Deterononm 4 - Labib An Kreol Seselwa

Moiz I Demann Izrael pour Obeir Lalwa Bondye

¹ Moiz ti dir pep Izrael: Aprezan, Izrael! Ekout bann regleman ek bann lalwa ki mon pe ansenny zot, pour zot met an pratik. Konmsa, zot ava viv pour antre e pran posesyon pei ki SENYER, Bondye zot bann zanset pe al donn zot.

² Zot pa devre azout nanryen, ni tir nanryen dan sa bann parol ki mon ordonn zot. Gard bann komannman SENYER, zot Bondye parey mon'n donn zot.

³ Zot menm, zot in war tou sa ki SENYER in fer Baal-Peor: Ki mannyer SENYER, ou Bondye ti detri tou sa bann zonm ki ti swiv Baal-Peor.

⁴ Zot ki'n reste fidel anver SENYER, zot Bondye, zot ankor vivan ozordi.

⁵ Gete! Parey SENYER mon Bondye in ordonn mwan, mon'n ansenny zot bann regleman ek bann lalwa, pour ki zot obzerv zot dan pei kot zot pe ale pour pran posesyon.

⁶ Gard zot e met zot byen an pratik. Sa i ava montre bann pep zot lasazes ek zot lentelizans. Ler bann pep ava antann tou sa bann regleman, zot ava dir: Vreman sa gran nasyon i en pep saz e entelizan!

⁷ Annefe, lekel sa lot gran nasyon ki annan en bondye ki si pros avek li parey SENYER, nou Bondye, sak fwa ki nou apel li?

⁸ Lekel sa lot gran nasyon ki annan bann regleman ek bann desizyon ki osi zis, parey tou sa bann lalwa ki mon pe met devan zot ozordi?

⁹ Selman, fer atansyon! Vey byen lo ou menm tou le zour ou lavi, pour ki ou pa oubliy sa ki ou lizye in war; gard zot dan ou leker. Ansenny tousala ou bann zanfan ek ou bann pti zanfan.

¹⁰ Rapel zour ou ti debout devan SENYER, ou Bondye, lo montanny Horeb, ler SENYER ti dir mwan: Rasanble lepep devan mwan; mon oule fer zot antann mon bann parol, pour ki zot aprann annan respe anver mwan, tou le zour zot lavi lo later e pour zot ansenny osi zot bann zanfan.

¹¹ Zot ti aprose e debout devan montanny ki ti anflanm ziska dan lesyel e kouver avek nyaz ek brouyar.

¹² Dan milye sa dife, SENYER ti koz avek zot. Zot ti antann son bann parol, me zot pa ti war okenn laform. Zot ti antann zis en lavwa.

¹³ I ti fer proklanm son lalyans ki i ti demann zot obzerve, setadir, son dis komannman ki i ti ekri lo de plak ros.

¹⁴ Alor, SENYER ti ordonn mwan ansenny zot sa bann regleman ek bann desizyon ki zot ava obzerve dan pei kot zot pe al antre pour pran posesyon.

Lavertisman kont Idolatri

¹⁵ Sirtou, fer byen atansyon lo zot menm: Zour ki SENYER ti koz avek zot lo montanny Horeb dan milye dife, zot pa ti war son laform.

¹⁶ Alor, pa tonm dan pese pour al fer en stati ki reprezant laform en zonm oubyen en fanm,

¹⁷ oubyen laform en zannimo ki lo later, laform en zwazo ki anvole dan lezer,

¹⁸ laform nenport ki zannimo ki ranpe, ni en pwason ki dan delo anba later.

¹⁹ Kan ou ava lev ou lizye ver lesyel e war soley, lalin, bann zetwal e tou sa ki i annan dan lesyel, pa les ou ganny tante e prosternen devan zot e servi zot. Tousala, SENYER, ou Bondye ki'n donnen avek tou bann pep ki viv anba lesyel.

²⁰ Me zot, SENYER in swazir zot. I'n fer zot sorti Lezip, dan sa four kot feray i fonn, pour fer zot vin son pep, son posesyon. Se sa, ki zot ete aprezan.

²¹ Akoz zot, SENYER ti ankoler kont mwan. I ti fer serman ki mon pa pou travers larivyer Zourden pour antre dan sa bon pei ki SENYER, ou Bondye pe donn ou koman patrimwann.

²² Annefe, mon pou mor isi dan sa pei; mon pa pou travers larivyer Zourden. Me zot, zot pe al traverse pour pran posesyon sa bon pei.

²³ Alor, fer byen atansyon: Pa oubliy lalyans ki SENYER, zot Bondye ti fer avek zot. Pa fer okenn stati dan okenn laform ki SENYER, zot Bondye in defann zot.

²⁴ Rapel byen ki SENYER, ou Bondye i en dife ki devor tou. I en Bondye zalou.

