Amos 5 - Labib An Kreol Seselwa

En Lapel pour Repantir

¹ Ekout sa parol, sa kantik dey ki mon pe sant lo ou, Izrael:

² Izrael, sa zenn fiy vyerz, in tonbe e personn pa pou lev li! I'n tale ater dan son pei; napa personn pour lev li.

³ Annefe, la sa ki Senyer BONDYE i deklare: En lavil ki anvoy 1,000 zonm dan lager, zis 100 ki pou retournen. Lo 100 gerye ki al lager, zis 10 ki pou retournen, pour Izrael.

⁴ La sa ki SENYER i deklare avek pep Izrael: Swiv mwan, ou ava viv.

⁵ Pa bezwen mont Betel. Pa al rod mwan Gilgal. Pa bezwen travers Berseba, akoz bann zabitan Gilgal pou al annegzil e Betel pou ganny detri.

⁶ Swiv SENYER e ou ava viv. Parey en dife, SENYER pou bril desandan Zozef. I pou devor Betel, san ki personn i kapab tenny li.

⁷ Pour zot, lalwa i anmer e zot trenn lazistis dan labou.

Senyer I Kreater Liniver

⁸ SENYER ki ti kree bann zetwal: Pleyad ek Orion. SENYER i sanz lannwit e fer li vin lizour e lizour vin lannwit. I apel delo lanmer e devers li lo later. SENYER i son non.

⁹ SENYER ki permet en zonm for tonbe e ki detri lavil byen proteze.

¹⁰ Zot deteste sa enn ki akiz zot devan laport lavil; zot ay sa enn ki dir laverite.

¹¹ Zot in kraz dimoun pov, zot in pran pardfors en parti zot rekolt. Pour sa rezon, zot pa pou viv dan bann lakaz fer avek ros taye e ki zot in konstri. Zot pa pou bwar diven sorti dan zot bann plantasyon rezen.

¹² Mon konnen kantite pese ki zot in fer e tou sa kantite krim ki zot in komet. Zot persekit bann inosan; zot anpes bann pov rod zot drwa devan ziz.

¹³ Pour sa rezon, dan sa letan maler, en zonm saz i reste trankil.

¹⁴ Touzour fer dibyen, non pa dimal. Konmsa, SENYER Bondye liniver ava avek zot parey zot dir.

¹⁵ Ay sa ki mal, kontan sa ki byen. Fer respekte lazistis an kour. Alor, SENYER, Bondye liniver ava kekfwa pran pitye pour sa restan lafanmir Zozef.

¹⁶ Alor, la sa ki SENYER, Bondye liniver, SENYER i deklare: Dan bann semen lavil, dimoun pou antann zis bann kantik dey, ek bann kriye lafreyer dan bann plas piblik. Bann fermye pou ganny apele pour zot fer dey e bann fanm pou vin sant kantik dey.

¹⁷ Dan tou bann plantasyon rezen, ou pou antann zis kantik dey. Tousala pou arive, akoz mon pe vin pini zot. SENYER ki deklare.

Zour Senyer pe Vini

¹⁸ Maler pour zot ki pe esper avek lenpasyans sa zour SENYER! Pour ki rezon zot pe esper sa zour SENYER? I pou en zour teneb, non pa en zour lalimyer.

¹⁹ Sa zour pou parey en zonm ki pe taye devan en lyon, pour li rankontre en lours, kan i rantre kot li, i apiy son lanmen kont miray e en serpan i pik li.

²⁰ Sa zour, SENYER pou anmenn fernwanr, non pa lalimyer. I pou en zour teneb, san okenn lalimyer.

Zizman kont bann Seremoni Relizye

²¹ Mon deteste zot bann pelrinaz; Mon pa siport zot bann rasanbleman. Mon nepli kapab siport zot bann rasanbleman.

²² Mon pa pou aksepte bann sakrifis konplet ek bann lofrann ki zot ofer mwan. Mon pa pou aksepte zot sakrifis lape ek bann zannimo gra ki zot ofer mwan.

²³ Ase fatig mon zorey avek zot bann kantik! Mon nepli anvi antann lanmizik zot laarp.

²⁴ Plito, fer lazistis koule parey delo, e ladrwatir parey en larivyer, ki pa zanmen sek!

²⁵ Zabitan Izrael! Pandan 40 an ki zot ti dan dezer, mon pa'n zanmen demann zot okenn sakrifis ni lofrann.

²⁶ Me ozordi, zot pe ador bann stati ki zot in fabrike par zot prop lanmen. Sakout, zot lerwa e Kevann, zot bondye zetwal ki zot adore,

²⁷ mon pou anvoy zot annegzil lo lot kote Damas. Mwan, SENYER, Bondye liniver ki deklare: Sa i mon non.