Deterononm 18 - Labib An Kreol Seselwa

Privilez bann Pret ek bann Levit

¹ Bann pret, tou manm tribi Levi, pa pou ganny okenn par dan patrimwann Izrael. Zot ava ganny nouri atraver bann sakrifis ki ganny ofer devan SENYER.

² Zot pa pou ganny okenn par avek lezot manm zot kominote. SENYER ki zot patrimwann, parey i'n dir zot.

³ La par ki bann pret ava gannyen lo sa ki lepep in ofer an sakrifis ki swa en bef oubyen en mouton: Zot ava ganny zepol, bann lanmaswar ek lestoma.

⁴ Zot ava donn li bann premye rekolt dible, diven ek delwil, osi lalenn bann premye mouton ki zot ava raze.

⁵ Annefe, parmi tou ou bann tribi, SENYER, ou Bondye in swazir Levi avek son bann garson pour prezant zot servis devan SENYER.

⁶ Si en levit i deside kit enn ou bann lavil, kot i ti reste dan Izrael, pour al reste la kot SENYER ava swazir,

⁷ i ava kapab egzers son minister lo non SENYER son Bondye, parey tou son bann frer levit ki dan servis, la devan SENYER.

⁸ I ava resevwar menm par manze ki lezot levit e profit lo reveni lavant son propriyete.

Fo Profet ek Vre Profet

⁹ Zour ou ava ariv dan pei ki SENYER, ou Bondye pou donn ou, ou pa devre imit bann pratik degoutan sa bann nasyon.

¹⁰ Personn parmi zot pa devre ofer son garson, oubyen son fiy an sakrifis, ni fer divinasyon, ni predir lavenir, ni pratik mazik, ni fer sorsye,

¹¹ oubyen zet move sor, konsilte move lespri, oubyen medyonm, oubyen konsilte dimoun mor.

¹² Annefe, SENYER pa kontan sa enn ki fer sa bann keksoz. Se akoz sa bann pratik degoutan ki SENYER, ou Bondye pou sas sa bann nasyon devan ou.

¹³ Ou devre reste touzour lwayal anver SENYER, ou Bondye.

¹⁴ Sa bann nasyon ki ou pou depouye, ti ekout konsey bann mazisyen ek bann ki predir lavenir. Me ou, SENYER, ou Bondye pa oule ki ou fer parey zot.

Promes pour Anvoy En Profet

¹⁵ SENYER, ou Bondye ava anvoy parmi zot prop pep, en profet parey mwan. Zot ava ekout li.

¹⁶ Sanmenm sa ki ou ti pe reklanmen avek SENYER, ou Bondye ler ou ti lo montanny Horeb, zour rasanbleman, ler ou ti dir: Mon pa oule ekout ankor lavwa SENYER mon Bondye, ni war sa gran dife ankor, pour mwan pa mor.

¹⁷ Alor, SENYER ti dir mwan: Zot annan rezon koz konmsa.

¹⁸ Mon pou anvoy zot en profet parey ou, sorti parmi zot prop pep. Mon pou met mon bann parol dan labous sa profet ki ava dir zot tou sa ki mon'n ordonnen.

¹⁹ Sa enn ki pa ekout parol ki sa profet ava dir dan mon non, mwan menm ki pou demann li rann kont.

²⁰ Me nenport ki profet ki koz lo non lezot bondye, oubyen ki pretann koz lo mon non e ki dir en parol ki mon pa'n ordonn li, sa profet pou bezwen ganny touye.

²¹ Petet ou ava dir dan ou menm: Ki mannyer nou pou kapab rekonnet en parol ki SENYER pa'n dir?

²² Si en profet i koz lo non SENYER, me sa ki i dir pa realize, oubyen i ganny rekonnet fo, alor, sa i en parol ki SENYER pa'n dir. Ou pa devre per li.