²⁵ Ler ou ava'n etabli ou dan sa pei pour en pe letan ek zanfan ek pti zanfan, pa tonm dan pese pour fer bann stati dan nenport ki laform. Si ou fer sa ki mal devan SENYER, ou Bondye e provok son lakoler,

²⁶ ozordi, mon pran lesyel ek later pour temwen kont zot: Zot pou toudswit disparet dan sa pei ki zot pe al pran posesyon ler zot ava'n travers larivyer Zourden.

²⁷ SENYER pou dispers zot parmi bann pep. Zis en pti kantite zot ki pou reste parmi bann nasyon kot SENYER ava fors zot ale.

²⁸ Laba, zot ava servi bann bondye ki zonm in fer, bann lobze an bwa e an ros ki pa ni war kler, ni tande, ni manze, ni santi.

²⁹ Laba dan sa pei, ou pou rod SENYER, ou Bondye. Si ou rod li avek tou ou leker ek tou ou lespri, ou pou trouv li.

³⁰ Plitar, kan ou pou dan detres, kan tou sa ki mon'n anonse ava'n arive, ou ava retourn ver SENYER, ou Bondye e ou ava son lavwa.

³¹ Annefe, SENYER, ou Bondye i en Bondye ranpli avek konpasyon; i pa pou abandonn ou ni detri ou. I pa pou oubliy lalyans ki i ti fer avek ou bann zanset.

Privilez Izrael

³² Mazin letan pase, byen lontan avan ou, depi ki ou Bondye ti kree limanite lo later. Poz sa bann kestyon lo sa ki'n arive partou lo later: Eski en si gran levennman in deza arive? Eski en keksoz parey in deza ganny rakonte?

³³ Eski en pep in deza antann lavwa Bondye dan milye dife, parey ou ti tande e reste vivan?

³⁴ Eski i annan en bondye ki'n deza esey swazir en nasyon pour li, parmi lezot nasyon, par bann leprev, bann siny, bann mervey ek bann lager; avek son pouvwar ek son lafors e par bann aksyon gran e ekstraordiner? Non, me SENYER, zot Bondye in fer zot dan lesklavaz Lezip, parey zot in war avek zot prop lizye

³⁵ In montre ou tousala, pour ki ou rekonnet ki SENYER i Bondye; ki napa okenn lot bondye apard li.

³⁶ Depi lesyel, in fer ou antann son lavwa, pour li koriz ou. In fer ou war son gran dife lo later; ou'n antann son lavwa sorti dan milye dife.

³⁷ SENYER ti kontan ou bann zanset. Pour sa rezon, ki i'n swazir zot bann desandan e par son prezans ek son pwisans, i ti fer zot sorti Lezip.

³⁸ Devan ou, i ti sas bann nasyon pli gran, pli for ki ou menm, pour li anmenn ou dan sa pei ki i ti donn ou an posesyon, parey sa ki'n arive ozordi.

³⁹ Ozordi alor, rekonnet e medit dan ou leker ki SENYER i Bondye lao dan lesyel e anba lo later, e ki napa okenn lot bondye apard li.

⁴⁰ Gard son bann regleman ek son bann komannman ki mon pe donn ou ozordi pour ou boner e pour dibyen ou bann desandan. Konmsa, ou ava viv lontan dan pei ki SENYER, ou Bondye pe donn ou pour touzour.

Bann Lavil Refiz dan Les Zourden

⁴¹ Apre sa, Moiz ti swazir e met apar trwa lavil sitye lo lot kote, dan Les larivyer Zourden.

⁴² Sa bann lavil ava servi koman en refiz pour sa enn ki'n touy en dimoun envolonterman, san ki i ti ay li oparavan. Sa dimoun ti ava kapab sov dan enn sa bann lavil e sov son lavi.

⁴³ Sa bann lavil ti Beser, lo plato dan dezer, pour bann Ribenit; Ramot dan pei Galaad, pour bann Gadit e Golann dan Basann, pour bann Manasit.

Parol Bondye lo Montanny Sinai

⁴⁴ Sa i lalwa ki Moiz ti met devan bann Izraelit.

⁴⁵ Moiz ti donn sa bann lalwa ek regleman ler zot ti'n sorti Lezip.

⁴⁶ Zot ti lo lot kote larivyer Zourden, dan vale, anfas avek Bet-Peor, dan pei bann Amorit kot lerwa Sihonn ki rennyen Hesbonn. Ler zot ti sorti Lezip, Moiz avek bann Izraelit ti ganny laviktwar lo zot.

⁴⁷ Zot ti pran posesyon son pei ek pei Og, lerwa Basann. Sa ti de lerwa bann Amorit ki ti rennyen lo kote Les larivyer Zourden.

⁴⁸ Bann Izraelit ti osi okip Aroer, obor larivyer Arnon, ziska montanny Sirionn, ki ti osi apel Hermon,

⁴⁹ avek Araba antye, ki Les avek larivyer Zourden, ziska lanmer Araba, dan lapant montanny Pisga.