Deterononm 10 - Labib An Kreol Seselwa

Moiz I Resevwar Ankor bann Komannman

¹ Dan sa letan, SENYER ti dir mwan: Tay de plak ros parey sa de avan e vin lao lo montanny kot mwan; fer osi en kof an bwa.

² Mon pour ekri bann parol ki ti lo bann premye plak ros ki ou ti kase; ou ava met zot dan sa kof.

³ Alor, mon ti fer en kof avek dibwa akasya, tay de plak ros parey sa bann avan e mont lo montanny avek sa de plak ros dan mon lanmen.

⁴ SENYER ti ekri lo sa de plak ros bann menm parol parey avan, sa dis komannman ki SENYER ti dir zot lo montanny dan milye dife, zour rasanbleman. SENYER ti donn mwan sa de plak ros.

⁵ Alor, mon ti vire e desann montanny. Mon ti met sa de plak ros dan kof ki mon ti'n fer. Zot ti reste la, parey SENYER ti'n ordonn mwan.

Lanmor Aaron

⁶ Bann Izraelit ti kit Berot-Ben-Yakann pour al Mosera, kot Aaron ti mor e ganny antere. Son garson Eleazar ti pran son plas koman pret.

⁷ Zot ti kit sa landrwa pour al Goudgoda. Sorti Goudgoda zot ti al Yotbata, en pei kot i annan en kantite larivyer.

⁸ Dan sa letan, SENYER ti swazir tribi Levi pour anmenn Kof Lalyans SENYER, e prezant devan SENYER pour servi li e pronons bann benediksyon an son non.

⁹ Pour sa rezon, Levi napa okenn par dan patrimwann son bann frer. SENYER ki son patrimwann parey SENYER, ou Bondye ti promet li.

Bondye I Ekout bann Demann Moiz

¹⁰ Mon ti reste lo montanny 40 zour, 40 nwit parey premye fwa. Ankor en fwa, SENYER ti ekout mwan. SENYER ti deside pa detri zot.

¹¹ SENYER ti dir mwan: Leve! Kontiny ou vwayaz. Mars devan sa pep pour zot antre e pran posesyon sa pei ki mon ti fer serman avek zot bann zanset pour donn zot.

Sa ki Bondye I Demande

¹² Aprezan Izrael! Ekoute ki SENYER, ou Bondye pe demann ou: I demann ou pour annan respe pour SENYER, ou Bondye, swiv son semen, kontan li, servi SENYER, ou Bondye avek tou ou leker e avek ou et antye.

¹³ Gard bann komannman SENYER ek son bann regleman ki mon pe ordonn ou ozordi, pour ki ou viv ere.

¹⁴ Lesyel ek tou sa ki ladan, later osi ek tou sa ki ladan i pour SENYER, ou Bondye.

¹⁵ Lontan, SENYER ti atase zis avek ou bann zanset. Me ozordi, se zot ki i'n swazir koman son bann desandan, parmi tou lezot pep.

¹⁶ Alor, fer sirkonsi zot leker e aret retif.

¹⁷ SENYER, zot Bondye i Bondye tou lezot bondye e SENYER tou senyer. I sa pli gran Bondye pwisan e terib ki pa fer preferans e i pa aksepte gous.

¹⁸ I defann drwa bann orfelen ek bann vev; i kontan bann etranze, i donn zot manze ek lenz.

¹⁹ Zot ava kontan bann etranze, akoz zot menm zot ti etranze Lezip.

²⁰ Zot ava annan respe pour SENYER, zot Bondye; zot ava ador zis li. Reste atase avek li, e zot ava fer serman lo son non.

²¹ Zot ava loue li; i zot Bondye. I'n fer pour ou bokou bann gran mervey ki zot in war avek zot prop lizye.

²² Ti annan zis 70 parmi zot bann zanset ki ti desann Lezip. Me ozordi, SENYER, Bondye in fer zot vin osi nonbre ki bann zetwal dan lesyel.