Efezyen 2 - Labib An Kreol Seselwa

Resisite avek Kris

¹ Otrefwa, zot ti'n spirityelman mor akoz zot bann fot, e akoz zot bann pese.

² Zot ti pe viv dapre mannyer lemonn. Zot ti pe obeir sef bann pwisans dan lespas, sa menm lespri ki aprezan pe travay dan dimoun ki pe opoz Bondye.

³ Nou tou, nou ti parey zot avan: Nou ti pe viv dapre pasyon nou prop natir; nou ti swiv bann dezir nou lekor ek nou lespri. Pour sa rezon, par natir, nou ti bann zanfan lakoler parey tou lezot imen.

⁴ Me, dan son gran konpasyon e son gran lanmour pour nou,

⁵ alor ki nou ti'n mor spirityelman akoz nou fot, Bondye ti fer nou reviv avek Kris. Par son lagras ki zot in ganny sove.

⁶ I'n resisit nou avek li, pour fer nou renny ansanm avek li dan lesyel, avek Zezi-Kri.

⁷ I ti fer sa pour montre pour bann syek plitar, larises ekstraordiner son lagras par labonte ki i'n montre pour nou dan Zezi-Kri.

⁸ Annefe, par lagras ki zot in ganny sove, e akoz zot annan lafwa. Sa, pa rezilta zot prop zefor, me i en don Bondye.

⁹ I pa rezilta zot bann aksyon. Konmsa, personn pa kapab vant son lekor.

¹⁰ Annefe, Bondye ki'n form nou; i'n kre nou ini avek Zezi-Kri pour nou akonpli bann bonn aksyon ki Bondye in prepare davans, pour nou met zot an pratik.

Ini avek Kris

¹¹ Alor rapel zot sa ki zot ti ete otrefwa: Zot pa bann Zwif de nesans. Bann Zwif i tret zot koman bann ensirkonsi, me zot apel zot lekor bann sirkonsi. Sa i zis akoz en loperasyon ki ganny fer dan zot laser.

¹² Rapel zot ki dan sa letan, zot ti separe avek Kris. Zot ti bann etranze ki pa ti fer parti pep Izrael. Zot pa ti annan okenn par dan lalyans baze lo promes Bondye. Zot ti pe viv dan lemonn san okenn lespwar e san Bondye.

¹³ Me aprezan, ini avek Kris, zot ki ti lwen avek li, zot in ganny raprose avek li, par son lanmor.

¹⁴ Annefe, Kris li menm ki'n anmenn lape pour nou an fezan bann Zwif ek bann non-Zwif en sel pep. Ler i ti sakrifye son lekor, i'n kraz sa miray ki ti separ zot e ki ti gard zot koman lennmi.

¹⁵ I'n anil lalwa Zwif avek son bann komannman ek regleman, pour ki sa de ras i form en sel pep, ini avek li. Konmsa, i'n etabli lape.

¹⁶ Par son lanmor lo lakrwa, Kris i'n reini sa de pep pour form en sel lekor e in rekonsilye zot avek Bondye. Par lakrwa, in detri laenn.

¹⁷ Kris in alor vin anons Bonn Nouvel lape pour tou dimoun: Pour zot bann non-Zwif, ki ti lwen avek Bondye, e pour bann Zwif ki ti pre avek li.

¹⁸ Annefe, par Kris, nou tou, Zwif e non-Zwif, nou kapab prezant nou devan Bondye avek led sa menm Lespri Sen.

¹⁹ Par konsekan, zot bann non-Zwif, zot nepli bann etranze, ni bann egzile. Me zot aprezan bann konsitwayen, manm pep Bondye, e zot form parti lafanmir Bondye.

²⁰ Zot osi, zot form parti sa konstriksyon ki annan bann zapot ek bann profet pour fondasyon, avek Zezi-Kri li menm koman premye pyer.

²¹ Zezi-Kri li menm ki tenir ansanm sa batiman antye e permet li grandi pour form en tanp sen, konsakre pour Senyer.

²² Ini avek li, zot osi, zot form parti sa konstriksyon pour ki ansanm avek tou lezot, zot vin en lakaz kot Bondye i kapab reste par son Lespri.