Agze 1 - Labib An Kreol Seselwa

Senyer I Donn Lord pour Rekonstri Tanp

¹ Premye zour, sizyenm mwan, dan dezyenm lannen ki Dariis ti lerwa Lapers, SENYER liniver ti adres profet Agze en mesaz pour gouverner rezyon Zida, Zorobabel, garson Sealtiel, e pour Gran-Pret Zozye, garson Yosadak.

² La sa ki SENYER liniver i deklare: Sa pep i dir letan pa ankor arive pour mon tanp ganny rekonstri.

³ Alor, parol SENYER ti arive par lentermedyer profet Agze:

⁴ Eski la i en lepok pour zot reste dan zot lakaz byen dekore? Tandis ki mon lakaz li, in degrengole, i anrin?

⁵ Alor, la sa ki mwan, SENYER liniver, mon demann zot: Reflesi lo zot sityasyon.

⁶ Zot in senm bokou, me zot in rekolte en pti gin; zot in ganny manze, me zot pa zanmen ase; zot in ganny bwar, me zot touzour swaf; zot sanze, me zot lenz pa zanmen gard lasaler; lapey bann travayer i al dan en portmonnen defonse.

⁷ La sa ki SENYER liniver i deklare: Reflesi lo sa ki zot pe fer.

⁸ Mont dan montanny e al rod dibwa. Rekonstri tanp e mon ava santi mwan ere. Alor, mon ava resevwar tou loner ki mon merite, mwan SENYER ki deklare.

⁹ Zot ti espere rekolte bokou, me zot pa'n rekolte bokou. Sa ki zot in anmenn dan lakour, mon'n soufle lo la e fer li anvole. Akoz? SENYER liniver, i demande. Akoz zot, zot touzour okipe avek zot prop lakaz, tandis ki mon tanp in vin zis en ta debri.

¹⁰ Pour sa rezon, lesyel pa'n donn zot son laroze e later pa'n prodwi son fri.

¹¹ Mon'n fer vin lasesres dan pei: Lo bann kolin, dan bann plantasyon dible ek plantasyon rezen, dan plantasyon zoliv. Nanryen pa pou ganny prodwir, ni dimoun, ni zannimo, ni later.

Lepep I Obei sa ki Senyer I Demann Zot

¹² Alor Zorobabel, garson Sealtiel, ek Gran-Pret Zozye, garson Yosadak, ansanm avek leres pep ki'n retournen sorti legzil, ti obei sa ki SENYER zot Bondye ti demann zot fer, par lentermedyer profet Agze. Lepep ti annan en gran respe pour SENYER.

¹³ Apre sa, Agze, mesaze SENYER, ti adres zot sa mesaz SENYER: Mon avek zot, mwan SENYER ki deklare.

¹⁴ Alor, SENYER ti fortifye lespri Zorobabel, gouverner provens Zida, garson Sealtiel e avek lespri Zozye, garson Gran-Pret Yosadak, ansanm avek leres lepep. Zot ti vin travay pour rekonstri tanp zot Bondye, SENYER liniver.

¹⁵ Sa ti ariv vennkatriyenm zour, sizyenm mwan, dan dezyenm lannen ki Dariis ti lerwa Lapers.