2 Timote 2 - Labib An Kreol Seselwa

En Solda Fidel pour Zezi-Kri

¹ Alor ou, mon garson, pran ou lafors dan lagras ki sorti kot Zezi-Kri.

² Sa ki ou'n antann mwan anonse devan en kantite temwen, konfye li avek bann zonm dan ki ou annan konfyans. Konmsa, zot osi, zot ava kapab ansenny lezot.

³ Koman en bon solda Zezi-Kri, pran ou par soufrans.

⁴ Si i oule fer plezir sa enn ki ti anrol li, en solda dan servis pa anbaras li avek bann zafer lavi sivil.

⁵ Dan en konpetisyon, en atlet pa ganny kouronnen si i pa'n swiv bann regleman.

⁶ En kiltivater ki travay dir, devret premye pour rekolte fri son travay.

⁷ Reflesi byen lo sa ki mon pe dir. Dayer, Senyer pour fer ou konpran tousala.

⁸ Mazin Zezi-Kri, desandan David ki'n resisite parmi bann mor, parey Bonn Nouvel ki mon anonse.

⁹ Se pour sa Bonn Nouvel ki mon pe soufer e menm ganny ansennen koman en bandi. Me Parol Bondye pa ganny ansennen.

¹⁰ Pour sa rezon, mon siport tou pour sa bann ki Bondye in swazir. Konmsa zot osi, zot ganny sove dan Zezi-Kri e zot ganny laglwar eternel.

¹¹ Sa parol i sir: Si nou'n mor avek li, avek li, nou pou viv.

¹² Si nou persevere, avek li nou pou rennyen. Si nou rezet li, li osi i pou rezet nou.

¹³ Si nou pa fidel, li i pou reste fidel, akoz i pa kapab kontredir son prop lekor.

En Bon Travayer

¹⁴ Ou devre rapel zot tousala. Averti zot devan Bondye ki zot devre evite diskit lo bann mo: Sa bann diskisyon pa servi dan nanryen, me zis pour detri sa enn ki ekoute.

¹⁵ Fer tou pour paret devan Bondye koman en zonm ki'n ganny teste, koman en zouvriye ki napa nanryen pour onte, me ki anons byen mesaz laverite.

¹⁶ Evit bann diskisyon vid ki kontrer avek lafwa. Sa i antrenn dimoun pli lwen avek Bondye.

¹⁷ Sa bann kalite parol i ronz lekor parey lakangrenn. Parmi sa bann dimoun, i annan Himene ek Filet.

¹⁸ Zot i'n ekart zot avek laverite, an dizan ki nou rezireksyon in fini pase. An fezan sa, zot pe met dout dan lafwa serten dimoun.

Fondasyon Poze par Bondye

¹⁹ Pourtan, sa baz solid ki Bondye in poze i reste solid. Sa bann parol i reste grave: Senyer i konnen lekel ki lo son kote. E ankor: Sa enn ki nonm non Senyer, i devre detourn li avek lemal.

²⁰ Dan en gran lakaz napa zis vesel annor e annarzan, me i osi annan sa ki an bwa e an larzil. Serten i servi pour bann lokazyon spesyal e lezot pour servis pli ordiner.

²¹ Sa enn ki pirifye li kont sa bann move keksoz ava kapab ranpli bann latas spesyal: I devoue totalman anver son Met; i pare pour fer tou bann bon aksyon.

Serviter Senyer

²² Alor, pa swiv bann pasyon lazenes. Rod lazistis, lafwa, lanmour, lape, ansanm avek bann ki envok Senyer avek en leker pir.

²³ Pa partisip dan bann diskisyon ensanse e bet. Parey ou konnen, zot provok lager.

²⁴ E zot konnen ki serviter Senyer pa devret fer kerel. Okontrer, i devre byen avek tou dimoun, kapab ansennyen e pasyan.

²⁵ I devre ansenny son bann ladverser avek douser, dan lespwar ki Bondye ava donn zot lokazyon sanz zot fason viv e konn laverite.

²⁶ Alor, zot ava retourn dan zot bon sans e debaras zot dan pyez kot dyab in graponn zot, pour fer zot soumet anba son lavolonte.