Deterononm 11 - Labib An Kreol Seselwa

Senyer I Gran

¹ Ou ava kontan SENYER, ou Bondye e ou ava touzour obei tou son bann lalwa, regleman ek komannman.

² Rekonnet sa ozordi: Zot bann zanfan pa'n konnen, ni war bann keksoz ki SENYER, zot Bondye in fer. Me mon pe koz avek ou ki'n temwen son grander, son lafors ek son pwisans.

³ Ou'n war bann siny ek bann mervey ki i ti fer kont Faraon, lerwa Lezip e dan son pei antye.

⁴ Ou'n war sa ki i ti fer avek larme Ezipsyen, son bann seval ek kales lager. Ou'n war ki mannyer i ti fer delo lanmer Rouz kouver zot ler bann Ezipsyen ti pe pourswiv zot. SENYER in fer zot disparet pour touzour.

⁵ In entervenir dan zot faver dan dezer zot dan dezer, pour zot kapab ariv isi;

⁶ i ti entervenir kont Datann ek Abiranm, de garson Eliab, dan tribi Riben. Devan pep Izrael, later ti ouver e anglouti zot avek zot fanmir, zot bann latant e tou sa bann dimoun ki ti swiv zot.

⁷ Zot in war avek zot prop lizye, tou sa bann gran mervey ki SENYER in fer.

Benediksyon Pei ki Bondye in Promet

⁸ Alor, obei tou sa bann komannman ki mon pe ordonn zot ozordi. Konmsa, zot ava ganny lafors pour travers larivyer Zourden e pran posesyon sa pei.

⁹ Konmsa, zot ava viv lontan dan sa pei ki SENYER ti fer serman avek zot zanset pour donn zot ek zot bann desandan; sa pei kot dile ek dimyel i koule.

¹⁰ Annefe, pei ki ou pe al pran posesyon i pa parey Lezip kot ou sorti. Laba, ou ti bezwen fatige pour aroz sa ki ou ti senmen, parey ou aroz en zarden legim.

¹¹ Me dan sa pei ki ou pe al pran posesyon ler ou ava'n travers larivyer Zourden, i annan montanny, vale; i ganny aroze par lapli ki tonbe, sorti dan lesyel;

¹² en pei ki SENYER, ou Bondye i pran swen avek. Lizye SENYER, ou Bondye i touzour lo li, depi konmansman lannen ziska lafen lannen.

¹³ Si zot vreman obei tou bann komannman ki mon pe ordonn zot ozordi, si zot kontan SENYER, zot Bondye e servi li avek tou zot leker e zot et antye.

¹⁴ Alor, mon pou fer lapli tonbe lo zot pei dan sak sezon, lapli lotonn ek lapli prentan, e zot ava rekolte zot dible, zot diven nouvo ek zot delwil.

¹⁵ Mon pou fer pouse zerb dan laplenn pour ou bann troupo; ou ava manze ziska ou ava rasazye.

¹⁶ Me atansyon zot pa les zot leker ganny sedwir pour al servi e ador lezot bondye.

¹⁷ Alor, zot pou fer lakoler SENYER monte kont zot. I ava ferm lesyel e okenn lapli pa pou tonbe. Pei pou nepli prodwir okenn rekolt e zot ava disparet rapidman dan sa bon pei ki SENYER pe al donn zot.

¹⁸ Zot ava met mon bann parol ki mon pe donn zot dan zot leker e dan zot et antye; anmar zot lo zot lanmen koman en siny; atas zot koman en mark lo zot fron.

¹⁹ Ou ava ansenny zot ou bann zanfan; ou ava koz lo zot ler ou dan lakour, ler ou pe marse lo semen, ler ou pe al dormi e ler ou leve.

²⁰ Ekri zot lo bann lento laport ou lakaz e lo laport ou bann lavil.

²¹ Konmsa, osi lontan ki lesyel i egziste, zot ek zot zanfan ava viv lontan dan pei ki SENYER in fer serman avek zot zanset pour donn zot.

²² Si zot met byen an pratik tou bann komannman ki mon pe ordonn zot, kontan SENYER, zot Bondye, swiv tou son bann semen e reste atase avek li,

²³ alor, SENYER ava sas devan zot tou sa bann nasyon, e zot ava pran posesyon teritwar bann nasyon pli gran e pli for ki zot.

²⁴ Partou kot zot pou poz zot lipye ava vin pour zot: Zot teritwar pou al depi dezer ziska Liban e depi larivyer Efrat ziska lanmer Mediterane.

²⁵ Personn pa pou kapab afront zot. Parey in promet zot, SENYER, zot Bondye ava senm laper ek lafreyer dan tou pei kot zot ava poz zot lipye.

²⁶ Gete! Ozordi, mon pe met devan zot benediksyon ek malediksyon:

²⁷ Benediksyon, si zot obei bann komannman SENYER, zot Bondye, ki mon pe donn zot ozordi;

²⁸ malediksyon si zot dezobei bann komannman SENYER, zot Bondye e pa swiv semen ki mon pe donn zot ozordi, e al swiv lezot bondye ki zot pa'n konnen.

²⁹ Kan SENYER, ou Bondye in anmenn ou dan sa pei kot ou pe al antre pour pran posesyon, ou ava pronons benediksyon lo montanny Garizim e malediksyon lo montanny Ebal.

³⁰ Sa bann montanny i sitye lot kote larivyer Zourden, dan direksyon Was, dan pei bann Kananeen ki viv dan Araba, vizavi Gilgal, pre avek bann pye dibwa sakre More.

³¹ Kan zot ava travers larivyer Zourden pour al okip pei ki SENYER, zot Bondye pe al donn zot, e kan zot ava pran sa pei kot zot ava reste,

³² zot ava obei e met an pratik tou bann regleman ek bann lalwa ki mon pe met devan zot ozordi.