2 Samyel 10 - Labib An Kreol Seselwa

Lager kont bann Amonit

¹ En pe letan apre, lerwa bann Amonit ti mor; son garson Hanoun ti vin lerwa dan son plas.

² David ti dir, “Mon pou azir dan lanmitye pour Hanoun garson, Nahas, parey son papa in azir anver mwan.” David ti anvoy en delegasyon pour prezant son kondoleans avek Hanoun pour lanmor son papa. Kan zot ti ariv dan pei bann Amonit,

³ bann sef Amonit ti dir avek zot sef Hanoun, “Eski ou krwar ki David in anvoy en delegasyon an omaz pour ou papa e prezant ou son kondoleans? Pa plito pour espyonn lavil ki zot ava vizite, detri e kaptire, ki David in anvoy sa bann dimoun kot ou?”

⁴ Alor, Hanoun ti fer aret delegasyon David. I ti fer raz lanmwatye zot labarb, koup zot lenz lanmwatye longer lo nivo zot deryer e fer zot ale.

⁵ Ler David ti antann sa, i ti anvoy zwenn zot. Annefe, sa bann zonm ti onte. David ti fer dir zot: Reste dan lavil Zeriko ziska ki zot labarb in repouse; apre zot ava retournen.

Lager kont bann Amonit ek bann Siriyen

⁶ Ler bann Amonit ti rekonnet ki zot ti'n ofans David en kantite, zot ti angaz 20,000 solda Siriyen sorti Bet-Rehob ek Soba, 1,000 zonm dan larme lerwa Maaka e 12,000 sorti kot bann zabitan Tob.

⁷ Ler David ti antann sa, i ti anvoy Zoab avek tou son larme, bann meyer solda.

⁸ Bann Amonit ti plas zot solda pare pour batay devan lantre laport lavil; bann Siriyen sorti Soba e Bet-Rehob, bann solda sorti Tob ek Maaka, ti pran pozisyon apar dan lakanpanny.

⁹ Zoab ti remarke ki i ti devre fer fas avek de fron batay, devan deryer, i ti swazir meyer solda larme Izrael, e plas zot an pozisyon anfas bann Siriyen.

¹⁰ I ti donn responsabilite leres larme avek son frer, Abisai, e plas zot anfas avek bann Amonit.

¹¹ Zoab ti dir, “Si bann Siriyen i tro for pour mwan, ou ava vin ed mwan; me si bann Amonit i tro for pour ou, mon ava vin ed ou.

¹² Montre kouraz, e annou konbat koman bann brav solda pou nou pep, e pour bann lavil nou Bondye; SENYER ava fer sa ki li menm i war bon.”

¹³ Zoab ek son troup ti mont latak kont bann Siriyen; e zot ti forse sove.

¹⁴ Ler bann Amonit ti war bann Siriyen sove, zot osi zot ti sove devan Abisai, e rantre dan lavil. Alor Zoab ti termin sa kanpanny kont bann Amonit, e retourn Zerizalenm.

¹⁵ Ler bann Siriyen ti remarke ki zot ti'n fini ganny bate par bann Izraelit, zot ti rasanble tou zot troup.

¹⁶ Hadadezer ti anvoy sers bann Siriyen lo lot kote larivyer Efrat. Zot ti al Elanm anba komannman Sobak, komandan an sef larme Hadadezer.

¹⁷ Ler David ti ganny sa nouvel, i ti mobiliz larme Izrael antye, travers larivyer Zourden e ariv Helanm. Bann Siriyen ti pran pozisyon kont David pour atak li.

¹⁸ Bann Siriyen ti bezwen sove devan Izrael; David ti touy 700 solda lo seval, e 40,000 solda apye, zot zeneral, Sobak ti mor la.

¹⁹ Ler tou bann lerwa anba kontrol Hadadezer ti war ki mannyer zot ti'n ganny bate par Izrael, zot ti fer lape avek Izrael, e soumet avek zot. Bann Siriyen pa ti oze al ed bann Amonit ankor.