Danyel 8 - Labib An Kreol Seselwa

Dezyenm Vizyon: En Mouton Mal ek en Bouk

¹ Dan trwazyenm lannen renny Lerwa Baltazar, mwan, Danyel, mon ti ganny ankor en vizyon.

² Dan sa vizyon, mon ti war mwan dan lavil Siz, ki dan provens Elanm, obor larivyer Oulai.

³ Mon ti lev mon lizye e mon ti war en mouton mal lo bor larivyer. I ti annan de gran korn. Tou le de korn ti long, me sa korn ki ti pous an dernyen, ti pli long ki lot.

⁴ Mon ti war sa mouton mal donn koud korn dan direksyon Was, Nor e Sid. Okenn zannimo pa ti kapab reziste son lafors, e personn pa ti kapab ganny delivre anba son pouvwar. I ti fer sa ki i ti oule e i ti vin pli pwisan.

⁵ Letan mon ti pe reflesi lo la, en bouk ti aparet sorti dan Was. I ti vin tre vit, san tous later. Sa bouk ti annan en korn remarkab ant son lizye.

⁶ I ti ariv kot sa mouton mal avek de korn ki mon ti war lo bor larivyer. I ti lans lo li avek tou son lafors.

⁷ Mon ti war li atak sa mouton mal. I ti ankoler kont li e i ti tap sa mouton mal avek vyolans e kas son de korn, san ki sa mouton ti annan lafors pour reziste. I ti zet li ater e pil lo li. Personn pa ti kapab sov sa mouton mal, anba pouvwar sa bouk.

⁸ Sa bouk ti vin tre gran. Me, letan i ti'n vin vreman for, son gran korn ti kase. Kat korn remarkab ti pouse dan son plas, dan direksyon kat divan.

⁹ Dan enn son korn, en lot pti korn ti pouse. I ti grandi ver Sid, ver Les e ver sa pli zoli pei.

¹⁰ I ti dres li kont larme lesyel. I ti zet ater en parti larme ek bann zetwal e i ti pil lo zot.

¹¹ I ti al atak sef larme lesyel; i ti fer arete sakrifis tou le zour e rann enpir son sanktyer.

¹² Larme lesyel ti ganny livre, ansanm avek bann sakrifis akoz bann transgresyon. Sa korn ti zet laverite ater e i ti reisi dan tou sa ki i ti antreprann.

¹³ Apre, mon ti antann en lanz koze. En dezyenm lanz ti dir avek sa enn ki ti pe koze, “Ziska kan sa vizyon lo sakrifis tou le zour e lo transgresyon pou kontinyen? Ziska kan sanktyer ek larme lesyel pou ganny kraze anba lipye?”

¹⁴ I ti dir mwan, “Ziska ki 2,300 swar ek maten in pase; apre sa, sanktyer pou reganny konsakre.”

Gabriyel I Donn Lenterpretasyon Vizyon

¹⁵ Letan, mwan, Danyel, mon ti war sa vizyon e mon ti esey konpran li, en et parey en zonm ti aparet devan mwan.

¹⁶ Mon ti antann en lavwa imen sorti dan larivyer Oulai. I ti kriye: Gabriyel, eksplik li sa vizyon.

¹⁷ Alor, Gabriyel ti vin pre kot mon ti ete. Kan i ti arive, mon ti ganny en lafreyer, e mon ti tonm lafas ater. I ti dir mwan, “Ekoute, imen! Konpran ki sa vizyon i konsern letan lafen.”

¹⁸ Pandan ki i ti pe koz avek mwan, mon ti tonm lafas ater, san konnesans. I ti tous mwan e met mwan debout kot mon ti ete.

¹⁹ Apre, i ti dir mwan: Ekoute, mon ava fer ou konnen sa ki pou arive kan lakoler Bondye pou fini, letan ki i'n fikse pour lafen.

²⁰ Sa mouton mal ki ou ti war avek de korn, sa i bann lerwa Med e Lapers.

²¹ Sa bouk i lerwa Lagres. Sa gran korn ant son lizye i son premye lerwa.

²² Sa kat korn ki ti pouse dan plas sa korn kase, i kat rwayonm ki pou ganny etabli parmi sa nasyon, me zot pou napa lafors sa enn avan.

²³ Alafen zot renny, kan pese ava'n tous son pli o nivo, en lerwa arogan e rize pou leve.

²⁴ Son pwisans pou kontinyen ogmante, me pa par son prop lafors. I pou lakoz bokou destriksyon. I pou reisi dan tou sa ki i antreprann. I pou detri bann pwisan ek pep Bondye.

²⁵ Par riz, i pou reisi tronp bokou. Leker ranpli avek larogans, i pou touy bokou dimoun ki ti krwar zot an sekirite. I pou dres li kont lerwa tou bann lerwa. Me i pou ganny detri, san okenn lentervansyon imen.

²⁶ Sa vizyon ki konsern bann swar ek maten, i serten. Me ou, gard sa vizyon sekre, akoz i konsern en lepok lwen dan lavenir.

²⁷ Mwan Danyel, mon ti feb e malad pandan plizyer zour. Apre, mon ti leve e repran mon travay kot lerwa. Mon ti reste boulverse akoz sa vizyon; mon pa ti konpran li.