Ebre 2 - Labib An Kreol Seselwa

En Gran Delivrans

¹ Pour sa rezon, nou bezwen port en pli gran latansyon pour mesaz ki nou'n tande, pour ki nou pa les nou ganny antrennen dan perdisyon.

² Mesaz anonse par bann lanz ti annan tou son valer, e tou pese, tou dezobeisans in ganny son pinisyon ki zot merite.

³ Alor, koman nou, nou pou kapab sap pinisyon si nou negliz en tel gran delivrans? Sa delivrans, Senyer li menm ti anonse an premye; apre, bann ki ti tande ti konfirm li avek nou.

⁴ Anmenmtan, Bondye in konfirm sa temwannyaz par bann siny, bann levennman ekstraordiner ek toudsort mirak. I'n osi distribye bann don Lespri Sen dapre son lavolonte.

Responsab pour Nou Delivrans

⁵ Annefe, pa anba kontrol bann lanz, ki Bondye in plas lemonn ki pe vini, e ki nou pe koz lo la.

⁶ Okontrer, parey i'n ganny deklare dan Lekritir: Ki zonm i ete pour ou mazin li? Oubyen en imen, pour ki ou pran swen avek li?

⁷ Ou'n abes li pli ba ki bann lanz pour en pti pe letan. Ou'n kouronn li avek laglwar ek loner.

⁸ Ou'n plas tou keksoz anba son lotorite. Lefet ki Bondye in plas tou keksoz anba son lotorite, sa i vedir ki tou keksoz i anba son kontrol. I vre ki aktyelman nou pa war ki tou keksoz i anba son kontrol.

⁹ Me nou konstate ki pandan en pti pe letan, Zezi ti'n ganny abese pli ba ki bann lanz. Konmsa, akoz soufrans son lanmor, i'n ganny kouronnen avek laglwar ek loner. Ensi, par lagras Bondye, i'n mor pour tou dimoun.

¹⁰ Annefe, Bondye, pour ki e par ki tou keksoz i egziste, in rann Zezi parfe atraver son soufrans. Par son soufrans, Zezi in fer bokou son bann zanfan partisip dan son laglwar. Li menm ki'n sov zot.

¹¹ Annefe, sa enn ki pirifye, ek bann ki ganny pirifye, zot tou, zot annan en menm papa. Pour sa rezon, Zezi pa onte pour apel zot son bann frer.

¹² Annefe, i ti deklare: Mon pou anons ou non avek mon bann frer. Mon pou loue ou devan lasanble.

¹³ I ti osi dir: Mon pou met mon konfyans dan Bondye. E ankor: La mon la avek bann zanfan ki Bondye in donn mwan.

¹⁴ Alor, parey zanfan i annan an komen disan ek laser, Zezi osi, i'n partisip dan menm kondisyon. I'n pran natir imen, pour ki par son lanmor, i detri sa enn ki annan pouvwar donn lanmor, setadir dyab.

¹⁵ I'n delivre bann ki, akoz zot lafreyer lanmor, ti pe viv koman lesklav pandan tou zot lavi.

¹⁶ Annefe, i pa'n vin pour ed bann lanz, me bann desandan Abrahanm.

¹⁷ Pour sa rezon, ti neseser ki i vin an tou, parey son bann frer. Konmsa, i'n vin zot Gran-Pret ranpli avek bonte e fidel dan son servis devan Bondye, pour fer sir ki pese lepep i ganny pardonnen.

¹⁸ Annefe, li menm i'n soufer, e i'n ganny tante. Alor, aprezan i kapab ed tou bann ki ganny tante.