Ebre 3 - Labib An Kreol Seselwa

Zezi I Pli Gran ki Moiz

¹ Alor, mon bann frer ek ser ki sen e ki Bondye in apele! Fikse zot latansyon lo Zezi. I'n ganny anvoye koman zapot e Gran-Pret sa lafwa ki nou pe proklanmen.

² I ti fidel avek sa enn ki'n swazir li, parey Moiz ti fidel dan lakaz Bondye.

³ Anfet, en dimoun ki konstri en lakaz, i touzour ganny plis loner ki sa lakaz li menm. Alor, laglwar ki Zezi i merite, i bokou pli gran ki laglwar Moiz.

⁴ Annefe, tou lakaz i bezwen annan en konstrikter; e konstrikter tou keksoz, se Bondye.

⁵ Moiz ti fidel dan lakaz Bondye koman en serviter, pour li vin en temwen konsernan sa ki pou ganny dir.

⁶ Me koman son Garson, Kris i fidel dan lakaz Bondye. Sa lakaz se nou, si nou gard nou konfyans e reste solid dan sa ki nou pe espere.

Repo pour Pep Bondye

⁷ Alor, parey Lespri Sen i deklare: Ozordi, si zot antann son lavwa,

⁸ pa andirsi zot leker, parey zot ti fer, kan zot ti revolte, parey sa zour kan zot ti teste mwan dan dezer.

⁹ Laba, zot zanset ti teste mwan; zot ti war sa ki mon ti'n fer pandan 40 an.

¹⁰ Alor, mon ti pran lakoler avek sa pep. Mon ti dir: Zot leker i touzour egare avek mwan. Zot pa'n konpran mon semen.

¹¹ Dan mon lakoler, mon ti fer sa serman: Zot pa pou antre dan mon repo.

¹² Mon bann frer ek ser! Fer byen atansyon ki personn parmi zot pa posed en leker vreman move, ki refize krwar, ki tourn son ledo avek Bondye vivan.

¹³ Okontrer, ankouraz kanmarad tou le zour, osi lontan ki i apel “ozordi” pour ki personn parmi zot, pa les li ganny tronpe par pese e andirsi son leker.

¹⁴ Annefe, nou kolaborater Kris, si nou gard solidman ziska lafen, sa konfyans ki nou'n resevwar depi o konmansman.

¹⁵ Ensi, Lekritir i deklare: Ozordi, si zot antann son lavwa, pa andirsi zot leker, parey zot ti fer kan zot ti revolte.

¹⁶ Lekel sa bann ki ti tande e pourtan ti revolte kont li? Pa tou sa bann ki ti sorti Lezip anba direksyon Moiz?

¹⁷ Kont ki, eski Bondye ti pran lakoler pandan 40 an? Pa kont sa bann ki ti ofans li, ki ti tonbe e mor dan dezer?

¹⁸ Avek ki eski Bondye ti fer sa serman ki zot pa pou antre dan son repo, si pa avek sa bann ki ti revolte?

¹⁹ Alor, nou war ki zot pa ti kapab antre dan son repo, akoz zot ti'n refize krwar.