2 Samyel 21 - Labib An Kreol Seselwa

Bann Gabaonit ek Desandans Sail

¹ Dan letan David, ti annan en lafanmin pandan 3 an. David ti konsilte SENYER ki ti dir li, “Sa i akoz Sail ek son fanmir ki'n vers disan. Zot in touy bann Gabaonit.”

² Lerwa ti apel bann Gabaonit pour koz avek zot. Bann Gabaonit pa ti bann Izraelit; zot ti enn bann dernyen Amorit; bann Izraelit ti'n angaz zot par serman anver zot, me dan son pasyon pour Izrael ek Zida, Sail ti rod fason detri zot.

³ David ti demann bann Gabaonit, “Ki mon kapab fer pour zot e koman mwan kapab repar sa mal ki Sail in fer anver zot, pour ki zot ava kapab loue pep SENYER?”

⁴ Bann Gabaonit ti reponn li, “Ni larzan, ni lor pa pou regle nou rapor avek Sail ek son fanmir; nou napa personn pour touye dan Izrael.” Lerwa ti dir, “Sa ki zot ava dir, mon ava fer pour zot.”

⁵ Zot ti dir lerwa, “Akoz sa zonm ti oule ekstermin nou; akoz i ti annan en proze pour detri nou e ki nou disparet lo teritwar Izrael antye,

⁶ donn nou 7 zonm parmi son bann garson; nou ava ekspoz zot lekor devan SENYER dan lavil Gibea-Sail, sa enn ki SENYER ti'n swazir.” Lerwa ti dir, “Mon ava fer li.”

⁷ Lerwa ti eparny Mefi-Boset, garson Zonatan, garson Sail, akoz sa serman ki David ek Zonatan, ti fer devan SENYER.

⁸ I ti pran sa de garson ki Sail ti gannyen avek Rispa, fiy Aya: Armoni ek Mefi-Boset, avek sa senk garson ki Mikal fiy Sail, ti donn Adryel sorti Mehola, garson Barzilai.

⁹ I ti livre zot avek bann Gabaonit ki ti pann zot lo montanny devan SENYER. Tou le set ti ganny touye premye zour larekolt, o konmansman rekolt lorz.

¹⁰ Rispa, fiy Aya, ti pran en sak ki i ti tal lo ros pour li, depi konmansman larekolt, ziska ki lapli ti tonm lo bann kadav. I ti anpes bann zwazo vin lo zot pandan lazournen, e bann zannimo sovaz pandan lannwit.

¹¹ Zot ti vin dir David sa ki Rispa, fiy Aya, menazer Sail.

¹² Alor, David ti al pran bann lezo Sail ek bann lezo Zonatan, son garson, kot bann zabitan Yabes-Galaad ki ti'n vol sa bann lezo depi plas Bet-Seann, kot bann Filisten ti'n pann zot, zour zot ti'n bat Sail Gilboa.

¹³ Donk, depi Yabes, David ti pran bann lezo Sail ek bann lezo Zonatan, son garson. I ti osi pran lezo sa set zonm ki ti'n ganny pann.

¹⁴ Bann lezo Sail ek Zonatan son garson ti ganny antere Sela, dan pei Benzamen, dan tonbo Kis, papa Sail; tou sa ki lerwa ti'n ordonnen ti ganny fer. Apre sa, Bondye ti montre son bonte anver pei.

Bann Lager kont bann Filisten

¹⁵ Bann Filisten ti ankor fer lager kont Izrael. David ti desann avek son bann zonm e i ti konbat kont bann Filisten. David ti fatige en kantite.

¹⁶ Yisbi-Benob ki ti en desandan Afa, ti annan en lans an bronz ki ti pez apepre trwa kilo ek en lepe nef atase avek son sang. I ti annan lentansyon touy David.

¹⁷ Abisai, garson Serouya, ti vin donn en koudmen David e touy sa Filisten. Alor, bann zonm David ti fer li pret serman. Zot ti dir li, “Ou pa pou al lager ankor avek nou; ou pa pou tenny lalanp Izrael.”

¹⁸ Apre sa, lager kont bann Filisten ti rekonmanse Gob. Alor, Sibekai, en Housatit, ti touy Saf ki ti en desandan Rafa.

¹⁹ Lager kont bann Filisten ti rekonmanse Gob. Elkanann, garson Yaare-Oregim, ki sorti Betlehenm, ti touy Golyat, en Gatit ki ti annan en lans ki ti groser en silenn ki servi pour fer latwal lo la.

²⁰ Ti annan ankor en lot lager Gat kot ti annan en zean ki ti annan sis ledwa dan sak lanmen e sak lipye; 24 an tou. I ti osi sorti Rafa.

²¹ I ti provok Izrael e Zonatan, garson David, frer Simei ti touy li.

²² Sa kat zonm sorti Gat, ti sorti dan fanmir Rafa. Zot ti tonm anba latak David ek son bann zonm.