Deterononm 9 - Labib An Kreol Seselwa

Pep Izrael I Dezobei Senyer

¹ Izrael, ekoute! Ozordi, ou pe al travers larivyer Zourden, pour sas bann nasyon ki pli gran, pli for ki ou, e pran posesyon bann gran lavil ki fortifye ziska dan lesyel.

² Zot en pep zean ki for; desandan bann Anakit ki ou konnen. Annefe, ou'n antann dir lo zot: Lekel ki kapab tenir devan bann Anakit?

³ Ozordi, rekonnet ki SENYER, ou Bondye i sa enn ki pe travers larivyer Zourden devan ou parey en dife ki bril tou. I pou detri zot e imilye zot devan ou. Konmsa, ou ava kapab pran tou sa ki zot annan e detri zot vitman, parey SENYER ti promet ou.

⁴ Kan SENYER, ou Bondye ava'n sas zot devan ou, pa dir dan ou menm: Si SENYER in anmenn mwan isi pour okip sa pei, sa i akoz mon zis; me plito, akoz mesanste sa bann nasyon ki devan ou, SENYER in pran tou sa ki zot annan.

⁵ Ou pa pe al pran posesyon sa pei akoz ou zis, oubyen akoz ou leker i drwat, me akoz mesanste sa bann nasyon ki SENYER, ou Bondye pe al pran avek zot tou sa ki zot annan. Konmsa, promes ki SENYER ti fer avek ou bann zanset Abrahanm, Izaak ek Zakob, ava ganny akonpli.

⁶ Konpran byen alor, ki SENYER, ou Bondye pa pe al donn ou sa bon pei pour ou pran posesyon akoz ou zis. Annefe, ou en pep rebel.

⁷ Fodre rapel e pa oubliye ki mannyer ou ti provok SENYER, ou Bondye dan dezer e ki ou ti fer li ankoler. Depi zour ou ti sorti Lezip, ziska ou ti ariv isi, ou ti revolte kont SENYER.

⁸ Menm lo montanny Horeb zot ti provok SENYER e fer li ankoler. SENYER ti telman ankoler kont zot, ki i ti'n pre pour li detri zot.

⁹ Ler mon ti al lo montanny pour resevwar bann plak ros, bann plak lalyans ki SENYER ti'n fer avek zot, mon ti pas 40 zour, 40 nwit lo montanny, san manze ni bwar.

¹⁰ Alor, SENYER ti donn mwan sa de plak ros ekri par ledwa Bondye. Lo la, ti annan tou bann parol ki SENYER ti'n koz avek zot lo montanny, dan dife, zour rasanbleman.

¹¹ Apre 40 zour ek 40 nwit, SENYER ti donn mwan sa de plak ros, ki plak lalyans.

¹² Apre, SENYER ti dir mwan: Leve! Desann vit akoz ou pep ki ou'n fer sorti Lezip in vin koronpi. Zot in vit sorti lo semen kot mon ti'n ordonn zot marse. Zot in fer en stati an metal ki zot in fonn pour zot menm.

¹³ SENYER ti osi dir mwan: Mon'n war ki sa pep i vreman en pep rebel.

¹⁴ Les mwan detri zot e fer zot disparet anba lesyel. Mon pou fer ou vin en nasyon pli pwisan e pli nonbre ki sa pep.

¹⁵ Avek sa de plak ros dan mon lanmen, mon ti leve e desann montanny ki ti anflanm.

¹⁶ Alor, mon ti war ki vreman, zot ti'n fer pese kont SENYER, zot Bondye, akoz zot ti'n fer fonn metal pour fer en zenn bef annor pour zot. Zot pa ti tarde pour kit semen ki SENYER ti'n ordonn zot swiv.

¹⁷ Alor, mon ti pran sa de plak ros, zet zot ater e kas zot devan zot lizye.

Moiz I Entersed an Faver Pep Izrael

¹⁸ Mon ti reste prosternen devan SENYER parey avan, pandan 40 zour ek 40 nwit san manze ni bwar, akoz zot bann pese. Zot ti'n komet sa ki mal devan SENYER e fer li ankoler.

¹⁹ Annefe, mon ti per ki lakoler SENYER kont zot ti telman gran ki i ti ava detri zot. Me ankor en fwa, SENYER ti ekout mwan.

²⁰ SENYER ti telman ankoler osi kont Aaron, ki i ti pre pour detri li. Me mon ti entersed pour Aaron osi.

²¹ Apre, mon ti pran sa zenn bef, prodwi zot pese ki zot ti'n fer. Mon ti zet li dan dife, kas li an pti morso ziska ki i ti'n vin lapousyer. Mon ti zet sa lapousyer dan larivyer ki desann depi montanny.

²² Zot ti osi provok lakoler SENYER ler zot ti Tabera, Massa ek Kibrot-Taava.

²³ Osi, SENYER ti fer zot kit Kades Barnea ler i ti dir zot: Monte, al pran posesyon sa pei ki mon pe al donn zot. Zot ti revolte kont lord SENYER, zot Bondye. Zot in refize fer li konfyans e zot in dezobei li.

²⁴ Depi ki mon konn zot, zot in revolte kont SENYER.

²⁵ Pandan sa 40 zour ek 40 nwit, mon ti reste prosternen devan SENYER, akoz SENYER ti oule detri zot.

²⁶ Mon ti priy SENYER. Mon ti dir li: Senyer BONDYE, pa detri sa pep ki, dan ou grander, ou'n sove, ki par ou pwisans, ou'n fer sorti Lezip.

²⁷ Mazin ou bann serviter Abrahanm, Izaak ek Zakob. Pa fer atansyon lantetman sa pep, son mesanste ek son bann pese,

²⁸ sinon, zabitan sa pei kot ou ti fer nou sorti ava dir: SENYER pa ti kapab fer zot antre dan sa pei ki i ti'n promet zot. Akoz i ti ay zot ki i'n fer zot sorti pour anmenn zot dan dezer pour les zot mor.

²⁹ Pa oubliye ki sa pep i pour ou e ki ou ki ti fer li sorti Lezip, par ou pwisans ek ou lafors.