Deterononm 34 - Labib An Kreol Seselwa

Lanmor Moiz

¹ Moiz ti kit laplenn Moab e mont lo montanny Nebo, lo latet montanny Pisga ki anfas avek Zeriko. La, SENYER ti montre li pei antye: Depi Galaad ziska Dann,

² teritwar antye Neftali, tou teritwar pei Efraim ek Manase, teritwar antye pei Zida, ziska lanmer Mediterane;

³ rezyon Negev ek Laplenn, vale Zeriko, lavil bann palmye, ziska Soar.

⁴ SENYER ti dir li, “Sanmenm sa pei ki mon ti'n promet Abrahanm, Izaak ek Zakob ler mon ti dir zot: Mon pou donn ou desandans sa pei. Mon'n fer ou war sa pei avek ou prop lizye, me ou pa pou antre.”

⁵ Moiz, serviter SENYER, ti mor la dan pei Moab, parey SENYER ti'n deside.

⁶ SENYER ti anter li dan en vale dan pei Moab, anfas avek Bet-Peor. Ziska ozordi, personn pa konn landrwa kot i ti ganny antere.

⁷ Moiz ti annan 120 an kan i ti mor. Son lizye ti ankor bon e i ti ankor for e son lafors pa ti'n diminyen.

⁸ Bann Izraelit ti pler Moiz pandan 30 zour dan laplenn Moab. Apre, sa bann zour dey pour Moiz ti fini.

⁹ Zozye, garson Noun, ti ranpli avek lasazes. Annefe, Moiz ti'n poz son lanmen lo li. Bann Izraelit ti obei li e fer tou sa ki SENYER ti'n komande par lentermedyer Moiz.

¹⁰ Zanmen en lot profet parey Moiz in leve dan Izrael. SENYER ti koz avek li fas a fas.

¹¹ Ti napa personn koman li par ki SENYER ti anvoy fer bann siny ek bann mervey dan pei Lezip, kont Faraon ek tou son bann serviter dan pei antye.

¹² Moiz ti annan en gran pouvwar. I ti akonpli bann mervey ek bann aksyon terib devan pep Izrael.