Deterononm 31 - Labib An Kreol Seselwa

Zozye I Ranplas Moiz

¹ Kan Moiz ti'n fini dir sa bann parol avek pep Izrael,

² i ti azoute: Aprezan, mon annan 120 an. Mon nepli kapab diriz zot mon tousel e SENYER in dir mwan: Ou pa pou travers larivyer Zourden.

³ SENYER, ou Bondye ava li menm mars devan ou. I pou detri bann nasyon devan ou e ou ava pran posesyon zot pei. Zozye ava osi diriz ou, parey SENYER in promet.

⁴ SENYER pou tret sa bann nasyon ek zot pep parey i ti fer avek Sihonn ek Og, sa de lerwa Amorit, ler i ti detri zot.

⁵ SENYER ava livre zot dan ou lanmen e ou ava tret zot dapre bann lord ki mon'n donn ou.

⁶ Reste for e pran kouraz! Pa bezwen ni per ni tranble devan zot, akoz SENYER, ou Bondye pe mars avek ou; i pa pou deles ou ni abandonn ou.

⁷ Apre, Moiz ti apel Zozye. Devan pep Izrael, i ti dir li, “Reste for e pran kouraz, akoz ou ki pou al avek sa pep dan sa pei ki SENYER in fer serman avek zot bann zanset pour donn zot. Ou ki pou fer zot pran posesyon sa pei.

⁸ SENYER pou mars devan ou. I pou avek ou; i pa pou deles ou ni abandonn ou. Pa bezwen per ni tranble.”

Lalwa Pou Ganny Lir Tou Le Set An

⁹ Moiz ti ekri sa lalwa e donn avek bann pret, bann garson Levi ki ti anmenn Kof Lalyans SENYER e tou bann ansyen dan Izrael.

¹⁰ Moiz ti donn zot sa lord: Tou le setyenm lannen, letan ki'n ganny fikse pour efas bann det pandan lafet Latant,

¹¹ kan pep Izrael ava vin devan SENYER, ou Bondye dan landrwa kot i ava'n swazir, ou ava lir tre for sa lalwa devan pep Izrael.

¹² Ou ava rasanble lepep: Zonm, fanm, zanfan, etranze ki pe reste dan ou bann lavil, pour ki zot antann e aprann respe pour SENYER, ou Bondye e obzerv byen tou bann parol sa lalwa.

¹³ Zot bann zanfan ki pa ankor konn sa lalwa ava kapab tande e aprann respe pour SENYER, ou Bondye tan ki ou viv dan sa pei ki ou pe al pran posesyon lo lot kote larivyer Zourden.

Bondye I Donn Moiz Son Dernyen Lord

¹⁴ SENYER ti dir Moiz, “Letan ou lanmor pe aprose. Apel Zozye e vin prezant zot dan Latant Rankont, pour mwan donn li mon bann lord.” Alor, Moiz ek Zozye ti al prezant zot dan Latant Rankont.

¹⁵ SENYER ti aparet dan en kolonn nyaz devan lantre Latant Rankont.

¹⁶ SENYER ti dir Moiz: Byento ou pe al rezwenn ou bann zanset e sa pep pou tonm dan prostitisyon avek bann bondye etranze ki dan sa pei kot zot pe ale. Zot pou abandonn mwan e kas mon lalyans ki mon ti fer avek zot.

¹⁷ Kan sa i arive, mon lakoler pou monte kont zot. Mon pou abandonn zot e tourn mon ledo avek zot. Zot ava ganny devore e en kantite maler terib pou tonm lo zot. Sa zour, zot ava dir: Sa bann maler in tonm lo nou akoz nou Bondye i pa parmi nou.

¹⁸ Sa zour, mon pou sirman detourn mon ledo avek zot, akoz tou sa bann move keksoz ki zot in fer depi ki zot in abandonn mwan e al ador lezot bondye.

¹⁹ Aprezan alor, ekri sa kantik ki bann Izraelit ava aprann parker. Met son bann parol dan zot labous pour ki i vin en temwen kont bann Izraelit.

²⁰ Annefe, mon pou anmenn zot dan en pei kot dile ek dimyel i koule. Sa i en serman ki mon ti fer avek zot bann zanset. Ler zot in byen manze, rasazye e vin gra, zot al kot lezot bondye e servi zot, mepriz mwan e kas mon lalyans.

²¹ Ler en kantite maler terib pou tonm lo zot, sa kantik ava servi koman en temwen pour akiz zot, akoz zot bann desandan pa pou zanmen oubliye. Annefe, avan menm ki mon anmenn zot dan sa pei ki mon'n promet zot par serman, mon konnen deza sa ki zot pe prepare pour fer.

²² Sa menm zour, Moiz ti ekri sa kantik ki i ti ansenny bann Izraelit.

²³ Answit, SENYER ti donn son bann lord Zozye, garson Noun: Reste for e pran kouraz, akoz ou pou kondwir bann Izraelit dan pei ki mon ki promet zot par serman; mon pou avek ou.

²⁴ Ler Moiz ti'n fini ekri tou bann parol lalwa dan en liv,

²⁵ i ti donn sa lord bann Levit ki ti pe anmenn Kof Lalyans SENYER. I ti dir:

²⁶ Pran sa liv lalwa e met li dan Kof Lalyans SENYER, zot Bondye. I ava reste la koman en temwen kont ou.

²⁷ Mon konnen koman ou ti rebel e antete. Si zot in rebel kont SENYER letan mon ankor vivan parmi zot, zot pou fer pir ankor, apre mon lanmor!

²⁸ Rasanble devan mwan tou bann ansyen dan zot tribi ek zot bann sef, pour ki mon dir sa bann parol devan zot e mon pran lesyel ek later koman temwen kont zot.

²⁹ Annefe, mon konnen ki apre mon lanmor, zot pou vin koronpi, zot pa pou swiv semen ki mon'n ordonn zot. A lavenir, maler pou tonm lo zot, akoz zot pou fer sa ki mal devan SENYER e provok son lakoler par zot bann aksyon.

³⁰ Alor, Moiz ti repet bann parol sa kantik antye, devan tou lasanble bann Izraelit pour zot tande.