Deterononm 7 - Labib An Kreol Seselwa

Izrael, En Pep Swazi

¹ SENYER, zot Bondye ava fer zot antre dan sa pei ki zot pe al pran posesyon. I pou sas devan zot sa bann gran nasyon, set pep pli nonbre e pli pwisan ki zot: Hitit, Girgasit, Amorit, Kananeen, Perizit, Hivit, ek Zebizit.

² SENYER, zot Bondye ava livre zot anba zot pouvwar e donn ou laviktwar lo zot. Alor, ou ava detri zot konpletman. Pa fer okenn lalyans avek zot e pa pran okenn pitye pour zot.

³ Pa fer okenn lalyans par maryaz avek zot. Pa donn ou fiy zot bann garson, ni pran zot fiy pour ou bann garson.

⁴ Sa i ava detourn ou bann zanfan kont mwan pour al servi lezot bondye. Alor, lakoler SENYER ava anflanmen kont zot; i ava detri zot imedyatman.

⁵ Me la ki mannyer ou pou azir avek sa bann nasyon: Demoli zot bann lotel, kraz zot bann ros sakre, kas zot bann ros sakre, bril zot bann stati.

⁶ Ou en pep sen, konsakre pour SENYER, ou Bondye. SENYER, ou Bondye in swazir ou parmi tou bann pep lo later pour fer ou vin son pep.

⁷ Pa akoz ou ti pli nonbre parmi tou bann pep ki SENYER ti swazir ou. O kontrer, ou ti parmi bann pli pti pep.

⁸ Sa ti akoz SENYER in kontan ou. Akoz in gard serman ki i ti fer avek ou bann zanset, ki SENYER, par son pwisans, ti tir ou e sov ou dan lesklavaz, dan lanmen Faraon, lerwa Lezip.

⁹ Aprezan, rekonnet: SENYER, ou Bondye i sel Bondye. Li menm sa vre Bondye fidel dan son lalyans avek sa bann ki kontan li e ki gard son komannman, ziska mil zenerasyon.

¹⁰ Me i pini direkteman sa bann ki ay li; i fer zot disparet. I pa ezite pour pini bann ki ay li; i pini zot direkteman.

¹¹ Alor, obzerv byen bann komannman, bann regleman ek bann lalwa ki mon ordonn ou ozordi.

Benediksyon pour Lobeisans

¹² Si ou ekout sa bann lalwa e pran swen pour obzerv zot e met zot an pratik, SENYER, ou Bondye ava gard son lalyans anver ou e kontinyen gard sa promes ki i ti fer par en serman avek ou bann zanset.

¹³ I pou kontan ou, beni ou, fer ou vin nonbre. I pou beni ou bann zanfan e fri ou later: Ou dible, ou diven ek ou delwil. I pou beni ou bann zannimo: Zenis e bann zenn mouton, lo later ki i'n fer serman avek ou bann zanset pour li donn ou.

¹⁴ Ou pou ganny beni plis ki tou bann pep; ou bann zonm ek ou bann fanm pa pou vin steril; ni ou bann bef, ni okenn zannimo.

¹⁵ SENYER pour fer disparet tou kalite maladi parmi zot. I pa pou anvoy ou tou bann lepidemi ki ou ti byen konnen ler ou ti Lezip. Me i ava anvoy sa bann maladi lo tou bann dimoun ki ay ou.

¹⁶ Ou pou detri tou bann pep ki SENYER, ou Bondye pe livre dan ou lanmen. Ou pa pou montre okenn pitye pour zot. Ou pa pou servi zot bann bondye, akoz sa i riske vin en pyez pour ou.

Senyer Pou Protez Son Pep

¹⁷ Si ou dir dan ou menm: Sa bann nasyon i pli nonbre ki nou; ki mannyer mon pou kapab sas zot?

¹⁸ Pa per zot! Zis mazin sa ki SENYER, ou Bondye ti fer Faraon ek Lezip antye,

¹⁹ tou sa bann gran soufrans ki ou menm ou'n war, bann siny ek bann mervey, avek son gran pwisans ek son lafors ki SENYER, ou Bondye ti fer ou sorti Lezip. SENYER, ou Bondye pou fer parey avek tou bann pep ki fer ou per.

²⁰ An plis, SENYER, ou Bondye pou senm panik. I pou detri sa bann ki'n kapab sove pour al kasyet.

²¹ Pa tranble devan zot, akoz SENYER, ou Bondye i avek ou; i en gran Bondye terib.

²² Tou dousman, SENYER, ou Bondye ava sas sa bann nasyon devan ou. Ou pa pou kapab detri zot toudswit, sinon i ava annan tro bokou zannimo sovaz ki ava atak ou.

²³ Me, SENYER, ou Bondye ava livre sa bann nasyon dan ou lanmen e zot pou tonm dan en gran lafreyer, ziska ki zot disparet.

²⁴ I pou livre zot bann lerwa; ou ava efas zot non lo later. Personn pa pou reziste devan ou, ziska ki ou'n detri zot tou.

²⁵ Ou ava bril zot bann stati ek zot bann bondye. Pa les ou ganny tante par larzan oubyen lor ki kouver zot, akoz zot kapab vin en pyez pour ou; zot degoutan devan SENYER, ou Bondye.

²⁶ Pa anmenn okenn lobze degoutan dan ou lakaz, sankwa ou pou ganny detri ansanm avek zot. Ou devre deteste sa bann lobze, akoz fodre zot ganny detri.