2 Timote 3 - Labib An Kreol Seselwa

Letan Lafen

¹ Rapel sa byen: Dan bann dernyen zour, pou annan letan difisil.

² Annefe, zonm pou vin egois, kontan larzan, vantar, arogan. Zot pou koz kont Bondye, dezobei zot paran, engra, san okenn respe pour sa ki sakre.

³ Zot pou annan leker dir, san pitye, kalonmnye zot prosen, vyolan, kriyel, lennmi tou sa ki byen.

⁴ Zot pou tret, annan karakter vif, gonfle avek lorgey, kontan plezir plis ki Bondye.

⁵ Zot pou fer sanblan ki zot fidel anver Bondye; me zot pou rezet son vre pwisans. Pa asosye ou avek bann dimoun parey.

⁶ Serten parmi zot i antre dan bann lakaz e soumet anba zot lenfliyans, bann fanm feb ki sarze avek pese, ki les zot ganny antrennen par toudsort kalite pasyon.

⁷ Zot touzour pe aprann, me zot pa zanmen kapab konn laverite.

⁸ Parey ki bann mazisyen Zannes ek Zanbres ti opoz Moiz, sa bann zans, zot opoz laverite. Zot en bann zonm avek lespri koronpi e zot lafwa pa vo nanryen.

⁹ Me zot pa pou al tre lwen, akoz tou dimoun pou dekouver zot betiz parey sa ki ti arive avek Zannes ek Zanbres.

Dernyen Rekomandasyon

¹⁰ Me ou, ou'n swiv mwan dan mon bann lansennyman, dan mon mannyer viv, mon bann proze, mon lafwa, mon pasyans, mon lanmour, mon perseverans,

¹¹ mon bann persekisyon, e dan mon bann soufrans. Ou konn byen sa ki ti ariv mwan Antyos, Ikonyonm, List, ek tou sa bann persekisyon ki mon'n siporte. Me Senyer in delivre mwan dan tou.

¹² Dayer, tou dimoun ki oule viv en lavi fidel ini avek Zezi-Kri pou ganny persekite.

¹³ Me bann malfeter ek bann tronper pou touzour fer progre dan sa ki mal. Zot pou tronp lezot, me zot osi, zot pou ganny tronpe.

¹⁴ Me ou, reste ferm dan sa ki ou'n aprann, e dan sa ki ou'n vreman krwar: Ou konnen ou menm avek ki ou'n ganny sa lansennyman.

¹⁵ Annefe, depi ou lanfans, ou konn Lekritir sent, ki kapab donn ou lasazes ki kondwir ver lavi eternel, par lafwa dan Zezi-Kri.

¹⁶ Tou Lekritir i enspire par Bondye e i itil pour ansennyen, pour koriz lerer, pour remet drwat, e pour form en bon mannyer viv.

¹⁷ Konmsa, dimoun ki servi Bondye ava byen prepare e byen ekipe pour fer tou bann bon aksyon.