Deterononm 33 - Labib An Kreol Seselwa

Moiz I Beni Pep Izrael

¹ La benediksyon ki Moiz, serviter Bondye ti prononse lo bann Izraelit avan son lanmor.

² I ti dir: SENYER in vini sorti Sinai, i'n aparet lo kote Seir, i ti briye depi montanny Parann. Pour zot, in vini depi rasanbleman Kades avek bann milye lanz. Dan son lanmen drwat, i ti tenir flanbo lalwa.

³ Annefe, i ti kontan bann pep. Tou son pep sen ki i proteze, ti prostern devan ou e aksepte ou bann lenstriksyon.

⁴ Moiz ti donn nou lalwa koman posesyon pour lasanble Zakob.

⁵ Kan bann sef lepep ti rasanble avek bann tribi Izrael, SENYER ti zot lerwa dan Yesouroun.

⁶ Riben pou viv, i pa pou mor menm si i pa nonbre.

⁷ La sa ki Moiz ti dir lo Zida: SENYER! Ekout lavwa Zida, e fer li retourn ver son pep. Donn li lafors pou defann li. Anmenn li sekour kont son bann ladverser.

⁸ La sa ki Moiz ti dir lo Levi: Donn Levi, sa enn ki lwayal anver ou ou Toumim ek ou Ourim. Ou ti teste li Massa, e ou ti provok li kot sours Meriba.

⁹ Lo size son papa ek son manman, Moiz ti dir: Mon pa konn zot. I ti inyor son bann frer; i pa ni rekonnet son bann zanfan. Zot ti obzerv ou parol, zot ti gard ou lalyans.

¹⁰ Zot ava ansenny Zakob ou bann regleman e Izrael ou Lalwa. Zot ava ofer lansan devan ou e bann sakrifis konplet lo ou lotel.

¹¹ SENYER! Beni son kouraz e aksepte travay son lanmen. Kas leren son bann ladverser, ek sa bann ki ay li, pour ki zot pa lev ankor.

¹² La sa ki Moiz ti dir konsernan tribi Benzamen: I sa enn ki SENYER in prefere. Avek li i repoz an sekirite. SENYER i protez li tou le zour, i repoz dan son lebra.

¹³ Pour tribi Zozef, Moiz ti dir: Son later ava ganny beni par SENYER avek bann zoli kado sorti dan lesyel ek laroze ki sorti dan profonder.

¹⁴ Avek bann bon fri ki soley i prodwi ek tou sa ki i fer pouse sak mwan.

¹⁵ Avek bann bon prodwi ki dan bann montanny; ki egziste depi lontan, sorti dan bann kolin annabondans.

¹⁶ Avek bann meyer fri ki later i kapab prodwir. Faver sa enn ki aparet dan zarbis, ava repoz lo latet Zozef, lo fron sa enn ki'n ganny swazir parmi son bann frer.

¹⁷ I parey son toro premye ne ki donn li laglwar. Son bann korn i parey korn en bef sovaz. I bat lepep avek, partou, lo later antye. Sanmenm sa bann milyon pour Efraim sanmenm sa bann milye pour Manase.

¹⁸ Lo Zabilon, Moiz ti dir: Zabilon! Rezoui dan ou bann lekspedisyon, e ou, Isakar, anba ou bann latant.

¹⁹ Zot pou konvok bann pep lo montanny. La, zot ofer bann sakrifis parey lalwa i demande, akoz zot eksplwat labondans lanmer ek bann trezor ki kasyet dan disab.

²⁰ Pour Gad, Moiz ti dir: Loue sa enn ki elarzi teritwar Gad! Gad i viv parey en lyon; i desir lebra ek latet.

²¹ I swazir meyer par pour li; i ti ganny par rezerve pour sef. In vin sef lepep, in egzekit lazistis SENYER dapre bann regleman lo Izrael.

²² Lo Dann, Moiz ti dir: Dann i parey en zenn lyon ki lanse depi Basann.

²³ Lo Neftali, Moiz ti dir: Neftali in rasazye avek bann faver, avek bann benediksyon SENYER. I pran posesyon Was ek Sid pei.

²⁴ Lo Aser, Moiz ti dir: Aser ava ganny plis benediksyon parmi bann zanfan. I ava en favori parmi son bann frer. I ava ganny delwil annabondans.

²⁵ Ou annan bann baro an fer e an bronz. I ava an sekirite tou son lavi.

²⁶ Moiz ti dir ankor: Yesouroun! Personn pa parey Bondye. I travers bann nyaz pour li vin sekour ou.

²⁷ Bondye ki egziste dan tou letan i en labri; depi touzour son pwisans i gran. I ti sas lennmi devan ou. I ti dir: Detri zot!

²⁸ Konmsa, Izrael i viv an sekirite; sours Zakob i san traka dan en pei dible ek diven, kot lesyel i fer desann laroze.

²⁹ Izrael! Ou byennere. Lekel ki parey ou? En pep ki SENYER in sove; ou boukliye ki sekour ou ou lepe ki donn ou laviktwar. Ou bann lennmi pou kourbe devan ou; ou pou mars lo zot.