Deterononm 20 - Labib An Kreol Seselwa

Regleman Konsernan Lager

¹ Ler ou sorti pour al lager kont ou bann lennmi e ou ava war en kantite seval ek kales lager, en larme pli gran ki pour ou, ou napa nanryen pour per, akoz SENYER, ou Bondye ki'n fer ou sorti Lezip, i avek ou.

² Me avan zot al lager, pret ava vin devan pour koz avek bann troup.

³ I ava dir zot: Izrael! Ekoute. Ozordi, zot pe al konbat zot bann lennmi. Pa perdi kouraz, pa per, ni tranble, ni angwase devan zot,

⁴ akoz SENYER, zot Bondye i avek zot pour konbat bann lennmi e donn zot laviktwar.

⁵ Apre, bann zofisye ava adres bann troup: Eski i annan parmi zot ki'n konstri en lakaz e ki pa ankor ganny beni? I devre retourn kot li, akoz i riske mor dan konba e en lot ava fer beni sa lakaz.

⁶ Eski i annan parmi zot ki'n plant en plantasyon rezen, me ki pa ankor gout son bann fri? I ava retourn kot li, akoz i riske mor dan konba e en lot ava premye pour zouir son fri.

⁷ Si i annan en zonm ki'n fiyanse, me ki pa ankor marye, i devre retourn kot li, akoz i riske mor dan konba e en lot zonm ava marye avek son fanm.

⁸ Bann zofisye ava kontinyen adres bann troup. Zot ava demande: Eski i annan ki per oubyen ki napa kouraz? I devre retourn kot li, akoz i riske dekouraz son bann kanmarad.

⁹ Ler bann zofisye ava'n fini adres bann troup, zot ava nonm bann komandan ki ava pran an sarz bann troup.

¹⁰ Ler ou pou apros en lavil pour ou atake, propoz dabor lape avek son bann zabitan.

¹¹ Si sa lavil i aksepte ou bann kondisyon lape e les ou antre, alor, ou ava fors tou son bann zabitan travay pour ou.

¹² Si i refize fer lape avek ou, me i deside fer lager kont ou, alor, ou ava anserkle li.

¹³ Kan SENYER, ou Bondye ava donn ou sa lavil, ou ava masakre tou bann zonm.

¹⁴ Ou ava kapab pran koman piyaz lager, bann fanm, zanfan, bef, mouton, kabri e tou sa ki i annan dan sa lavil, tou sa ki annan valer. Ou ava kapab profit lo tou sa ki ti pour ou bann lennmi ki SENYER, ou Bondye in donn ou.

¹⁵ Konmsa ki ou devre tret tou bann lavil ki tre lwen avek ou, ki pa lavil bann nasyon ki viv isi.

¹⁶ Me konsernan bann lavil sa bann pep ki SENYER, ou Bondye pou donn ou koman patrimwann, ou pa pou les viv nanryen ki respire.

¹⁷ Hitit, Amorit, Kananeen, Perizit, Hivit, Zebizit, ou pou detri zot tou, parey SENYER, ou Bondye in ordonn ou.

¹⁸ Konmsa, zot pa pou kapab fer ou imit tou sa bann aksyon degoutan ki zot fer an loner zot bondye e fer ou komet pese kont SENYER, zot Bondye.

¹⁹ Si avan ou atak en lavil, ou bezwen anserkle li pandan lontan, ou pa pou detri li akoud lars. Ou ava manz zot bann fri, san ki ou bezwen koup zot pye. Pye dibwa ki pouse dan laplenn pa parey en et imen pour ki ou anserkle li.

²⁰ Ou ava kapab koup zis bann pye dibwa ki pa prodwir fri pour manze; ou ava kapab koup zot pour fer bann fortifikasyon kont sa lavil ki pe lager kont ou, ziska ki i tonbe.