny konsakre pour Bondye.

⁶ Sa sekre, se ki par mwayen Bonn Nouvel, bann non-Zwif i osi destinen pour ganny en par dan menm leritaz ki Bondye in rezerve pour son pep. Zot manm en menm lekor e zot osi, zot benefisye dan menm promes ki Bondye in fer dan Zezi-Kri.

⁷ Mon'n vin serviter Bonn Nouvel par en don spesyal ki Bondye, dan son labonte, par laksyon son pouvwar, in donn mwan.

⁸ Mon pli pti parmi tou bann krwayan. Pourtan, Bondye in donn mwan sa privilez pour anons bann non-Zwif, larises Kris ki san limit.

⁹ Mon bezwen osi fer kler pour tou dimoun, ki mannyer Bondye pou realiz son plan mister. Bondye ki Kreater lemonn, in touzour gard sa mister.

¹⁰ Konmsa, gras a Legliz, bann lanz, bann lotorite ek pwisans dan lesyel ava kapab konn lasazes Bondye dan son diferan form.

¹¹ Bondye in azir dapre son plan eternel ki i'n realize par Zezi-Kri nou Senyer.

¹² Ini avek Kris e par nou lafwa dan li, nou annan sa liberte pour prezant nou devan Bondye ranpli avek konfyans.

¹³ Alor, mon demann zot pa bezwen dekouraze akoz bann soufrans ki mon pe andire pour zot tou: I pour zot prop laglwar.

Lanmour Kris

¹⁴ Pour sa rezon, mon tonm azenou devan nou Papa,

¹⁵ kot ki tou fanmir dan lesyel e lo later zot tir zot non.

¹⁶ Mon priy Bondye ki, dan larises son laglwar, i fortifye zot par pwisans son Lespri,

¹⁷ e ki Kris ava reste dan zot leker par lafwa. Mon priye ki zot ava ganny anrasinen e byen etabli dan lanmour,

¹⁸ pour ki ansanm avek pep Bondye antye, zot ava kapab konpran larzer, longer, oter e profonder lanmour Kris.

¹⁹ Mon demande ki zot kapab konn lanmour Kris pour nou, menm si i depas tou konnesans imen. Konmsa, zot ava ranpli avek tou larises Bondye.

²⁰ Anver sa enn ki annan pouvwar fer bokou plis ki sa ki nou demande, oubyen mazinen, par son pwisans ki azir dan nou,

²¹ nou rann li glwar dan Legliz, e par Zezi-Kri, dan tou zenerasyon, e pour touzour! Amenn.