Danyel 1 - Labib An Kreol Seselwa

Danyel ek son Trwa Zanmi dan Lakour Lerwa Babilonn

¹ Dan trwazyenm lannen ki Yoyakim ti lerwa Zida, Naboukodonozor, lerwa Babilonn, ti vin anserkle Zerizalenm.

² SENYER ti livre Yoyakim, lerwa Zida, dan lanmen Naboukodonozor, avek serten bann istansil tanp Bondye. Naboukodonozor ti anmenn sa bann istansil dan pei Sinear e met zot dan lasal trezor son bann bondye.

³ Apre, Lerwa Naboukodonozor ti ordonn Aspenaz, sef zofisye son pale, pour swazir serten parmi bann Izraelit ki sorti dan fanmir rwayal e dan fanmir nob.

⁴ Sa bann zennzan ti devre san defo fizik, zoli, doue avek lasazes, konnesans ek disernman. Konmsa zot ava kapab antre dan servis lerwa, ganny ansennyen bann literatir ek langaz Babilonyen.

⁵ Lerwa ti ordonnen ki tou le zour, zot ganny en porsyon manze ek diven rwayal. I ti oule ki zot ganny edike pandan 3 an; apre, zot ava ganny prezante devan lerwa.

⁶ Parmi sa bann zennzan, ti annan Danyel, Hananya, Misael, ek Azarya. Zot tou, zot ti sorti dan tribi zida.

⁷ Sef zofisye dan pale ti donn zot diferan non. I ti apel Danyel, Beltasar; Hananya, Sadrak; Misael, Mesak; e Azarya, Abed-Nego.

⁸ Danyel ti deside pour pa rann li enpir avek manze lerwa ek diven lerwa. Alor, i ti demann sef zofisye dan pale rwayal pour pa obliz li rann li enpir.

⁹ Bondye ti permet ki Danyel i ganny faver ek konpasyon sa sef personnel pale.

¹⁰ Sef pale rwayal ti dir Danyel, “Mon per, mon senyer, lerwa, ki'n deside sa ki zot pou manze e bwar. Fodre pa ki i war zot pli fay ki lezot zennzan zot laz. Si lerwa i war sa, mon riske ganny koup likou.”

¹¹ Alor, Danyel ti demann sa enn ki sef pale rwayal ti'n met ansarz Danyel, Hananya, Misael ek Azarya,

¹² “Silvouple, teste nou, ou bann serviter pandan dis zour. Donn nou zis legim pour manze ek delo pour bwar.

¹³ Apre, ou ava kapab konpar nou laparans avek sa bann zennzan ki manz sa ki lerwa i manze, e ou ava azir avek ou bann serviter, dapre sa ki ou ava'n war.”

¹⁴ I ti aksepte zot propozisyon e teste zot pandan dis zour.

¹⁵ Apre sa dis zour, zot ti paret pli an form e an meyer sante ki sa bann ki ti'n manz manze rwayal.

¹⁶ Alor, sa zofisye pa ti donn zot bann manze rwayal ek diven, me zis legim.

¹⁷ An sa ki konsern literatir ek lasazes, Bondye ti donn sa kat zennzan, disernman ek konnesans. Danyel ti osi kapab enterpret bann vizyon ek bann rev.

¹⁸ Apre letan fikse par lerwa, sef pale rwayal ti anmenn zot devan lerwa Naboukodonozor.

¹⁹ Lerwa ti koz avek zot; parmi zot tou, ti napa enn ki ti parey avek Danyel, Hananya, Mikael ek Azarya; alor, zot ti ganny plase dan lakour lerwa.

²⁰ Dan tou kestyon ki konsern lasazes ek disernman ki lerwa ti demande, zot ti ganny trouve dis fwa pli siperyer ki tou bann mazisyen ek savan dan son rwayonm antye.

²¹ Alor, Danyel ti kontinyen servi lerwa ziska premye lannen lerwa Siris.