Deterononm 23 - Labib An Kreol Seselwa

Dimoun ki Ganny Ekskli dan Lasanble

¹ Sa zonm ki son testikil in ganny kraze oubyen ki son seks in ganny koupe, pa pou fer parti lasanble SENYER.

² Sa enn ki'n ne an deor maryaz pa pou fer parti lasanble SENYER. Okenn son bann desandan ziska dizyenm zenerasyon, pa pou kapab fer parti dan lasanble SENYER.

³ Bann Amonit ek bann Moabit pa pou fer parti lasanble SENYER. Okenn zot bann desandan ziska dizyenm zenerasyon pa pou kapab fer parti lasanble SENYER.

⁴ Annefe, zot pa ti vin rankontre zot lo semen avek dipen ek delo, kan zot ti pe sorti Lezip; osi akoz zot ti pey Balaanm garson Beor, sorti Petor dan Aranm an Mezopotami pour li modi zot.

⁵ Me SENYER, ou Bondye pa ti ekout Balaanm; SENYER, ou Bondye ti sanz sa malediksyon an en benediksyon pour ou, akoz SENYER, ou Bondye ti kontan ou.

⁶ Tan ki ou vivan, pa zanmen pran ka pour zot byennet ni pour zot prosperite.

⁷ Pa mepriz okenn Edomit akoz zot ou fanmir pros. Pa mepriz okenn bann Ezipsyen, akoz ou ti en etranze dan zot pei.

⁸ Bann zanfan ki'n ne apartir trwazyenm zenerasyon, ava kapab fer parti lasanble SENYER.

Lapropte dan Kan

⁹ Ler ou kanpe pandan lager kont ou bann lennmi, veye ki ou pa fer nanryen ki ava rann ou enpir.

¹⁰ Si en zonm parmi zot i vin enpir akoz in sali son dra, alor, i ava sorti dan kan; i pa devre retourn dan kan.

¹¹ Ver lafen lazournen, i ava lav li avek delo. I ava kapab retourn dan kan apre soley kouse.

¹² Ou ava annan en landrwa an deor kan, kot ou ava ale.

¹³ Anmenn en lapel avek ou; ler ou ava al akroupi deor, ou ava fouy en trou. Apre, kouver ou leskreman.

¹⁴ Akoz SENYER, ou Bondye i avek ou dan kan pour li protez ou e donn ou laviktwar lo ou bann lennmi, ou kan i devret en landrwa sen, pour ki SENYER pa war nanryen ki fer onte parmi zot e vir son ledo kont ou.

Lesklav ki'n Sove

¹⁵ Ou pa pou retourn, kot son met, en lesklav ki'n sove oubyen ki'n vin ki vin rod landrwa kasyet kot ou.

¹⁶ I ava reste kot ou dan ou lantouraz, dan en landrwa ki i'n swazir dan nenport ou bann lavil, la kot i fer li plezir. Ou pa pou eksplwat li.

Prostitisyon dan Tanp

¹⁷ Pa pou annan okenn prostitye dan tanp parmi bann fiy Izrael. Pa pou annan okenn prostitye dan tanp parmi bann garson Izrael.

¹⁸ Ou pa pou anmenn dan tanp SENYER, ou Bondye, okenn larzan prostitisyon koman en lofrann remersiman pour nenport ki ve. Tousala i degoutan devan SENYER, ou Bondye.

Prete avek Lentere

¹⁹ Ou pa pou demann lentere okenn Izraelit ni lo larzan, ni lo manze, ni lo okenn keksoz ki anmenn lentere.

²⁰ Ou ava kapab sarz en lentere lo keksoz ki ou pret en etranze. Me ou pa pou sarz en lentere lo sa ki ou pret en Izraelit. Konmsa, SENYER, ou Bondye ava beni ou dan tou sa ki ou ava antreprann dan pei kot ou pe al antre pour pran posesyon.

Ve anver Senyer

²¹ Ler ou fer en ve anver SENYER, ou Bondye, pa tarde pour ou akonpli li, akoz SENYER, ou Bondye ava sertennman demann ou kont e ou ava pe komet en pese.

²² Me si ou pa fer okenn ve, ou pa pou koupab pour okenn pese.

²³ Ou pa devre tarde pour akonpli sa ki ou promet. Ou devre akonpli sa ve ki ou'n fer volonterman anver SENYER, ou Bondye.

Grapiyaz

²⁴ Si ou pas dan plantasyon rezen ou prosen, ou ava kapab manz kantite rezen ki ou anvi, ziska ou rasazye. Me ou pa pou pran pour met dan ou sak pour anmennen.

²⁵ Si ou travers plantasyon dible ou vwazen, ou ava kapab aras bann zepi avek ou lanmen. Me ou pa pou koup son bann plant avek en fosi.