Ebre 13 - Labib An Kreol Seselwa

Koman Fer Plezir Bondye

¹ Kontinyen kontan kanmarad koman bann frer ek ser.

² Pa oubliye pratik lospitalite. Annefe, serten san konnen, in resevwar lanz se zot.

³ Mazin bann prizonnyen, konmsi ou ti dan prizon avek zot. Mazin bann ki ganny tortire, konmsi ou osi, ou pe ganny tortire.

⁴ Maryaz i devre ganny onore par tou dimoun. Mari ek fanm i devre reste fidel anver kanmarad. Bondye pou ziz bann ki anmenn en lavi dezordonnen e adilter.

⁵ Pa les lanmour pour larzan domin zot lavi. Me kontant zot avek sa ki zot annan, akoz Bondye li menm ti dir: Mon pa pou zanmen negliz ou, mon pa pou zanmen abandonn ou.

⁶ Pour sa rezon, nou kapab dir avek konfyans: Senyer i mon sekour, mon pa per personn. Ki dimoun i kapab fer mwan?

⁷ Rapel bann ansyen ki'n anons zot Parol Bondye. Mazinen ki mannyer zot in viv; imit zot lafwa.

⁸ Zezi-Kri i reste parey, yer, ozordi, demen e pour touzour.

⁹ Pa les zot ganny antrennen par toudsort lansennyman bizar. I bon ki nou leker i ganny ankouraze par lagras, e non pa par bann regleman konsernan manze. Dimoun ki'n obzerv sa bann regleman pa'n tir okenn benefis.

¹⁰ Bann pret ki servi dan sanktyer napa drwa manz sa ki ganny ofer lo lotel.

¹¹ Annefe, lekor bann zannimo ki Gran-Pret i anmenn zot disan pour ofer pour pardon pese, i ganny brile an deor kan.

¹² Pour sa rezon ki Zezi osi ti mor an deor laport lavil, pour ki lepep i ganny pirifye par son prop disan.

¹³ Alor, annou sorti an deor kan e al kot li pour siport menm imilyasyon avek li.

¹⁴ Annefe, nou demer lo sa later pa pou dire pour touzour; nou pe rod sa lavil ki dan lavenir.

¹⁵ Alor, par Zezi, annou touzour ofer Bondye en sakrifis louanz, setadir, annou toultan loue son non avek nou labous.

¹⁶ Me pa manke fer dibyen e ed kanmarad, akoz se bann sakrifis parey ki fer plezir Bondye.

¹⁷ Obei zot bann dirizan e swiv zot lord. Annefe sa bann dimoun pe kontinyelman vey lo zot, akoz zot pou bezwen rann kont lo zot size. Les zot fer zot travay dan lazwa, olye dan lapenn. Sa pa pou anmenn okenn lavantaz pour zot.

¹⁸ Priy pour nou. Nou sir ki nou annan en konsyans kler, akoz nou oule touzour donn legzanp.

¹⁹ Priy spesyalman pour mwan, pour ki Bondye ava permet mwan retourn kot zot tre byento.

Lapriyer Final

²⁰ Bondye ki sours lape, i'n resisit nou Senyer Zezi-Kri. Par disan son sakrifis ki garanti lalyans eternel, i'n vin gran berze bann mouton.

²¹ Mon demande ki i rann zot kapab pour pratik tou sa ki byen. Konmsa, zot ava akonpli son lavolonte. Ki i realiz dan nou tou, sa ki fer li plezir, par Zezi-Kri ki merit laglwar pour touzour. Amenn.

Konklizyon

²² Mon bann frer! Mon demann zot pour siport avek pasyans sa bann parol lankourazman. Annefe, mon let pa long.

²³ Mon fer zot konnen ki nou frer Timote in ganny large. Si i ariv ase vit, mon ava vin war zot avek li.

²⁴ Fer konpliman tou zot bann dirizan ek tou bann krwayan. Bann frer ki sorti Itali i fer zot salanm.

²⁵ Lagras Bondye ava avek zot tou.