Ebre 9 - Labib An Kreol Seselwa

Ladorasyon dan Ansyen e dan Nouvo Lalyans

¹ Sa premye lalyans ti annan son bann regleman konsernan ladorasyon ek en sanktyer ki lo later.

² En latant ti ganny enstale. Dan son premye parti, latant eksteryer ki ti apel landrwa Sen, ti annan portlanp, latab ek dipen pour lofrann.

³ Deryer dezyenm rido ti annan en latant ki ti apel Lasal Tre Sen.

⁴ La, ti annan lotel annor kot ti bril lansan, ek Kof lalyans ki ti kouver antye avek lor. Ladan, ti annan en resipyan annor kot ti annan lamann, baton Aaron ki ti'n fleri, ek sa de plak ros kot lalyans in grave.

⁵ Lo kouvertir Kof Lalyans, ti annan de Seriben dan zot laglwar. Avek lonbraz zot lezel, zot ti kouver Kof. Me la pa ler pour antre dan detay.

⁶ Kan tou ti'n ganny enstale, tou le zour, bann pret ti antre dan premye parti latant pour akonplir zot servis.

⁷ Me zis Gran-Pret ki ti penetre dan dezyenm parti e zis en fwa par an. I ti bezwen antre avek disan ki i ti dabor ofer devan Bondye pour pardon son pese, answit pour pardon pese lepep.

⁸ Par la, Lespri Sen ti montre ki semen pour antre dan sanktyer, pa ti lib, osi lontan ki sa premye sanktyer ti ankor la.

⁹ Sa ti en senbol ki reprezant letan prezan: Savedir ki bann lofrann ek sakrifis zannimo pa ti kapab rann parfe leker sa adorater.

¹⁰ Sa bann rityel ti konsern zis manze, bwar ek seremoni pirifikasyon, ki ti valab an atandan ki tou ava ganny renouvle.

¹¹ Me Kris in vini koman Gran-Pret bann bon keksoz ki'n arive. I'n penetre dan en latant ki meyer e pli parfe, ki pa'n fer par zonm e ki pa form parti sa kreasyon.

¹² I'n antre en fwa pour tou dan sanktyer, non pa avek disan bouk ek toro, me avek son prop disan, pour fer nou ganny delivre pour touzour.

¹³ Disan bouk ek toro, lasann en zenis brile ki ti ganny fannen lo bann dimoun enpir, ti pirifye zot.

¹⁴ Si i konmsa, eski disan Kris pa pou annan plis lefe? Par Lespri ki eternel, in ofer li menm avek Bondye, koman en sakrifis parfe. Alor, son disan ava pirifye nou konsyans kont bann move aksyon, pour nou kapab servi Bondye ki vivan.

Lalyans in Sele par Disan

¹⁵ Pour sa rezon, Kris i medyater en nouvo lalyans, pour ki sa bann ki'n ganny apele, ava kapab resevwar leritaz eternel ki'n ganny promet. Par son lanmor, ras imen in ganny pardonnen zot fot ki zot ti komet kan zot ti anba premye lalyans. Alor, sa bann ki Bondye ti'n apele, ti kapab resevwar leritaz eternel ki ti'n ganny promet e ki ankor egziste.

¹⁶ La kot i annan en testaman, laprev lanmor sa enn ki'n fer sa testaman i neseser.

¹⁷ Annefe, en testaman i pa valab osi lontan ki sa dimoun ki'n fer li i ankor vivan.

¹⁸ Pour sa rezon, menm premye lalyans pa ti vin anfors san versman disan.

¹⁹ Annefe, Moiz ti proklanm tou komannman Bondye devan lasanble pep Izrael, dapre Lalwa. Apre, i ti pran disan bann toro, bann bouk ek delo. Avek lalenn rouz ek en brans izop, i ti asperz lo liv Lalwa e lo pep antye.

²⁰ I ti dir: Sa i disan lalyans ki Bondye in ordonnen pour zot respekte.

²¹ Apre sa, dan menm fason, Moiz ti asperz disan lo latant ek tou bann lobze ki servi pour ladorasyon.

²² Annefe, dapre Lalwa, preski tou keksoz i ganny pirifye avek disan, e san versman disan, napa pardon pese.

Sakrifis Kris I Efas Pese

²³ I ti neseser ki sa bann model ki reprezant realite dan lesyel, i ganny pirifye dan sa fason. Me sa bann realite dan lesyel, ti bezwen en meyer sakrifis.

²⁴ Annefe, Kris pa'n antre dan kopi en sanktyer ki'n fer par zonm, me i'n antre dan lesyel menm, pour prezant li menm devan Bondye pour nou.

²⁵ I pa'n antre pour ofer li plizyer fwa, parey Gran-Pret ti antre dan Lasal Tre Sen toulezan avek disan ki pa son prop disan.

²⁶ Otreman, i ti ava bezwen soufer plizyer fwa depi kreasyon lemonn. An realite, i'n aparet en fwa pour tou, la dan lafen letan, pour abolir pese, par ofer son prop lekor an sakrifis.

²⁷ Tou dimoun in destinen pour mor en sel fwa, e apre ganny zize par Bondye.

²⁸ De menm, Kris i'n ofer son lekor en sel fwa pour detri pese en kantite dimoun: I pou aparet en dezyenm fwa, pa pour detri pese, me pour sov bann ki pe esper li.