Deterononm 14 - Labib An Kreol Seselwa

Pratik Dey ki Ganny Enterdi

¹ Zot en bann zanfan ki pour SENYER, zot Bondye. Alor, si zot an dey, zot pa pou sizle zot lapo, ni raz seve devan zot latet.

² Ou en pep sen pour SENYER, ou Bondye. Ou ki SENYER in swazir parmi tou bann pep lo later pour vin son pep e son posesyon.

Zannimo Pir ek Zannimo Enpir

³ Ou pa pou manz nanryen ki enpir.

⁴ La bann zannimo ki ou ava kapab manze: Bef, mouton, kabri,

⁵ serf, gazel, kabri sovaz, antilop, ek kabri montanny.

⁶ Ou ava kapab manz tou zannimo avek sabo ki fann an de e ki riminen.

⁷ Me la sa bann ki ou pa pou manze, parmi bann ki riminen e bann ki annan sabo fann an de: Samo, lyev, daman. Zot riminen, me zot sabo pa fann an de; zot ava ganny konsidere enpir.

⁸ Ou pa pou manz koson; son sabo i fann an de, me i pa riminen; i enpir. Ou pa pou manz zot lavyann, ni tous zot kadav.

Zwazo ek Lezot Kreatir

⁹ Parmi bann zannimo ki viv dan delo, la bann ki ou kapab manze: Ou kapab manz tou sa ki annan nazwar ek lekay.

¹⁰ Me ou pa pou manz tou bann ki napa nazwar ek lekay; zot enpir pour ou.

¹¹ Ou kapab manz tou zwazo ki pir.

¹² Me la bann zwazo ki ou pa pou manze: Leg, votour, leg maren,

¹³ labiz, tou lespes fokon,

¹⁴ ek tou lespes korbo;

¹⁵ lotris, ibou, mouet, epervye, dapre zot lespes;

¹⁶ gran ek pti ibou, pouldo,

¹⁷ pelikan, votour blan ek kormoran

¹⁸ sigonny, eron, dapre zot lespes; laoup ek sovsouri.

¹⁹ Tou bann zensek avek lezel i enpir pour ou; ou pa pou manz zot.

²⁰ Ou kapab manz tou zwazo ki pir.

²¹ Ou pa pou manz okenn zannimo mor; ou ava donn bann etranze ki reste dan ou lavil, pour manze; ou ava osi kapab vann zot avek en etranze. Me ou, ou en pep sen pour SENYER, ou Bondye. Ou pa pou kwi en pti kabri dan dile son manman.

Regleman lo Ladim

²² Toulezan, ou ava met dekote ladim lo tou sa ki ou'n rekolte, lo tou sa ki ou plantasyon in raporte.

²³ Ou ava manz ladim ou dible, ou diven nouvo ek ou delwil, bann premye ne ou bann troupo, dan landrwa kot SENYER, ou Bondye ava swazir pour manifeste prezans son non. Konmsa, ou ava aprann ki mannyer ou pou annan respe pour SENYER, ou Bondye.

²⁴ Me si, kan SENYER, ou Bondye ava'n beni ou, e ki i lwen pour anmenn ou bann prodwi dan landrwa kot SENYER, ou Bondye in swazir pour manifeste prezans son non,

²⁵ ou ava vann sa prodwi e anmenn larzan. Ou ava byen gard sa larzan dan ou lanmen e al dan sa landrwa ki SENYER, ou Bondye ava'n swazir.

²⁶ La, ou ava kapab servi sa larzan pour aste sa ki oule: Bef, mouton, diven, labwason for, oubyen nenport kwa ki fer ou plezir. Ou ava manz la dan prezans SENYER, ou Bondye. Ou ava rezouir, ou avek ou fanmir ek ou bann serviter.

²⁷ Ou pa pou oubliy bann levit ki viv dan ou bann lavil, akoz zot napa okenn par teritwar parmi zot.

²⁸ Tou le 3 an, ou ava met dekote tou bann ladim lo prodwi ou bann rekolt pour sa trwazyenm lannen e gard zot la kot ou.

²⁹ Alor, bann levit ki napa okenn par dan zot patrimwann, bann etranze ki reste kot ou, bann orfelen ek bann vev ki viv dan ou bann lavil, ava kapab vin manze ziska ki zot rasazye. Konmsa, SENYER, ou Bondye ava beni ou dan tou travay ki ou ava antreprann.